新森林之焗

July 24, 2014, Thursday

明天開始放假, 豆豆媽咪話同我地一齊出去食午飯.  呢排佢成日都唔舒服, 今日佢心情同胃口都好, 希望佢食多的啦.

我地都唔知去邊道食好, 先去I Cafe睇吓, 嘩, 要等4-5張檯, 唔等啦. 

 跟著行去寶勒巷, 諗著食日本野, 咦, 經過新森林之焗....好耐無食過, 一去到啱啱有位, 咁就呢間啦.

豆豆媽咪睇完話啱食,  哈哈, 咁就得啦.


佢要了吞拿魚雞扒意粉


加HK$4 要了羅宋湯牛角包

 慢麼麼同事要了雞扒豬扒飯

 
 麻煩鬼同事要了雞扒豬扒薯菜

 我要了脆豬湯麵餐, 點知送到嚟係公仔麵, 以為係生麵添

 不過我鍾意呢個奶油豬呢!

 每人一杯飲品.本來個個都話加HK$5要紅豆冰, 點知又話無喎.

四份餐, 我嗰份至抵, HK$36, 因為我咩都無加呀!

阿坤新加坡咖啡館

July 22, 2014, Tuesday

阿坤最近在尖沙咀開咗間分店, 近漆咸道寶勒巷轉角位.   六月初開鋪, 最初嗰個月, 每次經過都人山人海, 見到好多人排隊, 鋪入面又塞滿哂人, 都幾混亂.   本來想試下, 但絕對唔會浪費時間去想排.  午膳時間只得一小時咁珍貴, 無謂花在排隊上.   但近幾次, 見到外面排隊條龍越嚟越短, 入面排隊買野嘅人亦少咗好多. 

今日經過, 見到門口無人排隊, 我地又唔知食咩好, 見到我地排第一, 但只係等一張, 咁就等吓啦.

等候時, 侍應比張單張我地睇, 可以先睇叫啱食物, 到有位時, 就可以立即去收銀處買, 慳番的時間.    單張上有呢張相, 唔知係咪新加坡店張相呢?

我本來想要一份沙律, 再要一份咖椰多士, 點知佢地話無沙律, 麻煩鬼同事想要意大利咖啡, 佢地又話部機壞咗.....哈哈, 開張無耐就攪到咁.

最後我要了一碗咖哩雞麵.  咖哩雞係用雞全翼, 一碗有兩度隻. 的麵係用油麵.  的咖哩汁味道幾好, 但係的雞翼一的味都無, 的肉又嚡

  
麻煩鬼同事要了喇沙蝦湯米粉, 佢話個喇沙汁都好好味, 哈哈, 只得兩隻小蝦, 不過都係爽嘅.

 

佢本來想要意大利咖啡, 但無, 轉叫了新加坡拉茶.  咁我想要咖椰多士.  售票員話買套餐有著數.  一杯拉茶HK$28, 一件咖椰多士HK$18, 加埋都要HK$46, 但套餐有飲品, 咖椰多士, 加兩隻半生熟蛋. 都只係HK$45, 即係送兩隻蛋仲平多一文.   咁麻煩鬼梗係要套餐啦.

呢道嘅咖椰多士,  麵包片到好薄, 入面搽的咖椰醬, 夾埋.

不過都唔係放咗好耐, 只不過食完碗麵先食件多士...已經唔脆啦.  咬落咖椰味都唔出.

要掀開件多士, 先見到真係有咖椰醬....呢件多士真係名不附實.


同單張上嘅相真係差好遠呀!

慢麼麼同事要了新加坡雞飯.   的飯就一大碗, 但的雞得幾嚿. 雞肉仲嚡烚烚, 一的味都無.

佢要了蒸咖椰麵包, 我同佢各share一塊, 蒸包真係好食過的咖椰多士.

麵包鬆軟, 的醬睇落都好多的.  不過食落鹹鹹地, 可能係牛油的關係

 
呢兩張單係我同麻煩鬼同事的. 

我要的咖哩雞麵HK$42 +HK$18咖椰多士 =HK$60
麻煩鬼要了喇沙蝦米粉HK$42 + HK$27拉茶烚蛋 = HK$69

 

呢張單係慢麼麼同事的.  新加坡雞飯HK$48 + HK$18蒸咖椰包 = HK$66

我同慢麼麼同事都無要飲品, 呢道的飲品要二十幾文一杯, 加埋飲品要八十幾文呀!

食完呢餐, 我諗我地第二時經過, 都只會係過客, 完全唔覺得有邊一樣係"必吃"item. 唔怪得之越嚟越少人啦, 的食物唔維持吓的質數, 點留客呀!

哈哈, 不過唔試又點知吖, 食過又覺得喺港晶中心地下嗰間新加坡餐廳, 無論價錢同味道都比呢道好.

食完去銀行辦點事, 同嗰位officer傾開, 佢話上次三個人去食, 食咗二百幾文, 的野又唔好食又貴, 的雞又無味, 下次都唔會去嘞.   哈哈, 有名但無口碑, 點算?

咁啱晚上同型爸傾開謁, 佢話佢昨日大約三點都去咗阿坤, 都無諗著當下午茶.   要咗喇沙米粉加一杯飲品 HK$70.   佢話個喇湯湯底做得幾好, 的配料就麻麻.   最差係的員工服務態度.   

哈哈, 咁咪好似我要咖哩雞咁, 的咖哩汁幾好但的雞就真係麻麻啦.

青瓜涼拌黑木耳

July 19, 2014, Sunday

熱熱熱, 熱到唔願郁, 但係都係要郁.

天口熱, 我今日又要整涼拌菜

呢幾個星期, 不斷都用青瓜做涼拌菜, 麻醬青瓜, 涼拌青瓜手撕雞, 鹽麴青瓜... 無他, 青瓜又平又好食. 大熱天時, 咬落去清涼爽口好味.

今日都唔例外, 一樣用青瓜, 但係只用一條就夠啦, 要嚟做配菜


主要係黑木耳.   今次呢的黑木耳係自己浸, 浸好發開, 就煲十幾二十分鐘.  跟著再沖過濾水, 瀝乾.  再放入雪櫃.

 
 跟著就調個汁.   其實我都好隨意, 用鎮江醋, 豆瓣醬, 麻油, 糖, 蒸蓉

味道就要試啦, 每個人有唔同嘅喜好, 鐘意食辣咪落的辣椒油囉. 試到啱口味就得啦.

跟著將的醬汁倒落的黑木耳青瓜, 拌勻就得.  再放入雪櫃, 食飯先攞出嚟. 加的青瓜拌黑木耳, 唔使淨係黑木耳咁單調.

今晚的餸都ok架.

炒蛋

洋蔥炒牛肉

雞髀菇炒韮菜花

南北杏雪耳蘋果湯

再加埋個涼拌菜, 今餐都算係多菜少肉呀!

白菜湯水餃

July 19, 2014, Sunday

天氣真係好熱, 呢排早上都唔敢帶Loki出去行, 怕行傷佢的腳掌.  個地下曬得咁高溫, 我地就有著鞋, 但Loki無.  唯有夜的六點幾, 收哂太陽先同佢出去.

去開街就會响外面食, 但喺屋企, 真係唔願出去, 下午簡單的, 食咩都得.

呢排型爸要食水餃, 天氣熱, 我唔想包呀.  最簡單就係幫襯藏姑娘.  急凍放响冰櫃, 幾時食都得啦.   買咗幾款口味, 型爸想食邊款都得.

 

 今日要食湯餃, 我最喜歡配白菜.

 

將的白菜焯到腍一腍,  鹽油都無咩點落, 但的菜十分好味.

型爸指定要食二十隻, 我諗二公子要十五隻就夠, 我食十隻好啦.

今日飲品, 王老吉, 呢枝咁大枝1.5升, 响國內大型超市買架.  

白菜配湯水餃

加埋杯飲品就係我地星期六午餐.

真係快靚正.

十勝豚丼- 大埔超級城

July 19, 2014, Saturday afternoon

星期六, 出去買野兼食晏. 

型爸話想去一田買火雞肉, 想食火雞肉三文治.  咁就去買啦.

呢個大埔超級城真係人多得緊要, 我地去到, 就近B C 區三四個停車場, 全部滿座, 掛哂隊得泊車.   我地諗都唔諗啦, 即去D 區嘅多層停車埸, 寧願行遠的啦.

去到差唔多一點, 都係食晏先, 唔係一陣仲多人.

 今次試吓呢間十勝豚丼.  以前尖東港晶中心地下有分店, 我地久唔久都會去幫襯, 後來搬咗去漆咸就, 跟著無幾耐就關門大吉.  

但呢間大埔超級城店, 好似開咗好耐, 今次就試吓啦.

 
 呢道一樣有個大牌, 豚出沒注意.

 型爸要了七味牛肉飯套餐HK$45

 我要了豬肩胛配火地丸獄汁套餐HK$45

 

 好想重溫以前尖東嗰間的味道, 但係好失望, 的辣豉油汁唔夠辣, 味道調得無咁好.   而豬肩胛都薄咗好多.   咁薄的唔緊要, 都明白將貨就價, 但味道就真係無咁好味.

 

加HK$3有飲品一杯. 型爸要了凍奶茶, 我要了柚子蜜.

埋單HK$96, 一百文唔使找.