五號屋的部落: 11月 2014

2014年11月30日星期日

行山

November 16, 2014, Sunday

數數手指有幾多年未行過山, 今日膽粗粗, 陪型爸同佢的朋友一齊行山.

型爸的朋友約過好多次, 上次應承了, 點知當日有雨, 覺得山路滑有危險, 無去到. 佢地同一條路, 行咗四個幾鐘, 咁我諗同打goft差唔多, walking course 打十八個洞, 都要四個鐘啦. 我應該應付到. 今日秋高氣爽, 一於成行.

人數唔多, 我同型爸, 一對夫婦, 另外一個爸爸帶著五歲的兒子....五歲都得, 無理由我唔得. (哈哈, 都係佢爸爸好得, 抱著佢一樣行得快過我地好多)

我地大約十點十二分開始由荃灣港安醫院對面條小徑開始行(今次目標係由荃灣行到深井)

嘩! 救命, 一開始就係上山, 我都唔知有幾多級石級, 行二十幾三十級我就已經索哂氣, 已經要抖一抖.

行咗成個鐘先到咗一個休息點(當中我都唔知休息咗幾多次).

另一對夫婦, 太太今天狀態不好, 行到想嘔(上次佢行過都支持到), 結果唔可以繼續行, 原路回頭落山.

其實我都覺得好辛苦, 但又唔想半途放棄, 繼續行落去. 趁呢個時間影吓相, 的高樓大廈已經變得細咗好多.

抖完行出去, 嘩,行完石級, 現在要開始爬山

我地要行去田夫仔方向, 睇標示, 仲有兩個半小時.

初時以為落山, 好開心啦....點知呢道落完, 又要上山.

行咗兩個幾鐘, 先真正上到山頂. 見到好多人响上面開餐. 當時已經係正午十二點幾. 我同型爸大安主意, 每人只係帶了兩瓶水, 無帶食物補充體力. 那位好勁的爸爸好有準備, 一個大個背包, 水, 葡萄適...食物盒, 朱古力, 餅乾, 零食.

佢負擔真係好重, 小朋友行一陣又要抱, 預備了前背帶, 後面又一個背包. 但佢負重仲行得快過我同型爸.

呢道可以睇到青馬大橋呀!

好囉, 仲有半小時可以到田夫仔...不過呢段路真係好難行, 人地話上山容易落山難(對我嚟講, 上山都好難), 行石級下山, 的關節(膝蓋及盤骨)好似震到鬆哂咁.

卒之行到田夫仔另一個轉接點啦. 呢道有兩條路, 一條去深井, 一條去青龍頭

由清快塘村去深井, 大概要一個小時(寫著45分鐘, 但真係唔得架)

呢個清快塘村有小食店, 型爸問我要唔要食野, 諗吓一陣約咗去食燒鵝, 都係唔食啦.見到的河塘幾靚, 影吓相啦.

仲有柑樹

當我影呢邊河塘時, 聽到好多人大聲講拜拜, 都不以為言.

跟著有幾位人士在我身邊擦身面過. 跟著聽到伯伯問那位先生貴姓, 聽到那位先生講, 我姓周呀! 我舉頭望一眼, 原來係周潤發, 怪不得之剛剛有咁多人起哄同佢拜拜. 佢同伯伯講咗兩句之後就快步向青龍頭方向行去. 發哥瘦咗好多, 真係又黑又瘦, 瘦了無可避免眼有魚尾紋.

見到發哥, 精神為之一. 快的行去深井食燒鵝啦.

快啦快啦, 見到隧道口啦...

的高樓大廈越來越近...

卒之到深井啦...已經經差唔多三點....足足行咗四個鐘頭四十分鐘.....超慢呀!

其實可以行到呢道, 真係靠意志力去行, 體力真的沒有了, 雙腳發軟.

一行出嚟就見到裕記, 本來唔想去裕記, 而去陳記, 但真係唔想再行, 好需要坐低, 即入去搵位坐...估唔到呢個時段都有好多客, 大都是行完山嚟食燒鵝.

咩都唔理, 先叫半隻燒鵝, 再睇吓, 不如叫個四人餐 (另一位朋友有腳傷, 唔行山,不過嚟食飯). 呢道的燒鵝真係唔得, 的皮唔脆, 韌嘅, 下次真係唔會再嚟.

餐包一盒飲品

蝦球貴紀蚌西蘭花

鮑魚菇掌翼

韮王瑤柱羹

清蒸海斑

行到又餓又攰, 食完坐咗個幾鐘先走.

呢餐我地埋單, HK$890. 我地要多謝那強爸爸在山頂時送了兩塊朱古力給我們補充體力呀!

我地仲要趕返屋企, 今晚又約咗林老闆同八號屋食煲仔飯.

其實我好攰, 但應承了煮都係要煮...不過攰到咩都唔記得影啦.

今日好攰, 但雙腿仲未痛, 通常行完, 小腿起碼要痛幾日呀!

2014年11月29日星期六

讚美總比責罵好!

November 14, 2014, Friday Night

Cindy的工作水準有的失魂, 無論係清潔或煮食, 好多時都令我愕然. 當然我會指出佢嘅錯誤, 但為咗大家保持良好關係, 通常只有讚佢, 從無鬧佢. 當我指出佢嘅錯誤, 要即時跟手做一次比佢睇, 其實佢都係聰明人, 下次會知道點做.

不過有一樣就係好難改善, 我一定要忍得....慢....佢地做事係會慢幾拍, 煮食又係會慢幾拍, 唔可以幾爐齊開, 所以佢煮完飯, 一定有一兩碟已經變凍, 呢樣一定要接受. 連食飯佢都係慢慢食. 咁我又無所謂, 辛苦搵嚟自在食.

佢煮得好味, 我地即時讚佢.

上次佢煮咖哩雞煮得幾好味, 我地讚佢, 好快佢又再煮.

炒白菜前已經識得焯軟的菜再炒, 咁樣的菜唔使炒咁耐, 仲係青綠色

煎魚亦都無問題

一份花膠猴頭菇湯包, 叫佢加嚿瘦肉煲兩個小時就得.

每餐有魚有肉有菜, 呢的就係比佢嘅煮食概念. 咁我收貨架啦.

November 15, 2014, Saturday

當讚完佢, 佢開心就變得更有動力. 哈哈, 今日又煮一樣新餸....

我買咗的農家蛋, 佢話可以用嚟煮咖哩, 咁我叫佢照煮啦. 呢碟係咖哩什菜蛋, 無肉架. 入面有蕃茄, 薯仔, 茄子, 秋葵 & 雞蛋. 幾好味呀!

呢一碟係我叫佢炒, 洋蔥青樣, 雞髀菇炒牛肉

最簡單的炒西生菜.

呢個湯係响維康買的湯包, 唔使諗, 雪耳木瓜湯.

呢餐都算係咁啦.

November 20, 2014, Saturday

佢開始駕輕就熟, 不過我諗佢麻麻地鍾意食魚. 我吩咐每餐應有菜魚肉湯, 但通常都係菜菜肉湯.

蒜蓉蒸茄子屬菜

炒西蘭花又係菜

豆卜蒸排骨

啊, 三文魚骨腩秋葵豆腐湯都算有魚啦.

呢三餸一湯ok呀! 嘻嘻, 我都算教得好啩!

工人姐姐肯用腦煮新餸, 即係話佢個心喺道啦.

我以前都算係有的脾條嘅人, 隨著年齡成長, 現在盡量都唔會發脾氣或發忟憎. 讚美總比責罵好, 工人姐姐要完成一個contract最少在我家留兩年, 如果成日鬧佢, 佢唔開心我亦都唔會開心, 咁為咩呢? 嘻嘻, 我都唔鐘意我老闆鬧我啦.