外賣粥麵

September 28, 2013, Saturday

昨晚瞓得好差, 個鼻塞哂, 跟本瞓唔到, 瞓吓醒吓, 今朝起身, 仲覺得嚴重咗, 攪咩, 睇咗醫生食著藥都係咁.

昨天請了病假瞓了一天, 個人渾渾沌沌.  型爸叫我不如出去行吓, 唔好整日困著間房.  我其實都唔係好願郁, 不過諗吓都啱嘅, 出去行吓都好, 順便去買餸.

行咗一陣就覺得好攰, 頂唔著, 快快趣趣, 買完就走.

本來想返屋企煲粥炒麵, 型爸話唔好攪咁多啦, 不如買番去食好過啦.   咁都係, 狀態十分差.

去了上水街市熟食檔東莞佬粥麵買外賣.

我要了粟米粥, 好肯定, 無落味精.


加咗好多甜醬同麻醬嘅睇粉

粟米粥+腸粉, 呢個套餐HK$21(堂食hk$20).  雖然係粗野, 但呢的價錢而家仲去邊道搵.

型爸要了皮蛋瘦肉粥, 加豬紅粥都只係加hk$5


配碟炒碟真係嚇親, 一大盒加埋碗粥套餐價都只係hk$26 (堂食hk$25)


咁大堆頭, 兩個人真係食唔哂, 的炒麵要留起大半盒, 我碗粟米粥都只係食得一半

嗚嗚鳴, 病咗真係慘.....二公子剛啱瞓醒(佢返了幾天通宵更) 想去按摩, 我叫型爸同佢去啦, 我唔去啦(其實我都好想去架!).   做人唔可以咁自私嘅, 況且我個病樣都幾難睇, 面部浮腫, 鼻塞兼失聲, 係人見到都怕咗我啦, 都係乖乖响屋企休息吓好過啦.

咁我瞓覺佢兩仔爺去按摩囉.

煎焗蛋餅 - LC Cooking Class + 迎接花花回家

September 26, 2013, Thursday Night

八月初買咗三個LC鍋具, book咗佢地嘅cooking class, 安排今日上堂.  真係唔好彩, 今日已經唔舒服去咗睇醫生, 放工仲要過海跟著爬山去LC雲咸街店.  唉, 仲要行到一半開始落雨, 無帶雨傘. 濕咗少少身, 喉嚨痛鼻塞, 開始失聲.

預早去到, 見到有個女士帶埋二人姐姐去買LC, 分咗好多張單, 要嚟上cooking class.

那位導師好詳盡介紹鍋具的用法, 跟著示範墨西哥蛋餅嘅做法.


每人派了一張receipe, 有西式及中式嘅做法, 但導師並無跟recipe的配料.

French Oven 22cm , 凍鍋落油, 用掃塗勻內鍋, 燒熱鍋具至有油紋

呢道係兩份配料, 量杯入面有6隻雞蛋, 打勻後加入已調味炒熟之肉碎及菜圃

將肉碎蛋倒入鍋內

煮兩分鐘, 加蓋焗10分鐘

跟著導師就整另一款蛋餅, 燒熱18 cm French Oven

用平底鑊煎香煙肉, 加入洋蔥炒香, 用量杯打入3隻雞蛋, 加入已炒之煙肉洋蔥拌勻, 做法跟之前的一樣, 煮2分鐘, 加蓋焗10分鐘.

焗緊嘅時候, 導師用媽咪鍋, 熱鑊後1分45秘炒菜心.

睇完佢炒菜心, 我都想買番個32 cm 媽咪鍋.

中式菜圃肉碎蛋餅得啦 (焗咗超過10分鐘)

都幾靚呀!

導師原個倒出嚟, 無黐底呀!

切開每人一件

個底有的香香地, 平時唔係好鐘意食炒蛋, 都覺得幾好味.(唔知係咪好肚餓呢!)

 

跟著西式煙肉洋蔥蛋餅都得啦.

個面好似差少少先熟, 不過都ok啦.   大家都食得好開心.

哈哈, 跟著五號屋更開心, 用Asiamiles 積分, 換咗6個Ramekin Fleur with Lid, 帶佢地返屋企呀!

雖然唔舒服, 一返到屋企, 即刻攞出嚟影吓相先.

 

兩紅, 一橙, 一藍, 一黃, 一青.   只得五個顏色揀, 本來想要兩個橙, 點知攪錯咗, Flame係橙色, Cherry red 係紅色.  不過都無咩所謂.


好開心呀!, 可以用嚟整甜品或者用嚟盛醬汁.

係咪中咗LC毒呢?  應該唔係好深啫...好想買個媽咪鍋.

軟式麵包- 麵包機製作

Sep 25, 2013, Wednesday

今日再拎個PM105出嚟整麵包, 上次試咗基本麵包, 今日試整第二款

 

軟式麵包

呢個recipe同基本麵包只係加多了牛油.   上次的麵包有的韌皮, 我今次加多了奶粉到20g, 希望鬆軟的.

跟著menu嘅次序


放好材料, 最後加冰水


按program 2, 調至淺烤色.  呢款麵包要4小時20分鐘(救命, 咁耐) 我八點幾整, 要0時46分先整完.

最可憐係出爐時包面陷了入去....即係失敗啦.

但係的麵包唔係唔食得喎, 好多氣孔, 鬆軟, 並唔係發唔起, 唔通發過龍?

第二日烘成多士, 塗上班蘭"加young".

睇吓的麵包真好多氣孔, 但咬落去仍有少許韌皮的感覺, 同我以前用開嘅麵包機, 整出嚟嘅麵包完全唔一樣呀!

好失望, 仲有排要試呀!

鹽水鴨

Sep 24, 2013, Tuesday

好耐無整過鴨, 上星期六去街市見到, 決定買一隻, 諗著星期日聚餐整鹽水鴨.  怎知天兔襲港, 聚餐取消, 買咗嘅鴨都要整架.

材料: 鴨一隻.  調味: 粗鹽5湯匙, 花椒1湯匙, 紹酒1湯匙, 八角5粒, 香葉5片, 薑3片, 蔥2條切段

香葉八角煮時先需要用, 花椒鹽就有的功夫要做啦.


鴨一隻, 洗淨

白鑊用中小火將花椒鹽烘至微黃

盛起待涼.

跟著用花椒鹽將鴨內外全部搽勻, 用保鮮袋包著, 放入雪櫃醃24小時.

整鹽水鴨最主要係要先將鴨醃一晚, 我星期日醃, 星期一整就最好, 但星期一個胃都仲有唔舒服, 只想食梅菜蒸魚送白粥,  隻鴨就留番星期二先煮.今天叫Ruby將鴨取出, 將多餘的鹽抹走, 將一片薑, 蔥段塞入鴨肚內

用湯煲煲滾一鍋水, 放入其餘薑片, 香葉, 八角, 紹酒.  將鴨放入滾水中再煲滾, 轉細火煮約40分鐘.


放工返到屋企, Ruby已經開始斬鴨, 佢問我煲完鴨嘅湯要唔要....吓, 梗係唔要啦.


鹽水鴨攪掂啦.

因為醃咗兩晚, 隻鴨偏鹹, 不過都好好味!

阿善素食 - 漆咸道

September 23, 2013, Monday

個風來去匆匆, 今早一開電視就知道要返工.  第一時間開電腦, send email 比的同事, 落波後兩小時就要回公司.

今次天兔無對香港做成好大嘅損害我覺得係一件好事, 係咪都要返工架啦.   睇的風勢, 我覺得早上一早應該落八號風球, 天文台又驚比人鬧, 所以延遲咗.

返工路經大帽山, 都見到有斷樹, 已經有車在清理.

十點幾返到公司, 好快又到食晏時間, 個胃唔舒服咗兩日, 今日強力要求同事去食齋, 哈! 食肉獸同事即刻應承, 我見佢差唔多食晏仲食緊麵包, 應該唔肚餓啩.

附近只有阿善素食, 所以都係去幫襯佢.  Green Monday, 啊, 今日係星期一, 會唔會好多人呢!   去到跌哂眼鏡, 只得一半客人.


Menuj轉咗.   哈哈, 睇見餐A就好笑, 勝瓜鮮百合雲耳"腊腸", 呢間係素食, "腊腸" 唔係麵筋就係菇啦.  嚟得食素都唔諗著會食"腊腸啦.   即係好似上次去大自然素食, 咩野北京片皮鴨, 咖哩羊腩煲, 如果我要食呢的都唔嚟素食店啦.

哈哈, 不滿佢A 餐個名, 所以唔叫, 我地三個人叫B C D 餐.


每人一碗素湯, 呢個素湯ok喎, 冬瓜眉豆花生紅棗湯, 我都要學吓煲的素湯先至得.


南乳羅漢齋, 呢道有的怪, 偏酸, 南乳味就無咩啦.


好普通的涼瓜炒蛋


呢碟鳳凰紅燒豆腐就十分好味


我唔要白飯, 要粟米弼, 好味!

不過真係有投訴, 呢道的侍應阿姐真係服務奇差, 個個都黑口黑面, 一係木無表情, 問親都係負面答案.   隔離檯有位小姐問一位女侍應攞豉油, 佢應都唔應一句就行咗去, 嗰位小姐再叫住佢, 佢先話而家咪去攞比妳囉.

我地其中一份餐等咗好耐都無嚟, 咁叫阿姐追吓啦.  隔咗10分鐘未嚟再追,  另一位阿姐剛送過嚟, 放低一碟, 我地問係咪紅燒豆腐呀, 佢話呢碟咪紅燒豆腐, 要唔要, 唔要拎走....嘩, 真巴敝....係咪因為咁所以少咗咁多客人???

有機會真係要再去訪問吓佢地, 老闆係咪刻薄佢地, 佢地個個都做得唔開心...所以幫老闆倒米.

 

為二公子預祝生日

September 21, 2013, Sunday, 八號風球, 天兔襲港

今晚本來去十號部屋開中秋戶外Potluck, 因颱風取消了.  晚上都未決定食咩, 還考慮要唔要整potluck嘅食物(基本上已預備好)   但型爸知道今晚potluck 取消後就同我講不如今晚食西餐啦, 我地剛啱買咗的靚牛扒.  (吓, 我個胃唔舒服喎) 哦....睇吓二公子點先啦.

到二公子嚟搵我, 媽咪今晚食咩呀, 妳又話買咗靚牛扒同我慶祝生日, 不如今晚食啦, 明天我約咗的朋友出去食飯慶祝呀!.

二公子明天生日, 咁今日同佢慶祝啦.  仔女大咗都係咁, 正日生日都係留比的朋友.  

兩仔爺都咁想食牛扒, 咁我唔想食都唔使出聲啦.  兩個牛魔王, 佢地快樂就是我的快樂.  (我諗佢地唔知我個胃咁唔舒服, 見我行得走得仲整蛋糕)


攞咗一塊西冷, 一塊肉眼, 好大塊, 每塊都應該有12oz

 

今次唔用LC grill pan, 用舊grill pan, 我習慣將少量油塗落牛扒, grill pan唔落油, 一煎, 的牛扒會出油.  兩塊牛扒大到差唔多填滿個grill pan

呢個grill pan, 一樣煎到靚靚嘅格仔牛扒.


煎牛扒嘅同時再用另一個平底鑊煎鵝肝, 再放切片嘅小法包入焗爐焗8分鐘.  七手八臂, 有塊鵝肝燶咗的, 不過燶咗嘅係撲面嘅麵粉, 無影響件鵝肝

當我煎牛扒時, 太香了, 兩位大爺落嚟啦.

 

預備了沙律

仲有Feta cheese

他們的晚餐預備好了... 二公子一見到檯上的食物, 還有剛焗起待涼的芝士蛋糕.....佢超開心呀!

我問型爸, 要不要先食沙律, 我去拿醬汁.  佢同二公子二口同聲話唔使著, 先食鵝肝多士, 再食牛扒, 梗係食咗的美味先, 沙律慢慢食.

而我的晚餐也預備好了, 加了薑煲的白粥.

佢兩個都好有良心, 勸我食了這塊鵝肝多士, 仲幫我灑上海鹽黑胡椒

還切了小小的一塊(一口)西冷end cut給我

還有一小塊(一口)肉眼end cut.

今次呢兩塊牛扒, 好味過响一田買嗰塊好多呀!

我望著佢兩仔爺, 好開心咁KO哂的鵝肝多士(阿仔今次無聲出啦, 以前佢成日話我點解整,咁少鵝肝) & 兩塊牛扒....最後係咁意食少少沙律菜.

佢兩個食完, 我碗白粥都仲未食哂.

佢兩個快樂, 我唔食都一樣快樂.