再試柳園

Dec 1, 2016, Thursday

今日同慢魔魔&慢魔魔講起昨天去柳園, 哈, 點知佢兩個話不如今日去試吓, 又好啫, 食的唔同野咪得囉.   其實仲有一個原因, 我唔記得find out, 咩野係螺螄呀.

去到就即刻有答案, 原來佢地有張咭介紹. 原來螺螄即係石螺

而的粉係柳州米粉, 唔係叫米線.   哈哈, 我條脷都得呀, 的湯底湯底, 係無味精架.

不過今日同兩位男士嚟, 如果食碗米粉, 佢地實唔夠飽.

咁今日我地就食午市套餐啦.

叫咗三份套餐, 我地唔要飲品, 要老火湯.   慢魔魔鍾意飲蓮藕湯, 叫那位侍應比多的湯渣, 那位侍應好好, 用一個大湯碗裝了一大碗給我們

醬爆雞丁, 很小碟, 但味道不錯

碗飯就大得驚人

一對比就碟餸就好細

滑蛋蝦仁都幾大碟, 的蛋都炒得好滑

另外我再要了涼瓜炆魚腩, 味道都唔錯

咁當然都係飯大餸少, 但HK$50, 想點.

今日呢餐非常滿意, 個個都食到飽飽

埋單都只係HK$146, 仲平過我昨天食嗰餐.

咁我問慢魔魔同麻煩鬼, 蛋家佬好的定呢間好的.   點知慢魔魔話蛋家佬已經關門大吉....唉, 又少了一個選擇.

柳園

November 30, 2016, Wednesday

秘書小姐那天同朋友吃完午飯回來, 叫我下次可以去試吓呢間餐廳, 食柳州菜

哈哈, 我就最鍾意試新野架啦, 今日約咗個朋友, 一齊去試吓.

呢間餐廳叫柳園, 初時比我地址我, 我都唔知喺邊, 但去到就即知, 即以前仙宮樓, 跟著係霸王魚頭火鍋, 跟著又另一間, 現在就係柳園.

不過現在行樓梯上去, 感覺良好很多, 因為裝修過樓梯及電梯都乾淨伍理.   上到去餐廳右手面整幅牆都印上柳園.   好光猛.

秘書小組叫我試吓柳州螺螄粉同小食, 咁就睇呢個menu.

另外仲有小菜及午市套餐就唔睇著.

我們兩個人, 朋友話螺螄粉咁大碗, 叫一碗兩份再叫小食好啦.   哈哈, 到我地落單, 侍應話碗粉係一人份量, 唔夠兩人食架, 咁我好啦, 再叫一碗螺螄水餃, 咁應該夠啦.

碗粉嚟咗, 份量真係算細. HK$45, 加了蓮藕丸, HK$5, 有兩粒.

要了細的碎雞 HK$32, 落了桂花, 好香, 但的雞肉可能浸夠了, 肉質麻麻

燻魚 HK$42, 用了大魚背, 切薄片來炸, 味道可以, 非常多骨, 同平時吃的用鯇魚做不一樣.

至於的粉, 有的似米線, 但食落又唔係好似

我們每人分了一小碗

至於蓮藕丸好實, 味道一般

水餃來了, HK$48 配料同碗粉一樣, 入面有木耳, 花生, 酸筍, 菜之類, 份量都好少, 只得6隻水餃

 

的水餃肉又係實的的, 但味道都可以.

食完覺得個湯底可以, 唔鹹, 唔會食完好口渴  但相比起平時食的雲南米線, 價錢就貴的.   水餃份量太少, 只得6隻, 叫一碗做午餐食唔飽.

 埋單HK$172.   食物一般, 唔覺得好好食, 但又唔會好難食.

如果要經濟的, 可以叫呢的午市套餐.   全部都係HK$50以內, 免加一.  下次可以同麻煩鬼慢魔魔嚟試吓.

如果佢地唔做呢的午餐, 我諗好快又頂唔著啦.

家常小菜

November 28, 2016, Monday

昨天去完桃里食午餐, 酒店中廚都係覺得麻麻.  

可能口味關係, 都係覺得自己家裡的家常小菜好味的.  又無咁油膩

今日Cindy整咗椒鹽豬扒, 佢的蒜蓉辣椒炸我好香, 好似的避風塘炒蟹咁.

梅菜蒸鯇魚, 呢款蒸魚無得輸, 最緊要係的梅菜好味.

櫻花蝦蒸水蛋, 用1.5的比例, 用上湯代替水, 點會唔好味.

仲有雲腿娃娃菜

蕃茄紅蘿蔔煲魚湯

菜魚肉蛋, 四餸一湯....好味呀!

新世畀千禧酒店 - 桃里

November 28, 2016, Monday

今日邀請兩位助手食飯....本來應該係十天前食的, 但那天我病假, 延到今天先去食.

訂了新世界千禧酒店中餐廳 - 桃里

呢間桃里, 前身日航酒店, 就叫桃李.   裝修無咩點變, 間格都差唔多

呢道的點心, 每款由HK$49...69...一等

兩位小姐話有個套餐, 不如叫套餐....又好喎, 好似抵食HK$518,    雖係兩人餐, 但我地三個人食都夠.  因為秘書小姐, 佢平時個飯盒, 相信只得300 ml, 佢話真係食唔到好多野.

但我見到有流沙黑芝麻包, 加了一款點心.

有兩碗豆腐羹, 好大碗, 我同秘書小姐share食一碗得啦.  另外一位助手就比較有食力, 佢食一碗

呢款就係我加的流沙芝麻包, 唔甜幾好味

餐入面嘅點心拼盤, 其實係蝦餃燒賣春卷.  我只食了蝦餃及春卷, 燒賣咁大嚿肉我無興趣

跟著仲有兩款小菜, 蔥爆雞丁

麵醬豆卜蒸排骨...唔, 好鹹呀!

仲有鴛鴦腸炒飯

結果我地食唔哂, 兩碟小菜剩半碟, 要打包拎走.

整份餐我最欣賞係呢個甜品, 桃膠馬蹄露.

 

 埋單HK$706.20...

我又幾張酒店coupon,  可以慳幾百.

其實呢道的中菜算係麻麻, 兩款小菜我都覺得煮得唔係咁好食.  我家的家常小菜好味的.

 

黃金海岸

November 27, 2016, Sunday

星期天本來係行生天, 但昨天氣溫驟降, 我條條管好唔掂, 型爸要我在家休息, 唔好去行.

點知去到中午, 出哂太陽, 型爸又話唔好悶喺屋企, 食完下午飯, 開車去黃金海岸行吓.

兩點出發, 去到大約兩點半, 嘩, 有的得人驚, 點解前面咁多旅遊巴

星期日的下午, 都真係幾多人, 我相信呢道已經成為國內旅行團其中一個景點.

呢道嘅特色係呢棟黃屋, 呢道無特色又係呢棟黃屋.  因所有店鋪唔可以其他裝修, 全部都一模一樣, 只有門口帳篷印上店鋪名字.

行吓淤邊睇吓遊艇

同呢幅廣告落差很大呀!

行咗一陣, 我地去咗呢間餐廳飲下午茶

平時我唔鍾意坐戶外, 但今日就要坐戶外, 天氣咁好, 呢道無汽車廢氣, 坐戶外好舒服.

要了個羊肉中東包下午茶餐

型爸要了酥炸海鮮籃....咁熱氣, 我唔食得呀...淨係食咗半嚿魚


要了紅豆冰

HK$80位, 都算好平啦....

大約五點我地先離開....跟著去探奶奶, 再去探吓媽媽....咁又一天啦.

廣告的威力

November 26, 2016, Saturday

唉, 病咗成個幾星期都未好, 氣管仲有的chok, 加埋把聲仲係沙, 真係咳到好傷.

去美孚睇完醫生已經係食午飯時間, 搵唔到位泊車又怕抄牌, 哈哈, 我同型爸輪流去大家樂食飯,  輪流看著架車.

廣告的威力真係好大, 我就係睇咗廣告就好想去試吓嗰的人

呢排成日見呢個廣告, 咁去到就好想試吓 - 鹽麴沙薑雞飯

相信好多人叫咗呢份餐, 我攞餐時, 佢話叫睇number 先出去攞

攞咗啦.

哈哈, 坐我對面嗰位小姐, 原來又係叫咗呢款餐....

好嘞....好唔好味呢....

1) 奶茶...呢道的奶茶係好味嘅
2) 涼拌木耳- 呢小盒涼拌木耳好好味
3) 菜飯, 個菜飯都ok, 淡淡地我鍾意
4) 沙薑雞 - 係唔得的, 好鹹, 的雞肉實的的, 完全係唔得.  好似食緊醃鹹雞咁.  我食了三嚿已經頂唔著啦.

到我食完出去問型爸剛才食了咩, 原來佢又係食了呢款飯, 跟著又係話的木耳好味, 但係碟雞就真係唔得啦.

廣告的威力大, 但碟主菜唔得, 食一次就唔會再叫啦.