黃金海鮮扒冬瓜

April 29, 2017, Saturday

好耐都無煮呢個餸, 今日心血來潮, 買咗嚿冬瓜煮呢個菜

冬瓜洗淨切粒, 入蒸爐蒸20分鐘.  冬瓜水留起

急凍海鮮用少許鹽, 胡椒粉略醃

蒜蓉起鑊將海鮮略炒盛起.

三個鹹蛋黃蒸熟壓成蓉, 用油爆香至起泡, 將海鮮回鑊, 加上湯, 試味.   如要稠一點可以埋一個玻璃茨.

冬瓜蒸熟

加上黃金海鮮....咁就攪掂啦.

今餐仲有蒜椒蒸馬友

梅菜炆豬肉

螺片烏雞翅湯

今晚非常豐富, 型爸又比likes呀!

檸檬焗三文魚

May 21, 2016, Saturday

整咗個邪惡的奶油焗薯，跟著整番個清淡的先。

三文魚每面加上海鹽同黑胡椒

上面再加上檸檬

預熱焗爐180度

焗20-30分鐘，咁就ok啦。呢個溫度，的魚唔會過熟，仲有的juicy, 啱啱好呀！

蒜蓉牛油芝士焗大蝦

February 21, 2016, Sunday

昨晚家人來燒烤樂, 今晚都有party呀!  Mr. & Mrs Kua 月底要移居外地, 我地今晚同佢餞別.

家裡有9"大蝦, 今日就整蒜蓉牛油芝士焗大蝦

我將的大蝦剪去鬚腳, 由肚下面剪開, 去腸去鰓,  蝦背仍連著, 方便放蒜蓉芝士呀!

先放上蒜蓉

加上牛油芝士碎

預熱焗爐, 200度焗15-20分鐘

焗起香噴噴呀!

我焗咗20分鐘, 多咗的, 不過都真係幾好味.

的蝦睇落好多, 但每人一隻就無咗啦.

香草檸檬慢煮三文魚

September 9, 2013, Monday Night

上次見小杯用蒸爐整slow cook salmon,  我又想試吓.  昨天買咗件三文魚扒, 諗著今日放工返嚟整都好快啫. 

不過有時人算不如天算, 放工時大塞車, 塞咗個幾鐘都未返到屋企. 唔想型爸二公子等得太耐, 唯有打電話返屋企叫Ruby幫我整啦.

响電話講比佢聽, 佢接收得幾多就幾多啦..... 型爸就幫唔到手啦, 因為廚房事型爸一概不知, 蒸爐焗爐唔識用, 的野放响邊都唔知架!

哈哈, 今次整呢個Slow cook Salmon 無跟小杯用真空袋去醃, 又唔想將魚放入密實袋去蒸, 買唔到新鮮刁草, , 買了三文魚扒(唔係買魚柳)..用其他乾嘅香草代替刁草試吓啦.

我教Ruby將三文魚先用鹽及黑胡椒略醃, 塗上橄欖油, 洋蔥墊底, 放上檸檬.  魚扒上灑上香草再鋪上檸檬, 蒸爐55度焗20-25分鐘(Cristal最低度數係55)


返到見到呢的用剩嘅嘅洋蔥同檸檬....其實可以放堆落去啦.


佢唔識分邊款香草, 隨便攞了呢兩款

呢, 變成咁...香草灑得大多. 唔夠橄欖油

我返到去, 的魚差唔多蒸咗21分鐘, 我打開嚟睇, 的魚ok啦, 唔需要蒸25分鐘

雖然香草多咗, 搶咗的味, 但係三文魚肉質非常之滑, 有檸檬嘅清新香味...  型爸大讚(不過佢都話的香草搶咗的味), 連平時唔係好食魚嘅二公子都夾咗兩次.

下次五號屋要親自整一次, 睇吓味道同賣相會唔會再好的呢!

 

芝士忌廉汁藍貝

2012年12月11日下午1:35公開累積瀏覽 434 1

December 8, 2012, Saturday Night

出咗去一個下午, 六點幾先返到屋企, 不過今晚好簡單, 要食嘅野都已經全部攞定出嚟解凍, 好快啫.



响一田買嘅藍貝, 好大包呀, 要嚟做芝士汁藍貝

今次諗著用三款芝士, 意大利波龍芝士, 車打芝士, 本來諗著用Gouda, 諗起仲有少少藍芝士, 就加咗的藍芝士

用上湯加咗的芝士, 仲有的忌廉, 加埋落去煮...  試味...ok, 煮濃的就得啦.

將的藍貝沖洗一吓就放落的芝士汁一齊煮.  呢款藍貝煮幾分鐘就得, 藍貝煮得過熟就唔好食架啦.

食嘅時候, 每人配一個小法包.... 的芝士汁好濃好好味呀!

呢份都只不過係前菜啫.