2013年1月31日 星期四

鴛鴦臘腸滑雞煲仔飯


2013年2月2日下午1:45公開累積瀏覽 340 0

 
返到屋企即刻動手啦.
 


唉吔, 唔記得預早响冰櫃攞出嚟先解凍添...唔怕, 先汆水咪得囉.

一杯半米, 洗淨加一杯半水先浸一吓


半隻雞, 用鹽, 薑汁, 紹酒, 早一晚醃定

臘腸汆水


加埋的蔥粒, 齊料


用中火煮滾, 用木勺拌勻, 加蓋煮至飯煙企


我再將的半煮熟嘅米拌勻, 加雞


再加埋鴛鴦臘腸, 加蓋煮至出煙轉細火煮10-15分


嘩, 好香呀!

加蔥粒

用木勺拌勻...真係好香呀.... 熄火, 加蓋再焗一焗, 上檯.


另加一碟蒜蓉少唐萵


今日晚餐


開蓋, 食得.....


的米一粒粒, 但係一的都唔硬... 應該話軟硬適中


係完一碗, 第二碗就要食的飯焦啦....其實唔應該食咁多飯焦, 好熱氣, 但忍唔住, 咬落去脆卜卜, 實在太好味.

食完先發覺差咁的, 今日無湯喎....之先整碗即食翅...但已經食完, 好飽啦...

好味!

2013年1月30日 星期三

東莞佬粥店


2013年1月30日下午1:31公開累積瀏覽 353 0

套餐HK$20一份, 唔怪我之咁多人食啦.


型爸要豬什粥配炒麵


我要碎牛粥配蝦米腸粉


另外型爸再叫多一份炸兩

我地真係唔知的野咁大碟....


仲有豆漿送


埋單都只係HK$51, 但係我兩個已經食到好飽.

講真, 呢的都係粗野, 好普通, 全部都係澱粉質食物(我地細個都係食呢的架啦), 的碎牛粥仲有的韌, 但係咁嘅價錢, 想點呀!

最好嘅就係無落師傅, 的粥偏淡, 有樽鹽喺檯, 嫌淡可以自己加鹽, 一落的鹽, 吊起的味就已經ok.  食完唔需要狂飲水.

我諗久唔久都會嚟食吓.

2013年1月29日 星期二

流浮山球記食海鮮與型爸慶生

流浮山球記食海鮮與型爸慶生
2013年1月29日下午12:46公開累積瀏覽 667 0

我地今次幫襯球記呀!  呢道廚師蒸魚, 每次麵蒸到啱啱好.
花生喬頭


豉椒炒蟶子


椒鹽瀨尿蝦


蒜蓉粉絲蒸扇貝


酥炸生蠔...的粉醬好鬆, 炸得璧脆, 好味喎!


想食蘇鼠班, 點知無, 要咗條杉班... 條魚真係蒸得啱啱好, 每次嚟食, 的魚都係蒸到無得彈


白勺菜心


蝦醬炒飯


好濃嘅芥菜芫茜豆腐花蛤魚湯....好味!


送生果

六餸一飯一湯, 好夠呀!  大家食得好開心!

哈哈, 嚟食海鮮仲教煮餸呀!   我去洗手間時, 見到廚師問佢的炸蠔粉點可以整到咁鬆脆, 哈哈, 佢教我用麵粉加發粉加水加生油

一斤麵粉+2滿茶匙發粉+四兩生油+水(水的份量就要自己估啦).... 但係呢個份量我地係整唔到架, 邊有可能整咁多粉漿吖.
個廚帥仲好好人, 佢話唔好隨便買發粉, 佢嗰隻係美國牌子, 要百幾蚊一礶.  佢仲包咗的比我試呀!

下次就輪到我自己整酥炸生蠔啦.

2013年1月27日 星期日

公司Annaul Party


2013年1月27日下午2:07公開累積瀏覽 371 1

12枝白酒, 幾打啤酒, 仲有好多瓶中式白酒(度數好高嗰的呀!)


幾打可樂


好多同事都係幾個杯, 一杯香酒一杯啤酒, 跟著又紅酒..


仲有呢的小杯係飲中式白酒呀!

我只係飲咗少少白酒, 我係並中一個司儀, 唔可以飲太多呀! 

勁呀!  未開始食晚餐, 已經飲咗一半紅酒...


一開始食乳豬, 我都唔客氣食咗三件, 因為一陣間就無得食啦.

鮑魚嚟到食番隻先啦.


加拿大蟹伊麵. 食咗一隻蟹腳


翅嚟食咗兩啖, 就要開始遊戲啦....

我地玩咗6個遊戲, 抽咗31份獎, 又要晚上九時前完成, 真係非常緊湊.... 同事門都十分投入, 要控制埸面, 攪到我聲嘶力竭....大家都好開心.
呢的餸係中場時影嘅... 我都無機會夾餸


呢的係咩都唔知, 有得影無得食
魚嚟啦, 不過我都只係望一眼
同事留咗一隻蝦, 少少魚比我

我無機會食嘅雞
菜都無食過, 炒飯都無掂過.
 

生果都無食過

甜品, 臨走時食咗一嚿紅棗糕

走時上到旅遊巴, 真係腰酸背痛, 由三點幾企到九點(只係間中坐吓), 真係好攰呀!   不過我地個個都好開心好興奮呀!

仲有, 五號屋好幸運, 抽到獎呀!

晚上返到屋企, 哼, 型爸仲未返.   Loki就飛撲埋嚟.... 梳洗上床, 腰酸背痛, 成個散哂, 真的不復當年勇呢!   好攰但係瞓唔著, 可能今天實在太興奮啦.