高佬明火鍋

Oct 3, 2013, Thursday Night

昨天放工趕唔切去睇醫生, 今日盡量早的走, 卒之趕到七點前去醫務所.   呢個醫生, 我比多一次機會你, 食咗一個course 藥, 未好, 仲係好似大傷風咁, 無開消炎藥, 殺唔死的菌啦.  不過我個家庭醫生要遲多兩日先返, 睇多呢個醫生一次啦.   今次轉哂的藥, 不過一樣係無消炎藥, 我唯有自己用鹽水洗鼻, 都慣架啦.

睇完醫生, 同型爸去食飯....唉, 嗰個型爸都唔知點解咁鍾意食火鍋, 上個星期四, 我去LC上cooking class, 返嚟佢同二公子又係去咗食火鍋, 我唔舒服唔去之麻... 今日又話要食火鍋.  佢啱啱經過附近有間餐廳食火鍋, 睇落幾乾淨, 好似幾好, 佢話不如去試吓, 其實我都唔係好想, 但又唔知食咩, 咁火鍋就火鍋啦.


呢間餐廳叫高佬明火鍋, 哈, 我見嗰個男人唔知係咪老闆呢, 都唔係好高唧, 同型爸仲有一段距離.

呢間餐廳, 早市午市係茶餐廳, 晚市就變成火鍋店.

型爸今次都無亂嚟, 叫了一個唔辣嘅豬肚雞鍋

跟一碟菜

呢個係套餐HK$108, 半隻雞, 如果一隻雞就HK$198


阿姐拎咗碟醬嚟, 佢話呢的係秘製麻辣醬, 好好味架... (不過我今日唔啱食呢....等型爸試啦)

叫了雪花肥牛

水餃魚皮餃雙拼HK$28

兩個人夠食啦.

阿姐幫我地加蓋先焯熟的雞, 再焗幾分鐘就食得啦.  的雞真係好滑呀!

最後加多個烏冬就啱啱好勒.


食食吓見到張餐紙寫著有一款狗仔鴨煲, 嘩, 好驚, 唔係有狗肉食吖麻, 即刻問個老闆係咩野嚟, 個老闆笑笑口咁講, 香港邊有狗肉食吖, 只係用炆狗肉嘅方法嚟炆的鴨啫.   真係比佢嚇親呀.

呢道的招呼好好, 食咗二佰幾蚊, 多謝前多謝後.   型爸咁鍾意食火鍋, 有機會都會再嚟食.   講真呢個價錢, 我自己買料都唔得呀!