中秋節快樂

September 19, 2013, Thursday night, 中秋節

中秋節如常返工, 但今日放四點.  四點十五分就急急腳走, 要返屋企接埋Loki同Ruby去奶奶屋企做節呀! 

Loki知道我地帶埋佢出去, 超開心, 唔叫都自己跳上車呀!

今日好多野要帶去奶奶屋企, 因為佢嗰道好多"架撐"都無囉.

我今日預備用Rum酒整青檸什飲呀!

呢兩個壺都係我帶去架, 有檸檬嘅就加咗Rum酒, 無檸檬嘅就無酒, 啱小朋友飲.

我地早到嘅就先食吓nuts, 飲番杯青檸什飲先啦.


晚飯奶奶又係要的工人姐姐整到成檯都係, 我地數過, 足足有十幾款, 二十四碟. (後來仲發現, 仲有三款未煮)


今日仲多咗兩盒外援, 姑奶的親戚一人在港, 叫佢一齊嚟做節, 買咗兩盒芝麻手撕雞, 好味.

我地十六個大人, 三個小朋友加一個BB, 仲有三個工人姐姐 & Loki, 的餸仲多個人, 點食得哂.  

不過呢個係奶奶嘅模式, 我地叫過佢好多次, 餸唔使多, 精簡咪得囉, 但佢唔聽, 每次都剩十碟八碟, 食剩就一定唔會掉, 佢地真係有排食. 唉....

哈哈, 我地商量, 下次過冬, 改為打邊爐, 食剩的野可以留番煮餸, 又唔使的工人姐姐煮得咁辛苦....唔知奶奶行唔行呢!

食完飯就有大量水果...個胃唔使停.

食完又輪到五號屋動手啦.


連煲都帶埋嚟, 整豆腐花呀!  帶咗兩個中size康寧煲, 用咗共四枝豆美味豆漿...

大成功, 不過整咗兩煲, 都係緊緊夠每人一碗咋...大家都話好滑好好味呀!  的小朋友食完想encore都無呀!

姑奶話雪凍係咪好味的....哈哈, 我話你可以唔食著, 睇吓有無得剩咪雪起留番明天食....佢話梗唔制, 剩都無得剩呀!

食完九點幾十點, 我地要走啦....Loki第一時間要衝出門口.

呢張黑麻麻做咩呀.....哈哈, 塞車呀!  我地行大帽山返屋企, 上到山頂塞車, 的藍色燈係警車嘅閃燈. 好多警察維持秩序.

的車泊到兩邊行車線都有, 好多人上大帽山賞月呀!


要的警察趕咗的double parking嘅車, 我地先可以走呀!

我地梗唔會落車去賞月啦!