五號屋的部落: 1月 2018

2018年1月31日星期三

Thai Master 泰斗

January 24, 2018, Wednesday

有朋自遠方來, 不亦樂乎!

今日真係好高興, 呢位朋友係我中學同學, 初中時已移居美國, 差不多每五年先回香港一次, 但每次回港都會聯絡我, 大家出來見見面聚一聚. 今次她回港只逗留三星期, 又去日本旅行又要去澳門, 又要見很多朋友, 非常忙碌. 幸好留一個晚上跟我聚聚, 多謝妳呀! 雖然大家見面不多, 但每次都有談不完的話題.

本來想同佢食日本菜, 但諗吓佢剛去完日本, 不如食泰菜好過啦.

叫秘書小姐去open rice 搵間近地鐵站, 等佢容易搵的. 結果搵到呢間Thai Master, 泰斗. 响海防道中達大廈4樓. 約佢响尖沙咀地鐵A1 出口等, 行兩三分鐘就到.

上到去, 地方算大, 整個餐廳連著Balcony, 相信方便咗一的食煙人士

坐低唔係馬上叫野食, 而係大家交換禮物...哈哈, 大家都好有心思呀!

朋友話呢排食得好勁, 今日食light 的好的.
　

我地叫咗炒椰菜苗

肉鬆生菜包. 味道唔錯, 仲有好多塊生菜.

炸魚餅, 呢款麻麻, 的魚肉太腍唔彈口呀!

仲叫咗一客薄餅, HK$28, 哈哈, 但咁少塊, 做咩攪到咁矜貴

我地就叫咗呢水樣野....都真係好輕食.

不過女士唔叫甜品點樣算係美滿呀...

要咗一客芒果糯米飯, 大家Share 好好味

跟著再叫多一客椰汁西米布甸....

哈哈, 實在太美滿了.

不過我這朋友大曳曳, 竟然趁去洗手間時, 靜雞雞埋了單. 到我發現時已經遲了. 佢話咁多年都係我請(咁當然啦, 佢十萬八千里飛回來, 我梗係要盡地主之宜), 今年佢請梗的 (其實佢未返嚟已經講定).

後來問侍應今餐埋單HK$587...差不多吧, 大概價錢..肉鬆生菜包HK$128 (or 168), 炸魚餅HK$128, 炒椰菜苗HK$98, 薄餅HK$28, 芒果糯米飯HK$68, 椰汁西米糕HK$48, 我要了一杯飲品青檸梳打(七點前叫七折), 大概三十多完. 咁連加一就五百多完. 唔係平, 但都唔算貴.

好彩今日係week day, 的檯無坐滿, 我地真係傾足三小時 (六點半至九點九), 侍應不停為我們添熱水, 一的都無催促我地走呀!

跟著送佢去地鐵站, 臨別依依大家來個深深的擁抱....又要多年後先再見啦.

2018年1月29日星期一

天麻川芎百芷燉花錦鱔頭湯

January 21, 2018, Sunday

在大埔街市買黑毛豬肉, 順便行吓的魚檔....比型爸見到有一檔有花錦鱔賣, 佢地仲話係野生唔係飼養, 泰國運過嚟架....佢食指又大動... 哼哼, 咁即係唔買唔得啦

我地買咗半條花錦鱔, 另外再多買一個魚頭. 嘻嘻, 用嚟燉魚頭湯呀!

唔好睇個魚頭細細, 其實打開都幾大個

而家仲買多咗一個魚頭, 個湯實擔啩.

至於魚身, 魚檔問我要嚟炆定蒸. 我要蒜頭豆豉辣椒蒸, 咁佢幫我切片. 洗淨放落碟排到靚靚已經好開心啦.

講番個湯先....

瘦用汆水切細嚿

天麻川芎百芷... 落幾多, 我都係斷估每樣落的啦.

將所有湯料放入康寧煲, 加入兩公升滾水

加蓋放入蒸爐, 用110度蒸燉三小時

個湯燉好, 超濃呀!

我同型爸淨係食燉完湯嘅魚頭都差不多飽毓地啦... 好好味呢喃

至於個湯, 加的鹽就得. 不過的湯藥材味重咗的, 蓋過咗的魚鮮味. 下次要河

至於蒸花錦鱔片, 當然好味啦. 唔似食魚, 似食豬肉呀! 好快就KO哂, 的魚潤仲好好味添.

今餐仲有西芹紫洋蔥炒鴨胸. 的鴨胸响梁九記買, 解凍切片醃吓就得. 方便又易煮呀!

仲有炒唐蒿

呢餐實在太豐富啦....

2018年1月27日星期六

南涌谷埔 - 粉嶺至友美點

January 21, 2018, Sunday

今個星期日組長出外公軒, 就由副組長負責聯絡各組員. 組長唔响香港, 好多人偷懶呀! 為咗支持副組長, 我地第一時間報名. 幸好又多了兩位鄰居夫婦加入, 我地五人成行.

其實我地又唔係去探險, 最主要係周圍行吓出一身汗, 今次副組長話行車涌谷埔. 哈哈, 我同型爸最喜歡呢條路線, 大多平路, 只有上落二百幾級樓梯, 近海邊, 來回大約兩小時, 理想的行山行程, 所以我地行過N咁多次.

先去廟拜神, 跟著一路行都唔使點休息. 回程都無咩點休息, 回程就在宋伯士多食碗豆腐花.

都無咩影相, 見到又有小牛出生, 就影吓佢地啦.

今次其實主要都唔係講行山, 係講午餐呢間在粉嶺的點心小店. 係鄰居夫婦帶我地嚟架, 佢話呢道的點心又平又正, 好多都係即叩即蒸的.

呢間叫至友美點. 在粉嶺聯和墟和豐街21號

有多款點心, 大中小點, $19/$17/$15, 腸粉都只係$18

呢道有我喜愛的臘腸卷呀!

盅頭飯好好似係$22

奶皇包, 入面都好軟, 不過係custard, 無蛋皇的.

樣樣點心都幾好味, 個潮州粉果入面有沙葛, I like it.

最正係呢個鹹水角, 即叫即炸, 鯪魚球都好正, 又係即叫即蒸

鄰居夫婦話呢道的糯米飯都好正, 又叫嚟試吓....只係$26. 又幾好味, 好過上次蛇王兄嗰的.

我即時發的相比行山組, 組長夫人偷懶無嚟, 忍唔著叫我打包鹹水角同鮮竹卷...哈哈, 好味是要分享的.

呢道茶錢$2 一位, 唔使加一, 五個人食到飽飽, 打包埋兩款點心比組長夫人, 每人都只係$50....

抵食又好味, 下次行完山多一個選擇呀!

2018年1月25日星期四

The Lounge - 大食兩父子

January 17, 2018, Wednesday

今日二公子放假, 約埋型爸, 一齊出嚟搵我食午飯. 二公子要拎架車去整, 時間有的緊迫咁就訂咗新世界千禧酒店, The lounge. 問咗泊車要HK$50一個鐘, 食滿HK$500就有兩小時免費泊車. 型爸話點都食夠HK$500咪得囉... 哈哈, 咁都得.

The Lounge 有兩個午餐牌, full course 嘅就HK$188一位, 另外一個特價只有主菜及飲品嘅就HK$88以下. 點知full course 餐牌今日無牛肉, 兩位牛魔王非常失望啦. 點知特價餐牌有西冷牛扒喎, 二公子話咁每人叫兩個特價餐啦...哈哈哈, 食唔食得哂呀!

二公子同型爸每人要了一客西冷牛扒 HK$, 佢地切咗一小塊比我試, 講真, 真係麻麻, 咁嘅價錢都唔會比靚牛扒啦.

二公子另外要了一客豚肉烏冬, 佢又真係食得哂喎.

呢客吉列豬扒只有一件(切了四塊)及沙律, portion 細, 真係食唔飽呢. 我同型爸食了一塊, 二公子食埋佢...哈哈, 二公子話佢夠哂啦.

我就要了巴東牛肉, 呢份巴東牛肉好好味, 呢碟係型爸的, 我要的那份的黃薑飯送到嚟, 只有呢道的飯嘅一半, 我即刻去投訴, 佢地先補番少少飯....

真係唔合比例架, 的巴東牛肉仲多過的飯.

結果我地三個人叫咗六份餐. 我負責我的巴東牛肉, 其他的佢兩仔爺攪掂, 我就幫吓口食一兩啖啦.

大食兩父子, 勁! 真係超過HK$500, 可以免費泊車兩小時. 二公子話點都平過食Full Course那個餐牌, HK$188x3 再加一要HK$620....食平咗啦....

哈哈, 最緊要佢地食得開心!

2018年1月23日星期二

大都烤鴨 - K11

January 15, 2018, Monday

型爸的老外朋友又嚟香港, 又約出嚟一齊食飯.

上次同老外的女兒來過大都烤鴨, 佢好鐘意, 今次同老外嚟試吓.

不過嚟大都烤鴨都好鬼乞人憎, 只係兩個時段, 六點至八點, 八點至十點. 就算book六點半, 都係要八點交檯. 咁鬼叫咁好生意咩, 八點真係有人排隊架.

點菜時都struggle咗一陣, 侍應介紹了晚市套餐, 我地都覺得幾好. 但四人餐HK$1,288 只得半隻烤鴨, 我地覺得唔夠, 如果加多半隻鴨就要加HK$250. 咁就變成HK$1,538. 另外一個六人餐就要HK$1,788, 咁就有一飯烤鴨. 型爸決定要六人餐, 佢話叫多的就多的啦, 食唔哂拎走.