粉嶺海聯皇宮大酒家

July 26, 2015, Sunday

昨天行山組長回港(組長太太及女兒仍在歐洲遊玩, 要遲10日先返), 大家慶組長回歸, 興高采烈在群組談論今早去邊道行山.    近幾天不斷下雨, 行林徑有危險, 好耐無行過石屎路嘅南涌至尤德亭, 都可以行吓喎.

點知星期日早上, 由五點幾開始落雨, 到八點都未停, 組長唯有話取消啦.

哈哈, 有組員話, 大家都醒哂啦, 無得行山不如去飲早茶啦...大家又和應, 8:45集合去飲茶.  領隊加入搭訕, 去海聯飲茶啦, 的片皮鴨HK$58一隻, 又有停車場泊位.   吓, 唔係晨早食片皮鴨咁激呀!

 
 不過我地結果真係去咗海聯, 但提議嚟呢間嘅哈叔領隊又唔嚟喎.

去到唔使等位, 唔知係咪星期日的人無咁早起身呢!

型爸出去檔口, 睇吓有的咩野攞入嚟食....大家千吩萬咐, 只可以叫2.5樣野, 唔係又食唔哂呀!

型爸攞了:

  
 煎腸粉... 夾一條食吓先....吓唔熱嘅, 煎定放咗好耐的無煎呀?

 
 炸日式小丸子(墨魚丸), 咬落去粉嘅, 唔好食.

 
 鮑汁雞腳, 都未烚腍

 
 蒜蓉豆角, 好硬呀! 

 
 仲有魷魚鬚, 的炸粉又係唔脆.   拎咗五樣野返嚟, 都係唔好食架!

本來睇到呢張全包宴覺得好抵食, 諗著安排食番餐, 即刻大打節扣


的蒸嘅點心送嚟啦, 义燒包ok, 的潮州粉棵的皮一夾就爛, 雞札無食過唔知得唔得, 鴨腳札嚿芋頭就好乾.

副組長太太點咗兩款包仲要每款兩籠....救命呀!

呢個黃色嘅蕃薯包, 入面的紫心蕃薯無味, 其實整個包都無味.   結果副組長太太要打包三個包返去食.

埋單四百一十幾, 每位HK$70.

的點心好食同唔好食真係差好遠, 我昨天先同奶奶姑奶去美孚陶源飲茶, 的鮑汁雞腳同的點心真係好食好多.

呢間我諗第日盡量都唔嚟食啦.   出去茶餐廳食個早餐好過啦.

芝士焗釀大蘑菇

July 24, 2015, Friday night

今日Cindy放假, 但今晚無諗著出去食.   自從上星期出去小廚知味晚飯, 的餸大濃味, 攪到成晚飲水, 唔like呀!

今日有哂準備, 六點十五分離開公司, 七點十分到屋企, 咁就開始煮.   二公子大約八點返到屋企, 咁一齊食就啱啱好, 一個小時之內, 一定攪掂.

買咗四隻大蘑菇, 今日要焗釀大蘑菇呀!

預備了切碎洋蔥(一個)

半斤免治牛肉 (其實一定有多, 但諗著整多的無所謂啦, 多咗嘅餡料用嚟整beef nachos 都得啦)
 

基本料齊啦,

肥媽話的大蘑菇唔使洗, 但我真係忍唔著, 點都要洗吓先至得.   洗完要用廚紙抹乾隻蘑菇

我將的蘑菇腳剪咗出嚟, 硬嘅唔要, 然後剁碎

用牛油起鑊香洋蔥加蘑菇腳

免治牛肉加豉油糖黑胡椒略醃, 加落去一齊炒

的牛肉無落生粉, 因為我唔想的牛肉黐埋一嚿, 我唔係要牛肉餅呀!  跟著可以再調味, 呢個時候可以加的海鹽

預熱焗爐200度

大蘑菇放在錫紙上, 加點生粉在蘑菇, 釀上洋蔥牛肉碎...哈哈, 我釀到好滿呀!   不過的餡料都用唔哂.

最後加塊Chedda cheese蓋著個大蘑菇(其實用的焗pizza嘅碎芝士會更好, 的芝士溶哂會將的肉碎黐實呀).  入焗爐焗10分鐘.

淨食蘑菇我家兩位大爺點夠吖, 呢10分鐘時間就可以用嚟煎牛扒.

兩件西冷

一塊肉眼

牛扒煎好

芝士焗釀大蘑菇都得啦.

今晚的焗釀蘑菇牛扒餐

兩仔爺話好好味呀!  佢地連淨低嘅餡料都食埋.

我地每人分的西冷肉眼, 我一隻蘑菇, 佢兩仔爺每人一隻半呀!

佢兩個都話好味, 又比like我呀!

香城茶室/香港歷史博物館

July 24, 2015, Friday

今早新界北區落勁大雨(其實由昨晚已經不停落雨), 早上預備開車出門, 嘩, 外面水浸, 浸到門邊, 好彩未浸入屋.   連路口都浸埋.

跟著再睇吓閘口如何, 條石屎路變咗泥河.   咁嘅情況都係唔開車著啦.  唔係一陣出到去有的水深睇唔到, 架車死火咪敝.

哈哈, 跟著陶媽就好似現場直激報導, 佢塞咗係粉錦公路, 前面有兩架車死火, 兩面路都塞哂.  後來要消防車嚟攪掂, 但係佢塞咗個幾鐘.

我幾大都唔出車, 安全第一, 直至十點幾, 的雨細咗好多, 外面的黃泥水都退去, 我先出車呀.

下午陶媽再發張相出嚟, 新聞都有提到呢個情況, 當時如陸上行舟.   我真係算好彩啦.

十一點出到尖沙咀, 出到嚟市區無咩雨, 唉, 的雨落哂去北區呀!

下午出去食晏, 又繼續落雨 (呢兩日都好似未停過)

今日慢魔魔提議去一間社企開的快餐店.  而呢間快餐店响香港歷史博物館裡面.    其實我地唔係第一次嚟架啦, 上個星期二我地嚟過, 點知香港歷史博物館休息, 呢間餐廳都休息.

 

入到去的冷氣好勁, 外面在下雨, 入到嚟覺得好寒呀!  呢間餐廳叫香城茶室, sell 懷舊呀!

 

餐廳睇落都幾大, 但又唔係好多人喎

 門口有呢的椅, 的人好似好優閒咁.

 
 我地入咗入面, 坐的木圓檯

午餐價錢一般, 但一碗雲吞麵都唔平

唔要lunch set都可以叫其他.

坐低後, 慢魔魔去買票.  原來午市套餐有九折

飲品先到, 我要了咖啡.  杯咖啡都唔錯.

慢魔魔要的沙拉骨意粉送來, 我見到覺得麻麻.套餐有湯及甜品, 但睇落都係唔掂.  平時無咩要求嘅慢魔魔, 都話麻麻.

我地坐嘅小圓檯, 檯面很細, 如果三個人的野到齊, 都好迫呀!

我要嘅肥牛天使麵都嚟啦.  見到有的食唔落, 因為的麵睇落已經好腍.   食落當然都係好腍啦.  加上的白汁好淡,   呢碟麵係唔想嘥, 好勉強食咗佢.   湯及糖水一樣的失望.

麻煩鬼要了白菜豬肉水餃, 但送到嚟似鳳城水餃.  佢無叫套餐, 一碗麵HK$30, 加一碟油菜HK$13.

除咗杯咖啡ok之外, 其他野我都覺得唔ok呀!   唔怪得之呢間餐廳咁少人啦.  香港人好識食, 好味的話門口排哂隊都等.    呢道地點咁好, 有天時地利, 但的食物唔做好的, 真係嘥.   我見到人叫餐腸麵, 呢的咁普通野無理由唔得, 但我見送去隔離檯, 個樣都唔係好得.   的腸仔好似烚定放咗响道好耐咁.   去豐明苑食, 睇落都好過佢.

我地本著呢道係社企, 多的嚟幫襯.  的人招呼好好呀, 幾十文一份午餐尖沙咀好地方都有, 但係的食物做得唔好, 咁點攪呀!   唔怪得之的人流疏疏落落啦.

食完我地有時間行出去博物館大堂.

暑假期間好多學生, 呢道有個counter寫著瓦當拓印, 有的人在試印

再行過的就係香港故事館.   今期博物館介紹武漢盛世.

行到另一邊有間精品店

有的中國色彩禮品, 要嚟送比外國朋友都幾好喎

呢的係咩?  雞蛋仔似唔似...哈哈, 全部都係肥皂嚟架

呢的麵包都係肥皂嚟架.

 

仲有的古舊款式玩具, 不過寫明用嚟收藏, 唔係用嚟玩架.

睇完一輪, 我地要返公司啦.

餐廳的野唔好食, 但行吓精品店都值得嚟嘅.