新會柑-浸酵素

October 14, 2013, Monday, 重陽節補假

哈哈, 呢個世界真係好好笑, 五號屋巴之敝咁買咗幾磅新會柑嚟曬果皮, 的果肉仲好豪咁唔要比哂工人姐姐(通常都會慳家盡量諗吓用嚟做咩)....

點知昨晚按完摩回家, 其中一位鄰居的工人姐姐抱著一大袋東西過嚟按門鐘, 佢話十一號部屋的太太有好多呢的"橙", 叫佢幫忙分比我地相熟嘅鄰居同工人姐姐.   我當其時接了手, 呆一呆...哦哦哦哦.

就係呢一大袋...真係有七八十個, 如果比Ruby搾柑汁嚟飲, 真係唔得掂喎....突然個腦閃一閃, 有第二個用途呀!

今天買了料, 就可以開工啦...

睇吓呢個陣勢就知我做咩啦....浸酵素呀!

樣樣生果都可以浸素, 咁的柑都一定可以啦, 的柑就咁食好濕熱, 但變成酵素就係有益嘅飲品, 仲可以放入雪櫃慢慢飲添

我好認真係架, 稱好份量, 每個瓶大約可用七個柑, 500g左右, 用30%糖.   我用了兩款糖, 石蜂糖及冰糖

將柑肉撕開放入消毒之瓶內, 一層柑肉, 幾片檸檬, 一層糖, 跟著又一層柑肉, 幾片檸檬, 一層糖, 每瓶四層

呢批係用石蜂糖

呢批係用冰糖


嘩, 整吓整吓, 有十一樽呀!  我屋企的"吉"樽全部用哂.

仲有十幾個柑, 等Ruby搾汁飲啦.

晚上出去, 見到十一號女主人, 的柑就係佢買架, 佢共買了4箱, 共40斤.   (哈哈, 五號屋呢的小毛, 買咗幾磅咋) 佢問我的柑肉可以用嚟做咩, 因為個個都怕濕熱唔敢食.   我同佢講用嚟浸酵素, 的柑汁變成有益的酵素, 咁就唔濕熱啦, 仲可以慢慢飲.  佢即刻比個like 我呀!