大埔走粉日

June 11, 2016, Saturday

Cindy話比我知, 屋企的麵粉差唔多用哂, 開咗最後一包.  咁趁今日星期六, 無特別事, 就去大埔走粉啦.

今次好彩, 我同型爸12:20去到, 會計部一個出咗去食飯, 一個唔知去咗邊, 唔使見到那位無禮貌的黑面神女士.   有位先生幫手收錢... 千祈唔好過咗12:30去, 食飯時間, 無人理架.

買咗一大袋麵粉, 放上架車, 跟著去大埔墟街市熟食檔食午飯


平時都會去東記食豬扒麵, 但今日唔想食豬扒雞翼, 反而比碟炸菜蒸鯇魚吸引, 好多張檯都見到呢碟蒸鯇魚

原來係呢家出品, 好啦, 今日就幫襯呢家

今日餐單, 我唔使諗啦....無選舉障礙....F. 炸菜蒸鯇魚飯

一嚟到, 飯先上....咁大碗

那位姐姐話, 最後一份蒸鯇魚....哈哈, 好彩呀!

型爸要了客家炆豬肉

我見到都驚, 我幫手食鹹酸菜啦.

的野普普通通啦, 三十幾文一份午餐, 想點!

我地見到有兩檯食緊海鮮, 型爸見到流哂口水, 我地問吓, 原來係來料加工, 樓下咁多靚海鮮, 買完拎上嚟煮都好方便.  呢道買海鮮, 一家平過流浮山, 鯉魚門或西貢啦.   咁呢道可能方便過三聖村喎, 都係熟食檔啫.    仲有手唧魚蛋, 手打牛丸賣, 原過都幾貴呀!

食完就落去街市買餸, 買的牛筋腩, 仲有黑毛豬肉呀!

返到屋企都無得停....要處理袋麵粉呀!

一大袋, 五十磅呀!

攞個穴空機出嚟

穴空膠袋

 

大大小小整咗六袋

其他嘅就無需真空, 放入保鮮盒就得啦.

到我整好哂放入士多房, 竟然比我發現仲有一包麵粉.....我都覺得奇怪, 無理由的麵粉用得咁快,  一大袋唔夠半年用哂.   哈哈,  下次要自己check check 先.

咁早的買都無問題嘅, 已經分開真空包裝, 可以好好保存.

走粉

September 5, 2015, Saturday

今早Cindy比咗張shopping list 我.... 嘩, 今日好多野要買....街市超市....仲要去走粉喎.

早上出去同奶奶姑奶飲茶, 又要讚吓美孚間陶源, 星期六早上飲茶唔多人, 十二點前點心有特價, 點心好食又抵食, 讚!

飲完茶跟著去探媽媽, 佢今日精神好好呀!  前幾日幾位姪女帶媽媽去Disney飲茶, 同的公仔影相, 攪到媽媽好開心.   工人姐姐一齊去佢仲開心, 因為第一次去迪士尼.   講真香港迪士尼我都未去過, 反而日本同美國迪士尼就去過好幾次....不過都係好多年前嘅事啦.   近來就算去日本, 都唔會去迪士尼, 無興趣玩機動遊戲呢!

上午見完兩位老人家, 下午我地就去走粉.

一點五十分去到, 我地都唔入去著.  等到兩點十分先入去, 怕的職員食午飯未返.   去年嚟時, 遇著嗰位黑面女士, 真係想寫信去投訴佢, 不過最後都無咁做, 驚投訴完佢無咗份工就唔好啦.

呢道係咪熟口熟面呀....咪就係大埔工業邨香港麵粉廠.

我地要去轉角呢個寫字樓.   入到去又見到那黑面女士, 哼, 我唔問佢啦, 見到佢對面有位女士, 我同佢講買麵粉, 那位女士非常好禮貌呢.  

 
先付款, 攞著張單再去外面攞麵粉.  HK$178一大包.

成個廠都係麵粉.....諗起上次台灣粉塵爆炸, 咁麵粉廠如果著火, 加上大風...會唔會好危險呢!   唉吔唔好亂諗啦.

一位男職員攞咗包粉比我地.   咁我地早有準備, 帶咗手拉車.   拉到出去, 我地放上車就得啦.

出到門口, 停車埸職員好有禮貌, 比咗張紙寫著辦公時間.   呢個我地知啦.

跟著我地繼續去shopping, 行市買餸, 超市買日用品....不斷買買買, 的野又重, 家庭主婦都真係好操勞架!

一大袋麵粉買到返屋企都仲有好多野要做.

哈哈, 睇吓, 真係寫著白粉架....不過係特等靚麥製, 超級根白粉

一袋50lbs, 即22.6kg, 平均唔使HK$8一公斤, 比烘焙店同超市平好多呀!   我家一個星期平均做兩至三次麵包, 真係要用好多麵粉架.   一袋可以食大約十個月.

又可以拎我嗰部好日都唔用嘅真空機出嚟啦.

 

分開包裝, 4袋3公斤, 一袋4.5公斤...剩下來嘅6公斤就入盒隨時攞嚟用.  分開包裝, 容易收藏, 真空咗, 保質期都長的啦.

唔好見到呢堆包裝好嘅粉好似好容易, 攪吓攪吓都用咗成個幾兩個鐘, 整到成張餐檯都係麵粉呀!

想慳家, 就要辛苦的架啦.

大埔半天遊

October 25, Saturday

星期六, 有節目.   今日大埔半天遊呀!

 
哈哈, 睇吓我同型爸去咗邊, 係大埔工業邨南順麵粉廠.  我要嚟買麵粉.

五號屋係一個好慳家嘅人, 一個星期整兩次麵包, 用麵粉份量都好多架.   去超市買二十幾文一公斤, 烘焙店都要十幾文,  但嚟麵粉廠買一大包就真係平好多, 仲有排用添.

麵粉係其中一款主要食糧, 價錢應該好平, 但香港所有麵粉都係進口(包括國內), 加上運費鋪租,價錢就會貴好多啦.


去到麵粉廠, 外面"實Q"叔叔好好人, 指著方向叫我地泊好架車, 跟著入去轉左手面,  見到房間行入去比錢就得啦.

我同型爸都係好有禮貌嘅人, 但遇著負責收錢嗰位女士真係有的唔高興.  十問九唔應, 你有你講, 佢望都唔望一眼, 好似見你唔到亦聽唔到, 只係佢有佢寫張收據(咁識寫收據即係知道我地存在啦).   唔知係咪我地嚟買麵粉阻著佢食午飯令佢唔高興, 但我打電話問辦公時間, 午飯時間係13:00-14:00, 最遲16:00前要到.  我地到達時都只係12:20, 但去到佢已經食緊個飯盒.

呢的人真係影響公司形象, 閘口的管理員好有禮貌, 攞貨給我們的男工作人員也很有禮貌, 但那位負責收錢的女士真係好有問題.   我好想寫封信去投訴佢, 但諗吓投訴佢唔知會唔會令佢無咗份工咁我又唔想.   好, 下次再去, 如果佢再係咁嘅態度, 要當面提醒佢!


買咗呢包金像牌高筋麵粉, 50 lbs, HK$175

對於我地揸車人士, 去同走都好方便, 攞咗麵粉放上車就得啦.  哈哈, 自己開車, 油費+時間, 都係成本嚟架.

買完麵粉, 諗起好耐無食粥麵, 既然嚟到大埔, 就去陳漢記食粥麵啦.

今日唔使等位, 坐低每人要了一個粥餐

 
 型爸要了碎牛粥

 
我要了鮮牛粥

另外要了炸兩及蔥花腸, 但要等最少二十分鐘

 
等等等, 即整好似好巴敝咁, 但食完又係擰擰頭, 的油炸鬼腍哂, 完全唔好食.


蔥花腸ok啦, 但搵唔到以前玻璃腸粉嗰的感覺囉.
  
 
一碗粥HK$25, 要炸兩及腸粉變套餐就加HK$8.

食完繼續响附近買野, 先去街市打個round買咗的餸, 跟著去買腐皮腐竹


 樹記兄弟不和爭產, 深水埔店關門, 四哥响大埔開咗新店叫全駿記


呢道無深水埔咁誇張, 只係得幾個人排隊, 好快就買好一袋二袋.

經過運頭坊, 見到一間專賣急凍食品店, 見到的Black Angus beef好靚, 又入去睇吓.

店主話响呢道開咗五年,呢款Black Angus 好有牛味, 咁每樣買的啦.  仲買多兩包薄牛片要嚟火鍋.

呢的係西班牙豬扒, 呢塊要五十幾文, 買咗四塊呀!

呢間鋪叫Cycon,  咁又買咗成HK$800

左買右買都好攰, 半天遊去咗五個景點, 都要快的返屋企啦.  嗰一大袋麵粉, 仲有好多工夫要做呀!


返到屋企, 放好的急凍食品後, 馬上拎部真空機出嚟.


我要將的麵粉分開真空包裝.  咁樣方便儲存.   哈哈, 呢袋係五號屋三公斤裝, 出面無得賣架.

   一大袋50lbs, 即係22.5kg.  真空了6包, 每包3kg, 共18kg.  剩下4.5kg就無需抽真空可以即時用.

不過都唔係好easy架, 攪吓攪吓都攪咗我一個鐘, 成張餐檯同我個身都係麵粉.

kakakkaka, 想慳錢就係咁架啦.   好彩今晚唔使煮飯, 可以好"他條"咁慢慢整.