五號屋的部落: 2月 2011

2011年2月26日星期六

醃四季鹹柑桔

2011年2月26日下午2:56公開累積瀏覽 550 1

每年過咗正月十五, 如果有靚四季桔, 都會醃的四季鹹柑桔. 記得有一年好多紅火蟻, 話的年花盆栽可能落咗好多農藥, 嗰年就無醃. 去年的桔唔夠靚, 又無醃. 今年公司樓下大堂的桔好靚, 有好多盆, 叫reception同事問管理處, 管理處送咗一盆上嚟我地公司(其實唔要都可能要送哂去堆田區). 同事剪咗部份比我, 隻隻都好靚呀! 真係唔該哂!

好多人醃柑桔都有唔同嘅方法, 我就用自己覺得comfortable嘅方法. 我見過有個朋友, 佢會將的桔風乾哂(開始皺皮)先至醃, 但我唔鍾意, 我鍾意的桔仲新鮮, 用的鹽醃哂的桔汁出嚟, 的桔汁都可以沖水飲.

以前醃柑桔好易, 洗乾淨, 的桔乾身就可以醃. 但而家驚的桔有農藥, 所以加多一重功夫, 洗完之後, 再用熱水浸吓佢. 然後再瀝乾... 唔知呢個方法好唔好, 但咁樣個心好似舒服的. 鹹柑桔用嚟沖水飲, 鹹檸七, 蒸魚, 如果的桔真係積聚農藥, 會食哂落肚. 浸咗熱水, 點都會去除多的農藥啩! 的桔未浸熱水前, 比較硬身, 浸咗熱水, 會變得軟身. 好似熟咗一半咁, 的桔味會好香. 我唔知好唔好架, 先兩年都試過咁醃, 的桔醃起都無問題吖, ok 喎. 今年都係繼續咁醃...

預備幾個清潔空樽, 先放一點粗鹽在底, 然後放一層柑桔

加上一層鹽

如是者一層一層加上去

咁就整咗幾樽啦.

醃好之後唔會即時收起入廚櫃, 會放出嚟睇吓醃成點, 如果見到有發霉, 就唔可以要. 我通常睇等的桔差唔多出哂水(大約一個月), 又無發霉, 咁先放心放入廚櫃.

用嘅時候就攞先幾年醃咗嗰的出嚟用...整吓整吓都keep 咗的"存貨"

五日後......

今年真係唔錯喎...睇吓的桔, 五日就已經出咗好多桔汁出嚟, 的桔皮亦開始皺皮, 無發霉, 應該ok, 再等多三個星期睇吓點, 如果再皺皮再縮的, 仲可以由三樽變兩樽, 再放入廚櫃收埋佢, 可以慳的地方.

2011年2月25日星期五

媽媽笑了, 我的心也寬了!

2011年2月25日下午1:43公開累積瀏覽 23 1

剛探完媽媽, 見到她進展良好, 真的心也寬了.

星期三放工去探她, 見她面帶歡容, 胃口好了一點, 哥哥嫂嫂做了齋蘿蔔糕給她吃, 她也很喜歡吃. 扶她起身坐時, 覺得她力氣好轉. 看見床邊有個扶行架, 知道她開始願意落地行, 真的很開心. 原來每次不停跟她說話, 她會聽, 她希望出院, 她會做.

今天去探她, 她的面色更加好, 哥哥嫂嫂已經在那裡, 媽媽還主動同我地講, 要落地用扶行架行比我地睇. 我實在無法形容當時喜悅的心情, 看著她一步步的行, 真的很開心, 她用扶行架行了十多步, 完成後, 馬上給她一個擁抱, 真的忍不住, 錫了她一大啖.

她心情好轉, 我逗她笑, 她還會開我玩笑, 我見她笑, 我的心也寬了.

離開醫院, 我覺得自己的腳步都輕鬆了, 連個心都好像輕了很多.

這個幾月來, 常常都覺得個心被重壓著, 雖然過年時攪了幾次party, 與朋友家人相聚, 如常咁整的糕點食品, 但都不覺得十分開心. 今日是這個幾月來, 第一次覺得心情輕鬆愉快.

雖然媽媽離完全康復還有一段距離, 但這進展一大步, 真是一大鼓舞. 希望她的排尿功能亦能夠慢慢回復....媽媽加油.

明晚會去哥哥家晚飯, 大家再商量媽媽出院後, 如何安排照料她.

2011年2月23日星期三

鹿鳴春京菜館

2011年2月23日下午2:35公開累積瀏覽 47 0

February 21, 2011, Monday Afternoon,

今日公司訂咗鹿鳴春京菜館食Spring Lunch. 呢間京菜館大大話話都開咗四十幾年, 在尖東工作咁多年, 久唔久都會幫襯吓, 點知食吓食吓, 的野越嚟越差, 的老伙計招呼又差, 的檯布又穿又爛都唔換, 呢幾年都好少幫襯.

但唔知點解, 我老闆同公司另一個鬼仔同事, 好鍾意嚟呢道食, 仲話的Peking duck very good.... 雖然我同好幾位同事都覺呢道的野唔得, 但係總有人喜歡, 晚市聽聞都好旺場, 得到的外藉/日本遊客支持.

唔知係咪自置物業, 一路都係呢個地址, 亦唔見做過咩野大裝修(可能有維修但係唔多覺嗰種, 亦都可能係我少幫襯唔知有裝修過). 今次去到, 的檯布卒之無爛啦.

今日訂咗四枱, 每枱10個人, 每圍都叫咗一個中午填鴨餐, 最主要係有原隻填鴨, 再加其他餸及甜品.

白切肉粉皮, 無味亦唔覺好食. 的肉切得略厚, 粉皮偏硬唔夠滑, 加咗的汁亦唔好得幾多.

賽磅蟹, 呢碟炒得幾好, 味道略淡

小籠包, 非常一般

清炒蝦仁, 老闆至愛, 又係一般

的填鴨ok, 但包填鴨嘅粉皮超差. 粉皮太厚, 又無彈性, 一包即爛....有無攪錯, 咁老牌店都整到咁...

生菜鴨鬆, 呢個我覺得味道ok, 碟底的炸炒絲夠脆, 包生菜加的醬一齊食都幾好味.

蔥爆羊肉, ok

醬爆雞丁, 味道偏甜

肉絲炒拉麵, 非常一般

松鼠魚. 以前呢道的松鼠黃魚好好味, 但而家變咗甜酸魚. 用桂花魚代替, 松子都見唔到一粒, 刀工粗糙, 响兩面求其幾刀就當係松鼠魚, 跟好耐以前, 好大分別.

最後係香蕉高力豆沙...都ok, 但個經理幫我地order咗加大, 一碟14個, 太多食唔哂.
埋單hk$5,000

2011年2月22日星期二

芋頭餅

材料: 芋頭(煲熟壓成蓉), 菜脯(切碎), 蔥(切碎), 即食花生(壓碎). 呢個芋頭餅以前都整過好多次, 通常都係等冬天買到泰國芋頭先至整.

我買咗兩個芋頭, 本來諗著煮一個, 點知Ruby問都唔問, 全部批哂皮, 切粒(佢唔知係咪以為我想整芋頭糕). 咁切咗都無法, 一次過整哂佢. 我叫佢用水煲, 佢同我講唔好煲, 蒸好的. 吓! 好似expert咁, 無問題, 切到咁細粒, 蒸都應該無問題. 結果蒸起, 壓蓉時覺得太乾, 最後加咗大約1杯脫脂奶, 先至好的. 所以我覺得好似以前咁, 應該落水煲, 唔好蒸.

跟著落鹽, 落糖, 胡椒粉, 少許雞粉. 加菜脯碎, 花生碎, 蔥花碎拌勻. 用匙羹取適量用手搓圓(用水濕手就唔會黏手). 用易潔鑊, 落芋頭球一沾油, 輕壓扁, 翻轉, 咁就唔會黏鑊. 但今日太心急, 唔應該將芋頭搓成咁大個球, 細個的一啖一個就最好. 而且份量太多, 另外keep起9個芋頭球留番明天. 一個芋頭真係已經夠哂.

鳳眼卷

2011年2月22日下午12:15公開累積瀏覽 428 0

February 19, 2011, Saturday Night, 天文台話天氣漸漸回暖, 但係越夜越凍, 加上落雨, 真係又濕又凍.

今日一早預備好的餸菜, 基本上大部份Ruby都識煮, 但有兩樣, 一定要我煮, 其中一樣係第一次試煮.

鳳眼卷 - 材料: 鯪魚肉, 臘腸

呢樣餸我都未煮過, 以前睇Cooking Mama, 其中一集嘅Mama整過類似嘅餸, 有少少記憶, 昨天响蛇王兄買咗的鵝肝臘腸, 好想整嚟食, 咁順便試吓整呢個餸囉. 應該ok唔會失手嘅. 但嗰集嘅Mama係似自己剁鯪魚肉, 我就買現成的.

本來預備咗6條臘腸(2條臘腸, 2條潤腸, 2條鵝肝腸), 但睇睇吓份量太多, 都係改整4條就夠啦.
1條臘腸, 1條潤腸(臘腸同潤腸都係鴻星出品, 覺得好好味), 加2條昨天响蛇王兄買嘅鵝肝腸.

做法: 臘腸先汆水. 買回來嘅鯪魚肉先加胡椒粉撈好, 然後用適量魚肉將臘腸包好(不用包得太厚), 然後放入一個已掃油嘅碟蒸大概8-10分鐘. 取出, 再落鑊煎至金黃色. 切片上碟即可. 點解叫鳳眼卷, 切起似鳳眼啩! 睇吓第四張相似唔似? 長瘦型嗰兩條係臘腸同潤腸, 短肥嗰兩條係鵝肝腸. 我留起一件鳳眼鵝肝臘腸比媽媽, 肉質腍的, 應該啱媽媽食.

Cadero Grill & Oyster Bar

2011年2月22日下午1:40公開累積瀏覽 31 0

February 20, 2011, Sunday Afternoon

今個星期日早上, 卒之可以hea吓, 唔使一早出去. 今早亦唔打算去睇媽媽, 晚上先去, 因為早上姊姊哥哥會去.

中午同二公子型爸出咗尖沙咀海港城, 二公子諗著將佢嘅利是錢買一樣心頭好, 咁咪一齊出去shop吓囉. 架車泊咗海旁, 一行入去海港城, 見到間餐廳Cadero Grill & Oyster Bar.

呢道食lunch buffet, 餐廳門口有個牌寫著HK$158 per person. 但唔知係咪算早, 十二點幾, 無咩客. 但我怕遲的上去其他餐廳要等位, 同型爸講不如入去睇吓有咩野食, 打咗個round, 唔想諗太多, 都決定坐低食.

對著門口係個pasta counter, 選好材料會即時煮, 而隔鄰counter就serve 熱食, 燒雞翼, 魚餅, 魚仔.

入門口右手面係salad bar & cold cuts

沿路行入去見到個雪櫃雪住的cake, 咦, 點解唔係擺喺廚房?!

跟著經過一個玻璃酒房, 放咗好多酒

再行入去就係dessert corner

坐低比咗三張咭我地, 用嚟去pasta counter 落order, 但無限次數, 食得落order幾多次都得.

開始食啦! 攞咗少少沙律, 再攞幾隻龍蝦仔, 好鮮甜呀! 問清楚唔係大陸入口, 可以放心食.

飲咗半碗南瓜屁廉湯. 都ok, 但唔敢飲太多, 驚食唔落其他野.

熱葷就係食呢三樣

叫咗白汁海鮮pasta, ok 啦.

甜品 &

咖啡... 就係食咗咁多咋, 任食都食唔倒幾多.

原本呢間餐廳都係under King Parrot Group, 型爸有咭, 15% discount.

食完行過商場中央有好大嘅chocolate display, 幾得意, 影張相啦... 穿過商場, 我地去shopping lu.

2011年2月20日星期日

蛇王兄

2011年2月20日下午3:08公開累積瀏覽 32 1

February 18, 2011, Friday night

今日放工之後又要趕去買餸, 明晚又會煮一餐. 但明天早上約了哥哥姊姊飲茶傾媽媽的情況, 無時間去買餸.

放工之後去街市, 好多都開始收檔, 所以又要快快快... 哈! 不過一個鐘就攪掂, 皆因一早寫定要買咩.

今日一早決定唔返屋企食晚飯, 因為二公子約了朋友仔回家打邊爐, 咁我同型爸咪出去撐檯腳囉. 突然醒起, 今年好似仲未幫襯蛇王兄喎, 今日又濕又凍, 食蛇羹好暖呀!

買完野就開車過去....嘩! 又係滿哂座要等位, 擺响門口張檯都坐埋. 好彩等咗唔係好耐都有位, 架車仲可以泊响門口(如果有警察抄牌, 都可以立即駛走架車).