Whisky - 家中新成員

August 22, 2015, Saturday

昨天同事下午sent咗張狗仔相嚟, 佢朋友响一間動物拯救中心做義工, 話啱啱收留咗幾隻幼犬, 其中兩隻係Husky幼犬, 只有4個月大.  我即時forwad張相比型爸, 佢梗係有興趣啦, 佢想養多隻好耐, 今次仲有兩隻, 好開心, 梗係想去睇.

 再講講吓, 原來係LAP.  佢地响荃灣開咗個centre.   昨晚型爸唔得閒, 即時去唔到, 但我先在網上填咗adpotion form, 再約今天去, 帶埋Loki, 睇吓Loki適唔適應同其他狗狗一齊玩.

我家Loki以前都係响LAP收養返嚟, 只不過當時我地去Lamma Island個foster house 見隻狗.  當時Loki的毛枯枯黃黃, 瘦到排骨咁, 我地都決定收養佢.   哈哈, 而家Loki就梗係靚仔又神氣啦.

今日一去到centre, 好多人, 啱啱開緊義工訓練班.   當時有好幾隻狗仔, 但我地嘅視線就去咗兩隻白毛毛身上.

睇吓呢兩隻狗仔幾可愛, 嗰樣真係好BB喎, .  佢地話漁農處報呢兩隻6個月大, 但以佢地經驗, 狗仔的牙好細, 應該只有4個月大.

呢隻係BB囝, 掛咗黑色胸帶嘅BB囡.  囝囝好活躍, 囡囡比較靜.

我地在中心逗留了兩個鐘, Loki都有同的狗加玩, 我仲跟埋的義工, 帶埋其他狗出去dog walk.

點知在我地出去期間, 有一對couple已經收養了囡囡, 真係估唔到佢地咁快.

無法啦, 我地本來諗著兩隻都要, 但天意叫我地只收養多一隻...

呢, 就係咁帶咗佢返屋企啦... 我地幫佢改咗個名叫Whisky....哈哈, 點解, 因為型爸係Whisky lover囉.  佢同Loki都似樣, 只係耳仔大的, 鼻仔大的, 毛色唔一樣.

响中心Loki都有同的狗狗玩,  但由我地開車返嚟, 佢見我抱著Whisky,上車, 個樣都有的唔開心, 返到屋企, 我地唔敢帶Whisky先入屋.  攞咗狗繩, 先帶佢地一齊在屋苑行吓, 先一齊入屋.

到Whisky入到屋同圍貢, Loki真係嗱口嗱面, 一睇就知唔開心.  到我地叫佢, 佢都唔係好理睬.   我地去攬著佢錫佢, 隻小狗唔識眉頭眼額又貢埋嚟, Loki即刻呷醋 "糊" 佢.   我地馬上分開佢地...


上到房, Loki又瞓响按摩椅背後, 唔睬我地, 叫都唔應呀!  玩自閉呀!

唉吔, 今勻麻煩啦, 需要輔導呀.

Loki, 唔好小氣啦, 我地點會唔錫你...我地養多一隻, 希望佢地有伴可以玩, 唔使咁悶啫.  帶咗返嚟就要做好兄弟, 唔可以咁架.

灣仔碼頭寬葉韮菜煎餃

August 21, 2015, Friday Night

星期五Cindy放假, 型爸約咗客人食飯, 晚上就只有我跟二公子.

兩個人簡單的啦.  

呢排電視成日賣廣告, 灣仔碼頭出咗隻煎餃.  五號屋最鍾意試新野, 超市promotion (好似係HK$19.90一包), 咁買嚟試吓.

的煎餃比平時嘅水餃, 睇起上嚟大隻的, 一盒只得15隻. 

呢款煎餃嘅賣點....寬葉韮菜....吓, 同平時買的韮菜有的咩野唔同呀!

二公子鍾意食煎餃, 我問佢15隻夠唔夠, 佢話煎多的啦.  

哈哈, 我只得兩包, 煎多的梗係得啦.   兩包共三十隻, 佢食二十隻, 我食十隻咪得囉...

橫掂個煎pan一鍋都放唔哂三十隻煎餃, 咁我先煎咗比二公子食先.  我再煎比自己食....做阿媽係咁架啦.

 

真係要講講的煎餃, 味道都ok,  隻餃係大過的水餃, 但餡料少的喎, 睇吓隻餃咬開幾的餡幾"鬆洞).   相比起的水餃的餡包得實淨的喎.

煎餃HK$19.9 十五隻, 平均HK$1.33 一隻煎餃.   而家庭裝一包HK$46.9有四十隻, 平均HK$1.17一隻.   如果的餡料差唔多, 只係外皮大咗,  咁家庭裝抵食的喎.  以前未出煎餃, 我都係用水餃煎嚟食架啦.

下次再買家庭裝韮菜豬肉水餃, 跟著再買一盒呢款寬葉韮菜煎餃, 一齊煎再比拼一下, 睇吓味道有咩分別, 邊款抵食的先得.

尖東好彩酒家

August 21, 2015, Friday

上星期舊秘書小組打電話嚟約我食飯, 諗著同我慶祝生日.  但因為連續幾天約咗朋友, 延到今天先同佢食.

 
秘書小姐話好彩的點心幾好食, 佢訂位. 約埋慢麼麼同麻煩鬼.   點知麻煩鬼突然要上大陸, 咁我地三個食啦.

 

舊秘書小姐點菜... 今日點得非常好, 都係以2.5嘅原則

我地三個人, 3 x 2.5 = 7.5.   即係唔好叫多過八樣野.

呢道的點心真係幾好食, 咁當然就貴的啦....埋單HK$337.

只實我今日食咩都無所謂, 最重要係佢有心....仲帶埋B囡出嚟.

 唔覺唔覺, B囡己經6個幾月大, 識自己坐.  佢好得意呀.   食母乳, 肥嘟嘟, 有米芝蓮腿....令我好肉緊想咬佢.   今日表現好好, 一同佢玩就笑, 我比佢溶化.  

未經佢媽媽同意, 我要post佢張相, 可惜未能捕捉佢笑得最燦爛嗰刻 (哈哈, 因為忙著同佢玩嚶咕咕同點蟲蟲呀!)

Chi K11 Art Space

August 20, 2015, Thursday

上個月老友鬼鬼通知我佢兒子大學畢業,响K11有畢業作品展, 當時說有時間去睇睇.  跟著去咗旅行, 返到嚟又忙, 差的唔記得.

 
好彩今日記得, 展期都差唔多完呀!

去到Chi K11 art Space....哈哈, 如果唔係有拼音, 可能唔係咁肯定個讀音...喴耾耾耾耾

 

入到去見到, 一連五幅就係朋友兒子的作品, 聽朋友講, 呢幅大作, 用咗一年時間完成.

朋友的兒子自小喜歡繪畫, 兒時有些作品亦攞過獎.  

趁呢個機會都睇吓其他同學嘅作品.

 

其他同學的作品也都很不錯.  

希望這些同學們畢業後其藝術事業能發光發熱.

松坂日本料理

August 18, 2015, Tuesday

今日心情好沉重呀!  昨晚在曼谷四面佛發生爆炸, 這麼多人死傷, 真的很難過, 全都是無辜的人, 心很痛呀!   爆炸的地方, 我每年都去, 還在那張椅子坐過很多次.

約了Akiramay食午飯, 她要幫我慶祝生日.  慶祝生日也難免要談談這慘事.  而我叫她幫我訂了十一月底去曼谷的機票, 也要取消.   可能三四個月後已經開始淡忘, 但在此刻, 真的不想去.   以前泰國政變, 紅衫軍/黃衫軍我都不怕, 韓國的新沙士也不怕,  因為自己仍可選擇去那裡, 帶不帶口罩.  但炸彈放在那裡, 真的沒有得防避, 一秒鐘死神便擦過.

都有一排無嚟松坂, 近來覺得佢的生意好咗, 午市好多時都滿.  

入去次前睇咗外面個餐牌, 午市便當好似幾好, 就叫呢個便當啦.

咁當然仲有其他午餐, 拉麵餐HK$65-70, 而其他就由HK$88-130都有

外面差唔多滿坐, 要入去坐鐵板燒位

睇落都幾好, Akiramay唔想食魚生(激死, 咁叫第二樣吖麻), 要我食埋, 咁食魚生都飽咗一半.  要佢夾番炸帶子同西蘭花.

我食到後尾先食的炸物, 覺得唔脆, 索性唔食的炸皮.  其實食過咁多次炸物, 炸得最好係Icafe嘅重量級魚柳, 真係炸到外脆內軟, 等我星期四又去食先(又可以pack個勁大個魚柳包返去比型爸食).

食完仲有雪糕做甜品.

埋單HK$172 (HK$78 x 2 再加一).   Akiramay要請我食飯, 唔使啦, 有心就得啦.  AA制, 唔想佢破費呀!