2014年6月30日 星期一

好e食即食意粉 + 焗雞翼

Jun 25, 2014, Wednesday Night

今日下午四點幾, Ruby打電話嚟, 話好唔舒服, 又痾又嘔.  咁我問佢要唔要去睇醫生, 佢點都話唔去, 食咗的印尼藥.  佢話瞓覺就得啦.  咁我叫鄰居的印傭姐姐照顧吓佢.

我叫佢唔使煮飯啦, 快的休息吓啦.

放工返到屋企見到Ruby真係好辛苦, 勸佢去睇醫生, 都係唔肯去, 真係唔知的工人姐姐個腦諗的咩, 但又無得迫.   問佢食唔食粥, 煲的白粥比佢食, 佢又話唔食.  佢話食咗藥好的, 淨係瞓就得.

响廚房見佢已經醃緊的雞翼, 咦, 唔得喎, 明天佢放假我地會出去食, 的雞翼醃幾日會好鹹, 都係要焗咗佢.  型爸出差, 今日只得我同二公子.   二公子話唔想出去食, 焗雞翼食意粉啦, 雪櫃有即食意粉, 一叮就得....

我同佢講, 阿仔, 好似唔係好啱key喎. 呢的係孜然雞翼, 配意粉, 九唔搭八, 怪怪地喎, 但佢話當試新口味, 唔試點知搭唔搭.又好,求其一餐啦.

呢的好e食意粉, 係我買家响屋企比二公子做小食, 佢有時用嚟宵夜.

我平時跟本唔會食.

叮了4分鐘, 卡邦尼意粉, 淡淡地, 的麵好腍.

茄汁鮮蝦闊條麵, 又係淡淡地的麵好腍.

我同二公子的晚餐

呢的意粉, 唔係好啱我心水, 食完都係覺得雞翼配意粉唔係好夾.  阿仔話是但啦,  呢的即食意粉係咁上下, 我都唔好咁奄尖啦.

以前二公子鍾意食波仔飯, 但近來唔見有波仔飯賣, 以前有專門店, 超市都有, 而家唔見哂, 唔通"摺"咗?

2014年6月29日 星期日

I. Cafe - 有驚喜

Jun 24, 2014, Tuesday afternoon

的午市食肆, 越試越少, 好似間黑森林之焗, 的水準開始保持唔到, 呢排又少去咗.

呢間I. Cafe, 上星期先去過, 但麻煩鬼同事今日又話想encore....

哈哈, 係估佢為咗咩...

係為咗呢杯紅豆冰呀! 佢話好好味, 食完飯, 飲品好似甜品咁.

 
我地今日四個人, 麻煩鬼同事要了豬柳意粉 HK$50, 點知豬柳賣哂, 改豬扒, 佢話都幾好味, 的蒜蓉汁整得唔錯. 

 
慢麼麼同事唔鐘意食太腍嘅意粉, 要了豬扒飯.

我同另一位同事就要試新野, 迷你海鮮pizza跟薯角HK$48, 有驚喜, 唔錯呀, 的薯角新鮮熱辣炸出嚟, 好味呀!

 
另外再叫了火腿意大利包配沙律HK$48, 大家share嚟食.  呢份都一樣好味.

見到麻煩鬼同事食紅豆冰咁滋味, 我地都忍唔著要啦.   都只係加HK$8.  飲咖啡都要加HK$3, 咁多HK$5咪當係甜品囉. 又真係幾好味, 下面係紅豆, 上面全都係花奶呀!

不過食完真係好似開心的喎.  哈哈, 咁就物有所值啦.

2014年6月28日 星期六

D' Orgine - 失望篇

June 23, 2014, Monday afternoon

上次去Food Gallery入面嗰間西餐廳, 食過都好似ok, 咁就梗係再去試吓, 不過今次有的失望呀!

呢間Cafe, 睇個名, 我之前以為係L' Origine Cafe, 原來唔係.

睇個光管牌, 原來係D'origine, 吓, 個英文草書寫法係D咩.


餐牌無改, 都係嗰幾款 (呢個就係問題), 上次試咗什腸意粉, 今次要了牛柳粒意粉


今日只有我跟慢麼麼同事, 大家都要了同一款HK$48


 
我就加HK$10要了一碟什菜沙律

賣相都唔咗. 但green 沙律食落麻麻.  但碟牛柳粒意粉就好有問題. 

意粉醬汁都ok, 但的牛柳粒又粗又嚡, 一的肉味都無, 似係煲完湯的湯渣.

我曾經問過收銀小姐, 餐湯係咩野, 佢話通常都係羅宋湯(只得一款, 無其他選擇).   我即時聯想到的牛肉用嚟煲完湯再拎番出嚟炆.

雖然唔知係唔係, 但的牛肉粒整成咁,即時打哂折扣, 有排都唔會再試.

咁又唔會唔幫襯food court, 下次試第二間囉.




2014年6月27日 星期五

簡單就是好

June 22, 2014, Sunday Night

通常一比一嘅時候, 通常都會係我贏....  哈哈, 唔係講波呀!

今晚只得我地兩個食晚飯, 型爸話不如出街食. 食西餐据扒啦.   吓, 上星期日响屋企都食咗和牛啦,今早又食咗黑松露醬汁意粉, 又要食西餐. 咁不如去食海鮮吖, 兩個人去食海鮮, 叫得的咩呀!

其實佢昨天已經話打邊爐, 我又bend咗佢啦.   今日都係唔想出街食, 兩個人喺屋企, 簡簡單單食餐晚飯咪算囉.

型爸咁多提議,都係怕我辛苦, 唔想我成日要煮煮煮.   但有時寧願食屋企的家常小菜都唔想出去食呀!

蒜蓉辣椒粉絲蒸黃花

 
蝦醬通菜


魚肉煎蛋

紫菜肉丸蛋花湯

 
兩個人, 三餸一湯, 好豐富啦.

型爸一樣食得開心, 其實佢都讚成簡單就是好啦.

2014年6月26日 星期四

黑松露醬煙肉辣腸意大利麵

Jun 22, 2014, Sunday afternoon

昨晚行雷閃電, 狂風爆雨, 真犀利, 落雨都落呎一朝.

今日二公子返中班, 可以一齊食晏, 型爸話不如出去食啦, 但二公子話要响屋企食.佢話整意粉啦, 最好係有黑松露嗰種白汁啦.

哈哈, 阿仔你真係當阿媽咩都有, 不過又比佢估中, 我穴係買咗一瓶黑松露醬, 返而配料就要睇吓落的乜.

 
 上次開咗一盒Capellini, 仲剩咗一半.

  
 今次煮埋佢就啱啱好啦.   用水煮3分鐘, 熄火焗4 分鐘

 
 打開雪櫃有包煙肉

 
 仲有芝士腸同辣腸, 每款都剩兩條, 快的食埋佢.

 
 今日就用呢的嚟整醬汁.  快靚正.

 
 三爐齊開, 好快有我食.

 
平底鑊唔使落油, 中慢火兩面煎香, 迫的油出嚟.  睇吓, 真係煎得好靚架.

  
 煎完煙肉嘅油就用嚟爆吓的腸

  
 另一邊廂就用大半杯奶煮滾一礶湯, 再加1.5湯匙黑松露醬.

 
 煮好的意大利幼麵撈好上碟, 用橄欖油撈勻, 加入醬汁

 再加入煎好的煙肉及腸

 每人一杯蘆薈小麥草

 我們一家人的午餐

的醬汁我無落鹽, 因為煙肉同腸都偏鹹, 配淡少少嘅醬汁就啱啱好啦.


2014年6月25日 星期三

阿活下午茶

Jun 21, 2014, Saturday

食完煎餃, 無咩野好做, 同型爸去行Ikea, 上次買咗三棵發財樹加三個花盆, 今日Mrs. Kua送咗兩盆茶花一盆米仔蘭, 去買多幾個花盆返嚟.   我喜歡嗰道的花盆, 簡簡單單, 啱心水呀!

平時買完, 都會去幫襯吓佢地的熱狗, 真係平到離哂譜, HK$7一隻, 但人太多, 見到都唔想幫襯.  再加上買咗都要企喺道食, 型爸話不如去大快活啦, 就喺隔離, 搵到位有得坐, 食都食得舒服的啦.   咁又係.

平時返工, 沒有機會飲下午茶, 趁星期六, 食少少等自已開心的.


大快活, 真係幾年都無幫襯過, 可能佢地開嘅點, 我都比較少去.  我影塊鏡, 影出嚟大快活就掉轉咗呀.

我地覺得的下午茶餐好平呀!  隔離檯嗰位女士要咗迷你义燒飯加碗仔翅, 都只係HK$26, 當午餐都夠呀.

型爸要了豬扒包+奶茶, HK$23

杯奶茶唔錯呀! 不過塊豬扒就細塊的味道一般.  嘉龍的豬扒包好味的, 不過嘉龍個下午茶餐要HK$28呢!

 
我就到了紅豆冰配西多士, HK$22.  食呢個餐好有懷舊feel呀.  N年前讀中學時, 放學就同同學去蘭香室食雪糕紅荳冰加西多士....真係好正呀!

 
 不過呢杯紅荳冰無雪糕呀!

 
西多的煎炸得好靚.


佢地用鍊奶代替糖漿, 都ok架.

同型爸share嚟食, 呢份西多就變甜品啦.

食完仲要去買花泥, 返去要攪吓的植物呀!

今晚可以夜的先食飯.


2014年6月24日 星期二

煎餃午餐

Jun 21, 2014, Saturday

星期六, 又開始落雨.  好似無咩心機煮野食.  今日二公子返早班, 午餐只得我同型爸食.  打開雪櫃, 咦, 上次响一田買咗三包餃子, 二公子食咗一包, 仲有兩包, 快的食埋佢都好喎.

 
今次買呢兩款餃子, 寫著多菜, 即係少肉啦.

 
青菜香菇

  
栗米西芹, 二公子之前食過一包, 佢話見到就話唔鍾意, 有栗米唔啱食, 佢唔啱食就我地食啦.

  
一次過煎哂兩包, 自家食都唔使整個麵粉網底啦.

  
今次買了呢款菊花蜜, 唔甜, 都幾好僕架.

我同型爸的午餐.   講真, 都係西洋菜豬肉式或韮菜豬肉好味的.

不過唔試過又點知好唔好食呢!