LC敗家群組又多一人

呢篇响Yahoo Blog出極都出唔到, 哈哈, 竟然可以响呢個新Blog出生天....開心呀!

雖然過咗三個星期, 睇番都係好開心呀!

********************************************

August 13, 2013, Tuesday Night, 三號風球

同型爸食晚飯時, 型爸問我: 食完飯我地去CC Super好唔好呀? 

咁我問佢:去CC Super做咩呀! 有咩野買呀?

你就嚟生日, 都唔知送咩比你, 我成日見妳上facebook睇 LC敗家個group, 鍾意就買啦, 當係生日禮物好唔好呀?

唔使啦, 我睇吓咋, 屋企咁多煲煲鐣鐣, 好夠用唔使買呀...(把持中)

去睇吓啦, 我上綱check過CC super LC做promotion, 做埋呢兩日就做完架啦...(好感動, 型爸你真係好, 上綱check埋, 好有準備)

食完飯好夜啦, 唔好去啦...(繼續把持).

去啦, 無咁早收架.

食完飯揸車回家, 一路傾一路講, 已經忘記了CC super, 開車過了沙田, 型爸突然醒起....唉吔, 唔記得去CC super添....唔緊要, 兜返轉頭, 好快唧

唔好啦, 三號風, 快的返屋企啦...(仍在把持)

唔怕, 去啦去啦.....(型爸可能攪盡腦汁, 都唔知送咩比我做生日禮物...所以一定要我去...)

結果.....

LC sales 同我地講, 買滿HK$3,000, 可以join cooking class!.... 型爸不斷游說, 快的揀啦, 個仔都有份送比妳架!   五號屋失守了....
 

一開始選了這個24cm Grill Pan


跟著係呢個24cm Legumier (我覺得好靚呀!)


型爸話未夠呀, 揀多一個啦... 想買個Buffet, 但六折之後都覺得貴, 唔買著 但最終揀了這個 24cm Risotto....
 

結果合共買了四千幾..

第二天whatsapp 小杯(元老級LC用家)...我下海了...但小杯告訴我應該買滿HK$1,000就可以參加cooking class....sales 阿姐...唔係阿麻...我可以唔買Risotto, 等吓先麻.

打電話去LC, 要book到九月底才可以上堂, 佢地都話買滿HK$1,000就可以上堂...一張單可以上一堂....吓, sales阿姐, 點解唔提我可以分單呀...咁咪初班中班都可以上啦...., 唉吔...有排都應該唔會再買, 咁咪有排都唔可以上中班...(失落呢..)

其實屋企真係好多煲煲鐣鐣, 一套Amway往皇后煲陪伴多年...真係幾好用架, 由其是比工人姐姐粗用就最好, 打唔爛, 煲燶都唔怕. (嗰年唔係個皇后煲夠硬淨, 我屋企燒咗啦, 個煲救咗我間屋一次啦. 隔離屋見到有煙, 報警叫消防車, 我個工人烚奶樽後去睡午覺, 的奶樽烚到無哂水, 成個廚房都係煙都唔醒, 到消房員狂按鐘, 差的爆門, 佢先朦朦鬆鬆去開門，所有奶樽燶哂, 十個八個奶樽燒溶黐哂底, 估唔到用鋼絲擦擦番, 又新嘅一樣).  的Amway煲真係用幾十年都得呀！.當時買真係好貴，但用咗咁多年，咩都抵哂。　諗起當時, 如果唔係個煲夠硬淨, 無爆無著火, 如果燒著咗, 嗰個爛瞓豬工人同幾個月大嘅二公子都唔知點呀.... 已過去多年的事...諗起又唔捨得放棄成套皇后煲(工人姐姐仲係當佢係寶).

家裡還有五六個不同size的康寧煲, 還有Berndes兩煲一鑊, 再加上現有的鑄鐵鍋具, Grill pan...今勻真係要重組一下, 睇吓邊的可以退役...(好多都仲係好好用...唔捨得呢....)

的LC, 我要用多幾次先教Ruby點用, 首先要教佢如何清潔及養鍋(只有Grill pan黑色需要養鍋).   我唔想Ruby做我的LC廚具殺手...佢係嗰種殺完唔認...只會話唔知點解呢....

傻吓傻吓, 攞哂的鑄鐵鍋具出嚟, 28cm 6.6L Kitchenaid , 24cm Rectangler, 24cm 單柄Grill Pan

 

影張大合照先(興奮中...)....好夠用啦...唔好再買啦.


四個都係白琺瑯...唉吔, 今次應該揀個黑琺瑯麻.   唔同牌子, 白琺瑯的顏色都不一樣
 

即刻洗淨新舊Grill Pan一齊養鍋先, 咁就隨時可以用啦.

型爸...唔好再激起我的購物狂細胞...唔得掂呀!  邊有咁多地方放呀!