五號屋的部落: 8月 2018

2018年8月31日星期五

慢煮豉油雞雞

August 20, 2018, Monday

慢慢慢慢慢, 慢完繼續慢....但我都比個準則自己....至多三個小時好啦....

今日係慢索豉油雞....

做法都係同昨天整嘅豬腩差不多, 但今天個汁整多少少: 老抽6湯匙, 生抽8湯匙, 水10湯匙, 薑, 蔥, 蒜, 冰糖. 先將醬汁煮滾, 試味, 熄火, 加入4 茶匙玫瑰露. 待涼入zipper bag, 再放隻雞落去.

上次去鄰居家食, 覺得鹹咗的, 因為醃咗一晚. 今次我係無醃過. 預備煮三小時, 點都入味啦. 再者又可以用的汁埋個茨, 就算淡少少都可以醮的汁嚟食.

先預熱的水, 用68度慢煮三小時.

睇吓製成品幾正!

切時的雞胸肉都好熟.

美味豉油雞, 的雞髀肉非常滑, 的骨有血色但的肉熟哂. 慢煮完的雞肉好軟腍, 雞胸肉就全熟, 一點都唔會嚡呀! 的豉油汁都好好味呀!

今晚仲有咩野餸:

反釀豆卜

昨天嘅木耳湯的木耳, 變今天的涼拌木耳

蝦醬通菜

今天的特別湯水 - 木綿花煲解淮山, 芡實, 薏米, 扁豆, 赤小豆. 的木綿花係鄰居曬的, 比咗二十朵我. 可以分兩次煲.

呢款湯去濕健脾, 味道都好好飲呀!

2018年8月29日星期三

白背木耳蘋果紅棗湯

August 19, 2018, Sunday

之前姊姊在Whatsapp 群組裡轉發咗一個湯水比我話可以通血管去血脂, 仲話效果好好, 但一直都無去煲. 點知最近同組長傾謁, 佢話最近去驗身, 驗血報告的血脂及尿酸都全部低哂回覆正常, 因為飲咗呢個湯兩個. 既然對身體咁健康, 我都嚟煲吓. 一星期煲一次都唔為多呀!

有興趣可以用手機開呢條link : https://youtu.be/BP8Ty79lzJo

煲呢個湯材料: 三個紅蘋果, 二兩白背木耳(浸軟去蒂) , 八至十粒紅棗(去核), 一塊果皮(浸軟), 加件瘦肉(先汆水).

三個蘋果去皮去芯, 一開四

原食譜用了白背木耳絲, 我買了白背木耳 (很便宜, HK$2.5 一兩, 二兩HK$5). 加入全部材料, 煲兩小閎. 原食譜無講要落幾多水, 我就落咗兩公升, 但我用萬能煲, 煲嘅時間短的.

煲起的湯都好濃, 白背木耳好吸水, 煲起就無兩公升. 呢款湯好甜呀!

的白背木耳煲完湯都無嘥, 將佢雪凍, 明天整個汁用嚟做涼拌木耳....食得唔好嘥呀!

2018年8月27日星期一

慢煮豬腩肉

August 19, 2018, Sunday

我係個急性子人, 做咩都要快靚正, 所以一向都無整的慢煮菜式. 不過最近在超市換咗枝慢煮棒... 咁我又嚟慢一下... 實在太鍾意試新野...

攞個煲出嚟, 試吓水溫先. 我先用明火煲到的水半熱(用之溫度棒一睇已經七十幾度, 即刻離火. 到我調溫set時間, 的水已經變成65度...我就係要65度.

先煮個汁先, 生抽(3 湯匙), 老抽(2 湯匙), 水 (6 湯匙) , 薑, 蒜, 一粒冰糖. 煮溶的糖試味, 唔啱口味就自己加加減減

待涼, 的汁放zipper bag. 的汁唔係好多, 但夠啦.

腩肉先汆水, 跟著過冷河

再放入zipper bag

唔使驚的汁唔勻, 一放入煲內, 水壓力關係就會變真空, 跟著關實個zipper bag 就得.

65度煮三個半小時 (我覺得已經好耐, 真係唔想整五六個鐘)

中途反轉個包豬腩... 煮好, 的豬皮已經上哂色.

將嚿豬腩切丁, 再放落平底鑊五面煎香

的汁例出嚟加生粉煮稠淋上豬肉面.

嚿豬腩食落都幾好味 (係的汁好好味, 不過嚿豬肉對我嚟講肥咗的), 肉質唔係好肉扣肉咁諗, 但食落又唔會韌, 都幾好. 不過平時整梅菜豬肉都只係用明火炆煮四十五分鐘有得食, 慢煮要三個半鐘, 如果要煮到好腍要五六個鐘...哈哈, 真係有的頂唔順咁慢. 不過既然有枝棒就咩都試吓啦.

Good Try!!

2018年8月25日星期六

緬甸魚湯河

August 19, 2018, Sunday

上次Cindy响緬甸返嚟, 買咗的魚湯河料包, 都未有時間叫佢整.

今日雷暴警告唔去行山, 咁就趁機叫佢煮啦.... 佢本來諗著生那天煮比我食, 但那天我唔得閒呀!

煮呢個緬甸魚湯河, 都真係好多工夫, 我見Cindy 整, 每次都要兩三個鐘 (佢做野比較慢, 但企理)

我地喜歡湯河多魚, 用了兩個鯇魚腩. Cindy話, 在緬甸佢地唔會放咁多魚.
加魚露加香茅(香茅外面的部份), 將魚煮熟, 去骨拆肉.

蒜, 薑, 香茅 (白色軟的部份)

全部放入盅成, 加辣椒粉搗成蓉. 跟著用嚟炒的魚肉

紅蔥頭 (加入湯內)

四隻烚蛋, 兩隻開邊切半, 另外兩食切碎加入湯內

呢包就係魚湯河的香料, 入面有一包米粉, 一包香料

我要出外買河粉, Cindy就繼續煲外那個魚湯. 大煲加水, 加入香料及米粉, 跟著加入紅蔥頭蛋, 炒香的魚肉. 用魚露調味

河粉到....

魚湯都煮好內(呢道只係一半)

Cindy 另外煎了魚餅

芫莤, 炸蒜油, 檸檬, 辣樣粉用嚟調味

呢的係Cindy買回來的炸米餅, 原來係糯米嚟架.

預備好....可以開餐

先落河粉

加魚湯...睇吓幾多魚肉

加魚餅, 蛋, 芫茜, 檸檬汁, 辣椒粉....再加兩個米餅....正正正

在家食到呢個緬甸魚湯河...幸福呀!

2018年8月23日星期四

Oyster More Grill + Wine 蠔魔

August 17, 2018, Friday

今日牛一, 對自己好的, 請假一天.

型爸一早安排, 中午就出發去按摩. 呢排好忙, 好耐無去按摩, 見到相熟的按摩師, 佢都話做咩咁耐唔搵佢. 嘻嘻, 呢個節目係我最喜歡的呢!

至於晚上, 型爸同二公子訂了元朗的蠔魔食飯慶祝. 平時好少去元朗, 去到泊車的地方, 竟然係元朗馬田村. 依稀記得, 兒時(幾歲大的時候), 曾經在馬田村住過好短的時間. 當年全都是田野, 現在起哂屋了.

由馬田村行去蠔魔, 大概要七八分鐘. 行到去, 好多私家車就泊响路邊....哈哈, 知先唔使泊停車場啦.

間餐廳門面都幾靚

外面睇好似好大間, 但入到去又唔係.

餐廳叫蠔魔, 當然有好多蠔供應, 餐墊紙就介紹每款蠔的味道及特色. 的蠔只係三四十文一隻, 唔貴呀!

型爸話不如開枝酒慶祝啦....哈哈, 比我婉拒了. 第一, 二公子要開車, 唔可以飲, 二公子的女朋友同我都唔係酒客, 型爸喜歡飲Whisky, 紅酒白酒都唔係咁喜好, 咁唔好為咗慶祝而開酒...哈哈, 我係幫二公子慳荷包呀....