牛蒡紅蘿蔔蜜棗瘦肉湯

2011年6月25日下午2:55公開累積瀏覽 98 0                    

June 19, 2011, Sunday 父親節

 

本來今日無誌諗著煲湯, 實在太多人, 但我執拾檯面的recipe時, 見到有一個牛蒡湯嘅recipe, 簡單又易煲.  今晚咁多個父親, 大部份都有個肚腩, 呢個湯可以消脂降血壓, 增強免疫力, 好啱佢地飲喎. 屋企好似有一大包牛蒡片, 咁就煲呢個湯比各位父親飲啦(當然各母親一樣啱飲)

就係呢個recipe嘞, 上次買湯包, 煲完剪低個包裝說明.  我今次用雙倍份量嚟煲.

屋企有包好大牛蒡片, 用咗150g

蜜棗8粒, 紅蘿蔔2條, 瘦肉(大約斤半至兩斤)

因為要8公升水, 我又係要用呢個大煲.

當晚我都好忙, 焗魚又要焗兩次, 食完飯, 差的唔記得飲個湯.   突然醒起, 真係要尖叫, 即刻裝咗十幾碗出嚟, 的湯已經唔熱變和暖, 啱飲啦.    其實各部屋都好飽, 但係都捧場飲番碗.  好彩佢地都話好味.  Mr & Mrs Kua 每人飲咗兩碗添.  真係多謝哂捧場.  如果唔記得比佢地飲, 咁大煲湯, 我地都唔知要飲幾多日.

不過當晚又係好忙, 又唔記得影相.  唯有crop咗第二日幾餸一湯嗰彋相嚟用啦.  哈哈.

鮮芒果拿破崙

2011年6月24日下午3:33公開累積瀏覽 698 0

June 19, 2011, Sunday 父親節

 

今日攪到自己好忙, 同型爸大公子二公子食完飯返嚟之後都未停過手, 又要煲湯, 又要整珊瑚草甜品, 又要整個cake比型爸賀吓父親節.

 

其實呢個cake應該喺一月份型爸生日時整, 但係嗰時媽媽入咗醫院, 差唔多晚晚放咗工都去醫院睇佢, 型爸生日嗰日, 都係先去醫院睇咗媽媽先出去食飯.  日間無時間(亦都無心情), 晚上食完飯返到屋企其實可以整, 但型爸話好攰啦, 唔好整啦, 第日慢慢整啦. 

一慢就慢咗幾個月, 今日父親節, 都應該有的表示嘅.

 

今日呢個鮮芒果酥皮拿破崙, 我以前未整過, 但型爸鍾意食拿破崙, 我即管試吓整, 不過今日未有信心整型爸想食嗰種, 整個易少少先啦.   我搵唔到一個理想嘅recipe, 睇吓呢睇吓路, 咁就自己試吓呢個超簡易版先啦.

芒果兩個(結果只用了一個)

鮮奶350g, 即溶吉士粉100g

杏仁片小許(用嚟裝飾)

現成急凍酥皮

一塊半(正方型酥皮一分為二, 另外再要多半塊), 變成三塊.
預熱焗爐180c

大約焗20-25分鐘直至金黃色.  本來要在酥皮上刺上小孔, 但係唔記得咗.  焗起漲哂...好鬼攪笑

用350g鮮奶開100g即溶吉士粉

將吉士粉同鮮奶拌勻直至沒有粉粒, 室溫靜止15分鐘, 等的吉士粉吸收的鮮奶, 的吉士漿會變稠.

三塊酥皮焗好待涼

先做第一層, 塗上一層吉士醬, 加上切粒芒果肉, 再加少許吉士醬

加上另一層酥皮, 如是者塗上吉士醬, 加切粒芒果肉, 再加吉士醬.  因為吉士醬預備得太多, 我都加到幾厚.

最後加上第三塊酥皮

我用咗少少芒果肉用嚟做面層裝飾, 再灑上糖霜....咁就得啦.

最後再加上杏仁片做裝飾.

呢個咁細嘅cake(8"x4"), 本來諗著一家人食, 但係整好時已經六點幾, 林老闆嚟到, 又唔係幾好意思淨係幾個人食.... 咁不如等齊人做飯後甜品啦.

最後呢個cake要一開七, 分給七個family一齊食(咦! 好似係8個family喎)

食嘅時候, 底層嘅酥皮有的腍, 可能因為的吉士醬同鮮芒果粒有的濕嘅關係, 但係都幾好味.   大公子又係好捧場, 我地一嚿三個人食, 每人一啖咋.  二公子放棄, 咁我下次再整過啦.

其實我知型爸係鐘意食有果仁同奶油嗰種傳統拿破崙....但我地未搵啱recipe, 等我研究吓先啦.

御八築地慶父親節

2011年6月23日下午3:27公開累積瀏覽 27 2

June 19, 2011, Sunday Afternoon, 父親節

 

我同型爸講, 你就好啦!  父親節兩個仔都話請食飯, 昨晚就大公子, 今早就二公子, 而今晚我會整個cake比佢.  晚餐就會幾個部屋, 幾個父親一齊慶祝父親節. 

母親節時, 我就無咁好彩啦, 大公子不在香港, 二公子就當無野, 型爸話出去食飯, 我又唔想出
去迫.... 不過我都過咗一個輕鬆愉快嘅母親節.
型爸話要開聲同二公子講先有餐食架....

咁型爸問二公子請佢食咩呀? 佢諗咗一陣話食麥當勞啦....哈哈, 型爸話麥當勞都殺.  嘻嘻, 二公子係學生哥, 要用的零用錢嚟請食飯, 佢好鬼"肉尺"架.

當我地出門口問二公子, 係咪去食麥當勞呀?  二公子就話, 麥當勞好熱氣喎(而家卒之知啦...), 咁去邊食呀?  唔知呀?  好咁我決定啦.... 去御八築地啦, 日本野唔熱氣, 仲幾經濟添.   哈哈, 二

公子好似有的為難....使唔使食日本野呀....茶餐廳都得啫... 嘻嘻, 我地唔理佢啦, 一於去御八築地食午餐啦.  大公子都未去過.

去到又幾好彩喎, 唔使等, 即刻有位.  個個都話, 呢的就係母親節同父親節嘅分別.  母親節, 去到邊都係無位.   係喎, 昨晚去Lanciano 都係一去到就有位.
我地先坐低, 型爸去泊車. 我問二公子要叫的咩, 佢話是但啦, 你地決定(哈哈! 佢可能諗著咩野都唔叫)...  我問個waitress今日有無set lunch, 初時有個waitress唔知話比我聽有, 但佢去攞餐牌時, 後尾又話無...咁又係嘅, 始終都係等別日子麻.

我地叫咗一客大嘅蟹籽沙律, 嘩, 真係好大碗,一隻湯麵碗咁大, 我地四個人分

每人都有一飯碗咁多

叫咗八件三文魚海膽卷, 每人二件

芝士年糕兩客, 每人一件...好味

大公子叫嘅海膽炒飯.  嘩! 全部都好飽肚, 我食少少夠啦.

另外叫咗碟十味炸魷魚鬚.  呢個魷魚鬚非常好味喎, 初時見到的炸粉都唔係好like, 但咬落去, 的魷魚鬚爽口彈牙, 同平時响酒樓食嗰的差好遠, 即刻比番個like佢.
本來大公子話想食魚生, 不過型爸話之前响呢道食過魚生都係麻麻地.  下次帶佢去第二道食.   哈哈, 擺到明係幫二公子慳荷包啦...真係識做.
午餐唔食得幾多, 我地都夠啦...埋單.

hk$276, 都好抵食吖. 每人都唔使hk70.

不過對二公子嚟講就係好多錢啦.  咁乖仔, 父親節請哂一家食晏, 咁我仲使咩野呷醋吖.   我又好樂意比錢先, 等佢遲的先比返我啦.  

嘩! 兩個仔咁識做, 型爸冧哂啦.

Lanciano預祝父親節

2011年6月22日下午3:06公開累積瀏覽 16 1

June 18, 2011, Saturday Night

 

今晚唔使煮飯, 明天父親節, 大公子應承請爸爸食一餐.  可惜二公子一早約咗朋友, miss咗呢餐添.

之前大公子唔喺香港, 無同佢嚟過呢間Lanciano, 今日帶佢嚟食吓野.

我地好肚餓呀, 見到的house bread就覺得特吃肚餓...

的麵包醮橄欖油同醋嚟食, 但大公子唔鍾意, 要問佢攞牛油嚟搽.

型爸同大公子都叫咗呢個牛菌湯, full portion, 但我唔敢叫, 如果唔係食完麵包再飲埋湯已經飽哂啦.  我攞隻碗仔, 佢地每人分少少比我就夠啦.

頭盤, 生牛肉芝士羅馬生菜.

頭盤, Cold Cuts & Cheese Platter

頭盤, 兩份煎鵝肝

一塊二公子食, 我同型爸share一塊, 我食三份一塊夠啦.

叫咗一個Pizza Caprese, 呢個pizza超薄身, 幾好味.  配料有車厘茄, 水牛芝, 意大利肉腸&羅勒葉.
我就已經差唔多, 大公子都話有的野落肚啦, 但係型爸話仲想叫牛扒...咁慶祝父親節, 梗係任佢叫啦.

叫咗呢隻個澳洲嘅雪花西冷

嘩! 呢嚿牛扒好得呀! 味道好, 有牛味, 又夠腍身.  不過我已經差唔多, 食少少試吓味夠啦, 等型爸同大公子KO埋佢啦.
食埋嚿牛扒, 大家都好滿足啦!

埋單hk$923.  用恆生咭有九折, 即係唔使加一啦.  價錢都算ok.  我簽咭先, 大公子話遲的撳錢比番我.    嘻嘻! 我梗係樂意啦!  大公子搵到暑期工, 有錢請食飯呢.....

復食日

2011年6月20日下午2:00公開累積瀏覽 73 1

June 16, 2011, Thursday, 復食日

眨吓眼又過了三天斷食日, 今日第四天就係我嘅復食日.

早上起床飲咗一杯杞子圓肉茶, 連圓肉杞子都食埋. 帶咗兩杯什豆粥返公司作為我今天嘅主糧 .

呢杯係我嘅早餐

真係有好多豆架.  不過食嘅時候都分開慢慢食.

下午的同事問我要唔要出去食, 本來都諗著幾日無出去食, 不如同佢地一齊出去食.  但再諗吓已經帶咗粥, 都係留喺公司食埋佢.  出去食亦唔食得幾多, 太肥膩都唔啱我.

呢個紅色杯就係我嘅午餐啦.  都幾好味架.
今日係Yoga day, 放工後去做瑜珈...唉吔! 阿Miss今日好似軍訓咁, 其實我真係無咩野力, 的同覺個個都話好攰, 我地的手碗力同臂力都唔夠, 不過都要死頂.... 卒之捱完啦, 最舒服嗰陣梗係大休息啦.
返到屋企真係好肚餓, 本來晚上都係諗著食什豆粥, 但Ruby另外留咗少少餸比我, 都幾好喎.

有炒椰菜... 嘩! 今日覺得超好味.  另外仲有少少鹹魚肉餅.  哈哈, 平時肉餅唔係好啱我, 但今日覺得好好味.

什豆粥一大碗

今日都有兩餸一粥, 其實仲煲咗冬瓜去濕湯, 但我話唔要啦.  嗰碗粥都係食咗一半, 非常夠啦.

復食日呢三餐, 雖然簡單, 但都算有營養... 哈哈, 非常豐富.