2011年4月30日 星期六

醉香庭湘川菜館


2011年4月30日下午3:57公開累積瀏覽 46 0


食完早餐, 今日會帶家姊姊夫上大陸玩一天.
我地經落馬洲去福田口岸, 坐深港鐵去華強北站行吓.  嗰道好多電子野, 而家好興用LED燈的燈泡香港賣好貴, 我地去睇吓, 唔知大陸係咪平好多...  嘩! 原來真係相差好遠呀! 我地响香港啱啱買咗一個燈泡, hk$96, 今次買兩個返嚟試吓, 每個rmb28.   唔知質量有幾大分別, 要用過至知.
 
行呢的地方我同家姊都無興趣, 帶姊夫去睇吓的karaoke, 佢有興趣喎.  哈哈, 仲比我地游說佢, 不如帶咗我地部舊karaoke返加拿大啦, 我地嗰部買咗年幾之麻.  點知佢話ok 喎, 佢話佢地好少唱, 久唔久先唱一次, 比的新歌佢地都唔識唱.  好野! 我地部舊karaoke終於搵到新主人啦.  其實部機都仲係幾好架.  不過為咗二公子多的新歌唱吓, 我地先換咋(哈哈, 真係多藉口....當然我地都好鍾意佢係touch mom咁型仔啦)

行咗個幾鐘, 帶佢地落去漁米粥食飯, 食完飯, 再行吓超市, 買的孜然粉, 跟著就去按摩.  呢幾日行得咁攰, 去按摩就最舒服啦.

攪吓攪吓, 按完都六點幾七點, 咁就去福田口岸個商場搵食, 點知去到嗰間農家菜大排長龍, 唉吔, 今日仲係復活節假期, 好多人呀!  咁型爸話不如去西湖春天啦, 坐的士過去20分鐘應該ok, 但我地5個人要分兩部的士.  諗吓諗吓, 我地無訂位, 如果去到可能又要等.  都係喺附近搵食好的啦. 
去到一間有新鮮鱷魚肉賣嘅酒家, 又話滿座(咁啱今日有人擺滿月酒)... 跟著話不如返香港食, 吓! 呢個時間, 香港又係假期, 一樣難搵位.  

最終我地再行, 見到呢間醉香庭湘川菜館, 仲連著間醉香庭港式茶餐廳(兩間有一門打通, 同一個老闆), 啱啱有人食完起身, 有位我地就即刻坐低啦.   湘川菜我地都啱, 但家姊就唔食得辣啦.
叫咗呢個祈黃雞, 唔辣嘅
干鍋大腸, 睇佢唔出, 好辣架
大盆花菜, 都有少少辣
酸菜魚, 呢碟睇落一的都唔辣, 但食落勁辣.  大頭魚, 的肉好滑, 可惜的肉太多骨, 食嘅時候真係要好小心, 家姊差的梗骨.
蒙古鐵板牛肉, 睇落好辣, 呢碟的牛肉反而有麻香, 但唔係好辣
海帶龍骨湯, 食的咁辣野, 飲呢個湯清清熱都好.
其實都叫咗好多野, 但係大部份都辣, 加上的餸配菜辣椒仲多個主菜的肉, 的牛肉得十嚿八嚿, 肥腸都係(仲好, 純粹過吓口癮, 呢的都唔應該食咁多), 食落唔係幾夠, 個酸菜魚好辣, 佢地唔係好頂得著. 我地叫多幾樣野
干煸四季豆, 呢個煮法麻麻, 因為的豆係無干煸, 剩係煮腍咗, 不過味道都ok
叫多個麻辣脆蝦, 呢碟都ok, 唔係好辣啫(同碟干煸四季豆一樣, 差唔多食哂, 佢地提我先記得影)
呢碟牛河等咗好耐先至嚟, 想cancel, 但係一cancel就即刻送到.  呢碟應該係隔離港式茶餐廳炒嘅, 非常唔得, 一的味都無. 
埋單rmb461, 咁多樣餸加兩支啤酒, 都算抵啦.
食完就行過關口....嘩! 呢個關口, 我未試過有咁多人, 開咗好多條line, 但都係排哂長龍.  不過都好快啫.  過完香港關出去搭的士.... 嘩! 又係咁多人, 等巴士的人打哂蛇餅, 巴士公司send咗幾架"吉車"嚟疏導人潮, 仲要警察先生維持秩序.  我地等的士(好多的士), 但係人太多, 排隊上的士都足足排咗半個鐘先上到車.   
咁又一日, 返到屋企舒服哂.  我地平時上大陸都會盡量避開呢的長假期, 但今次三家姊返嚟三個星期, 佢地都好忙, 又另外安排咗個trip, 所以都要把握呢幾日陪佢地.

2011年4月29日 星期五

姊夫從加拿大帶回來的法國紅酒


2011年4月29日下午3:26公開累積瀏覽 37 1

就係呢支啦, 外型同平時嗰的有的唔同, 呢隻係法國紅酒嚟架.
個樽睇落好似好殘舊, 好似係深海撈出嚟咁. 我影得唔好, 無法影得清楚的.
不是正常圓樽形, 印著法文, 唔識睇... 但係揸上手我覺得好有型呀.  已經盡量影個close up, 但影極都影唔清.
後面印著的咩, 都係唔識睇.
姊夫話呢隻酒唔錯架, 但我未捨得開嚟飲呀!  好唔好飲就未知, 但見到個樽, 我就已經比個like佢啦.
其實呢隻酒嘅價錢同嗰兩枝意大利酒差唔多, 但呢枝外型獨特, 甚為討好. 

2011年4月28日 星期四

Macau 兩天遊 - 有咩戰利品?


2011年4月28日下午4:31公開累積瀏覽 231 1


今次去澳門, 雖然係短短兩日, 唔多唔少都買咗的咩野返嚟...
今次本來都唔打算買的咩野手信, 姨甥幫襯咗鉅記, 家姊幫襯咗咀香園, 我都無諗著買.  點知去到官也街, 見到呢間鋪頭排哂長龍, 咁就走去望吓啦, 晃記百年老號, 未聽過喎.   不過要我排隊我就梗係唔買啦.
點知食完飯無人排隊, 肉切酥, 未聽過, 想買嚟試吓.  點知佢話今日無得賣啦, 明天啦...吓! 唔係阿麻...
問到唔買又唔好意思, 買少少其他試吓啦.  雞仔餅, 合桃酥, 迷你杏仁餅.  返到香港試吓, 雞仔餅... 腍嘅, 鯉魚門新鮮整嗰的好味的喎.  合核酥, 好鬆脆, 但唔知點解好似有少少鹼水味; 迷你杏仁餅, 好一般喎, 唔通淨係賣哂嗰的先係得嘅?  我姨甥話佢買咗嗰隻鮑魚酥都幾好味, 夠鬆脆.
安德魯葡撻, 呢個非常好味
今次收獲以紅酒居多, 上次嚟買過幾支紅酒, 都幾好飲.  但今次嚟搵咗好多超市同賣酒嘅地方都買唔到.  型爸打電話問澳門嘅朋友, 佢帶我地去另一間高級的嘅超市, 都搵唔到.  上次我地買嗰支係ESPORAO 2005, 但係已經無哂, 朋友屋企有支ESPORAO 2006 (最左手面嗰支), 佢送咗比我地.   但超市所見, 全部都係2008 & 2009 新酒.
最終無買到ESPORAO, 買咗其他幾隻葡國酒試吓, 都係買嚟當house wine啫.
見到呢兩樽麻包袋酒, 咁得意, 每樣買支試吓.
個超市經理介紹, 又買咗兩支葡國白酒
另外買咗支Whisky, 價錢好抵喎, 平過香港機場免稅店.
當然唔少得葡國橄欖啦, 以前都未試過買綠色嘅水欖, 因為怕酸或者太鹹, 今次買一樽細嘅嚟試吓.
又忍唔著買咗一礶葡國腸, 上次買過一礶, 覺得頗鹹, 今次買第二隻牌子試吓.
兩日之麻, 已經買咗咁多野, 算唔算收獲豐富......

Macau 兩天遊 - 大三爸 手信街 潘榮記


2011年4月28日下午3:50公開累積瀏覽 221 1


食完竹升麵加甜品, 好夠啦, 我地當散步, 慢慢行去大三巴...
今日假期開始, 真係好多人, 見到咁迫都唔想行
我地係咁意行吓咋, 望到上面咁多人, 都無行上去, 我地離遠影張相, 到此一遊就算啦.
睇吓呢條行上大三巴嘅手信街幾多人, 間間鋪頭買手信嘅員工, 不斷剪的豬肉乾叫我地試, 我地啱啱先食完野, 好飽點會想試吖.  如果肚餓行呢條街, 由街頭試食到街尾, 我諗都飽囉.   咁多人, 真係唔啱我地, 見到都唔想繼續行.
行落嚟先見到有間女媧廟, 路過啫, 無入去.
行上去大三巴時, 經過一間鋪頭有好多人掛隊, 走去睇吓先.  潘榮記, 買咩架, 仲有張紙貼著叫人唔好用閃火燈, 咁即係比人隨時影相啦.
前面好多人排隊睇唔到, 咁走去後面睇吓.
原來係整的類似雞蛋餅嘅野, 唔通好出名嘅, 真係唔知喎, 好飽無咩興趣, 影完相就走啦.
行到好攰啦, 都係四點鐘, 今晚訂咗六點鐘食法國餐. 咁行法都唔係好掂, 唯有去麥當勞坐低飲杯野休息吓啦.  坐咗一陣, 覺得無理由咁傻坐喺道兩個鐘等食飯, 咁我同佢地講不如唔食晚飯, 早的返香港囉.   點知一講, 佢地個個都話好喎.  其實大家都唔想咁樣磨兩個鐘.  咁即時決定走啦.
本來訂咗呢間法國餐廳(係澳門朋友介紹架), 唯有取消booking, 今次緣慳一聚, 下次有機會先再食啦. 
坐的士去碼頭, 攞返的行理, 仲趕得切坐五點鐘船(本來訂咗20:45)...
兩日行程就結束啦....今日行得太多, 好攰呀!
不過綜合一吓, 今次嚟澳門左滕右滕, 好似去咗好多地方食野, 但又無一間是是正正覺得係好好味, 本來對嗰餐法國餐有的期望, 點知最後又cancel....即刻有的驟然若失嘅感覺...

Macau兩天遊 - The House Of Dancing Water 水舞間


2011年4月27日下午2:07公開累積瀏覽 407 0

 
我地訂咗兩個房間, 個packageg包咗四張水舞間嘅門票.
去攞飛時真係有的唔開心, 因為無得揀, 座位已經安排, 仲喺唔係咁好嘅位置.
我地被安排坐嘅位置係C區, 藍色右手面最邊邊嘅位置. 由下而上第四行.  我地問如果online訂飛可唔可以揀位, 嗰位小姐話online booking 都唔可以揀位(係咪真架?) 不過我返公司問同事, 佢話親自去counter 買票係可以揀位, 但online booking 就唔知啦.
不過投資20億嘅show, 點樣都係想睇嘅.
入埸可以影相, 但唔可以用閃光燈
所以好多都係唔夠光, 見有隻mini帆船响黑麻麻嘅海到都影吓啦.
場面都好精彩, 突然响水中升上一隻大船, 位位都係跳水高手
姊夫話個位都好好呀! 平時演唱會最前係最貴嘅, 睇吓! 同的演出者幾近距離...




睇吓個場地時而係水池, 時而係硬地, 變化多端...真係好野...
leaflet嗰張影得幾靚, 我呢張黑麻麻



每個表演者都非常落力, 技巧&力的表現.
表演非常精彩, 值得一睇.  其中故事, 應該係講英雄救美, 但的leaflet並無詳細講鰎解故事內容.
其中一個小插曲係中途有故障, 表演暫停咗5-10分鐘, 不過好快就恢復.
我同家姊都著咗件即棄雨衣, 以防濕身(因為有朋友睇過, 話濕咗身覺得好凍).  我地坐第四行還好, 第一行嗰的真係有水彈上嚟, 見到好多前排觀眾, 攞定大毛巾擋著.  我地淨係有少少雨粉粉咁啫, 型爸同姊夫都話唔使雨衣, it's nothing.