醉榴香猫山皇榴槤冰皮月餅

September 6, 2013, Friday

今日返到屋企, 型爸對著我係咁笑, 我今日買咗的野比妳呀....吓, 咩野嚟架...嘻嘻...食完飯先啦, 一陣妳就知.

食完飯我都已經無咗年事, 到九點幾, 型爸話, 咦, 妳唔去雪櫃睇吓有咩野...

咁我去雪櫃睇吓啦, 無呀!  型爸話放咗响冰櫃呀!

原來佢買咗醉榴香嘅猫山皇榴槤冰皮月餅比我食呀!  星加坡出品, 我地上次睇電視醉榴香賣廣告, 不過我無話要食喎.....

我鐘意食榴槤, 但榴槤月餅就未買過嚟食...型爸你真好.

打開, 的月餅係粉紅色, 每個獨立包裝... 我問型爸幾錢呀....佢話幾錢都好啦, 總之妳未食過就試吓啦.

開咗一個出嚟, 冰到硬哂

切開, 入面全部都係榴槤

的榴槤冰到好似雪糕咁

今勻大件事, 全屋只得我一個食榴槤, 型爸二公子都唔食, 我要一個人全部食哂佢.


睇吓個標籤, 好彩無反式脂肪, 無膽固醇, 無鈉

型爸一路都無講比我知幾多錢一盒, 隔咗一日我再問佢, 佢先話HK$599....嘩, 好貴呀!  食開嘅大班燕窩月餅都唔使咁貴... 型爸話, 咩都要試吓麻, 其他月餅成日都有得食, 呢款妳未食過麻...咁又係.

型爸, 多謝哂!  不過只有我一個人食, 真係有排食呀! (個心諗....下次唔好啦, 我食新鮮榴槤得啦!)

當我食緊嗰半個時, Loki哄埋嚟, 點都唔肯走開, 佢放個頭落我大脾上(呢個係佢好想我比佢食嘅表現), 咁我比的榴槤佢食啦...嘩, 佢好鍾意食呀...咁有Loki陪我食啦.