五號屋燒肉又嚟啦!

2011年11月23日下午11:23公開累積瀏覽 793 3

November 19, 2011, Saturday afternoon

今晚五號屋又有聚餐, 趁人多, 我又整燒肉呀!


上次分開兩嚿, 今次都係買一嚿大大嚿, 四平八穩, 醃時方便的.  一早起身醃好, 加上粗鹽放咗入雪櫃幾個鍾, 晚上先攞出嚟焗

 

今日要介紹吓呢個新焗盤(其實買咗好耐, 成日都唔記得用), 呢個焗盤深少少, 希望的油唔好彈到個焗爐周圍都係


放入去啱啱好, 差的又唔記得搽油, 好彩Ruby提醒我要搽的油上面呀!  如果唔係到時的皮又唔爆.


入焗爐啦! 下面都有放的水

焗咗一個鐘頭十五分鍾, 當中攞出嚟用針插過的豬皮兩次, 今次的皮爆得唔錯, 中間仲有少少唔理想(可能嚿腩肉太大嚿, 我睇著中間係爆得最慢(下次一定用針再狂插), 上次買兩嚿嚟焗又覺得太易燶), 但係我見爆得幾好, 又無燶, 攞出嚟唔焗啦, 費事過火


燒腩先切開四條, 都好靚呀!

 

可以分成兩碟.....

今次大家的反應都好好呀, 雖然有幾嚿的皮唔夠脆, 但其他全部都好脆, 佢地仲讚的味道啱啱好添呀!   五號屋焗燒腩新鮮脆皮, 味道又唔鹹, 林老闆係咁比個like呀!

Club Havana

2011年11月22日下午10:19公開累積瀏覽 247 1

November 18, 2011, Friday Night

星期三約咗的老友, 今日又約咗的舊同學, 順便興祝其中一位生日.  地點都由得佢揀.


佢揀咗Club Havana, 鍾意呢道出面嘅露台, 仲有live band
今日係Friday Night, 真係好多人....

 

呢道有個好處, 可以叫附近同一個集團旗下食肆嘅食品, 包括Island Seafood, Merhaba Turkisk Restaurant, A touch of Spice, Heaven on Earth....

型爸無陪我嚟, 不過佢比咗一張呢道House Wine coupon, 咁我地就有支免費酒飲啦.  另外仲有一張appetizer coupon - Serrano Ham with Melon,  咁就叫比大家食

 

除咗酒之外, 我叫咗兩杯無酒精飲品, Fruity Fruity & Grapeberries. 

朋友帶咗兩位從英國嚟嘅朋友, 佢地對中國食物比較有興趣, 最後我地叫咗兩間食肆嘅食品, 分別係香辣屋同天與地

不過有好處叫的唔同嘅食物, 亦有一個唔好處, 就係的食物需要好長時間先送過嚟, 有的等咗一個鐘, 而最長等咗成兩個鐘, 好彩我地大家傾吓謁, 仲有朋友帶咗的小食, 咁就等吓都無妨.


呢碟係天與地嘅口水雞


天與地嘅黑醋排骨


天與地嘅皇帝炒飯

天與地嘅食物都唔係等咗好耐, 但係香辣屋嗰的就要等個幾兩個鐘, 問個waitress, 佢話呢個時候香辣屋好忙, 通常出哂自己的單先會做外單...


泰式炒牛河

 

炒什菜


肉鬆生菜包.

 

我個朋友專登喺元朗買咗的恒香食中式食品比佢地英國朋友試吓


有皮蛋酥老婆餅, 我地每人勿半個嚟食頂著檔先無咁餓咋


另外一個朋友買咗呢支雪茄送比阿鬼佬, kakaka, 睇真的, 係朱古力cookies 嚟架. See's 出品


另外仲有一盒See's nuts chocolate, 好味, 又作為我地嘅小食兼甜品


其中一位朋友同鬼仔就嚟生日, 朋友帶咗個蛋糕嚟, 不過要收切餅費


我地叫咗11杯飲品, 6樣食物, House wine 同Serrano Ham係色費, 切餅費hk$50.  埋單我有型爸張咭, 有85折.  hk$842.70....好似好抵咁.


仲有手信帶返屋企呀!  就係呢個迷你雞仔餅, 我鍾意食呀!

攪到好夜先返到屋企, 好彩係Friday night啫.

德興集團 - 聚德軒

2011年11月21日下午11:24公開累積瀏覽 498 4

November 16, 2011, Wednesday Night

今日約咗的多年老友出嚟食飯傾謁, 地方唔想太嘈, 又要坐好耐都唔會趕我地走嘅, 走時又要方便我地搭車, 我地就揀咗.... 

尖東半島中心, 德興集團嘅聚德軒酒家, 本來想去德興打邊爐, 點知又話限食個半鐘, 超時又要加錢.  咁麻煩不如食小菜啦, 又唔限時, 又唔會趕我地走. 所以我地就去咗聚德軒食小菜.  以前都有嚟過呢道, 的小菜都做得唔錯.

我地四個人, 叫咗四餸一湯....

呢個係湯渣, 好大碟喎, 螺頭豬肚霸王花煲瘦肉, 切定四嚿螺頭放上面喎

而的湯就用呢個好大嘅壺裝著, 每人都有呢個碗仔三碗喎, 好夠飲, hk$78...抵

叫咗個孖寶, 半隻貴妃雞

本來半隻貴妃雞加條黃立鯧, 點知話魚賣哂, 唯有要白焯蝦代替, 孖寶hk$98, 如果要魚就hk$108...抵


海皇豆腐煲, 呢味味道都唔錯喎,  好似hk$78 

薑汁芥蘭又唔錯喎.


呢四餸一湯, 我地都好夠食.

其實呢道的餸都整得唔錯, 不過我地遇著個鍾意搭訕嘅伙計, 就唔係好like嘞.

埋單hk$420, 都好抵食, 我地食足三個鍾呀!


臨走見到有一個套餐大特價, 好抵食喎, 星期一至四hk$1,466全包, 半圍都只係hk733...  想食好的仲可以升級, 唔怪得之見到咁多隔離檯食套餐啦, 真係可以考慮叫多的人一齊食喎.

 

豉椒味菜炒大腸

2011年11月17日下午11:21公開累積瀏覽 211 3

November 12, 2011, Saturday Night

星期六, 早上炸完豬油渣, 晚上再嚟一個唔係好健康嘅餸....(kakakaka...係咪有病).... 今日要整味菜豬大腸, 好耐都無整過啦


主菜係豬大腸, 呢的係急凍架, 比較容易處理.  解凍後先氽水十幾分鐘至腍, 切段


另一主菜係即食鹹菜, 只要用水沖一沖, 切幼瀝乾代用


剁碎的蒜頭, 再加的切碎嘅洋蔥, 黑麻麻嗰的係搗爛了的豆豉, 用樽裝好, 隨時用都可以....呀! 仲要兩隻紅辣椒


先用薑片起鑊, 將大腸爆香, 會有好多油出嚟, 爆香之後盛起代用

 

白鑊先落鹹酸菜略烘, 加少許糖調味, 將的鹹酸菜推埋一邊, 用原鑊爆香蒜頭, 豆豉, 洋蔥 辣椒, 再同鹹酸菜一起炒勻...唔, 好香.

 

最後將豬大腸回鑊, 炒勻

再埋一個豉油豆粉糖茨... 咁就得啦...


呢碟豉椒味菜豬大腸, 真係色香味俱全架.

食嘅時候, 我的罪惡感又出嚟, 問型爸同二公子, 下次整嘅時候, 係咪應該將大腸入面嘅肥油,清哂佢先, 咁咪食得安心的囉.   點知型爸同二公子二口同聲話, 拎哂的油出嚟咁咪唔係豬大腸囉.

對於呢的餸菜, 真係又愛又恨, 咁肥膩嘅野, 真係只可以好久先食一次...

唔....仲有一個方法, 就係portluck時整, 人多, 每人都只可以一嚿起兩嚿止, 咁都可以過吓口癮.

柱侯蘿蔔炆鴨掌

2011年11月17日下午10:18公開累積瀏覽 173 0

November 12, 2011, Saturday Night


响街市見到的鴨掌, 咦, 好耐無食過, 又買的嚟整吓.

呢的係急凍鴨掌嚟架.  對於我呢的一個星期先買一次餸嘅人, 通常都要食frozen food架啦.  不過只要烹調得宜, Frozen food 都可以好好味嘅

白蘿蔔一大個, 鍾意點切都得.   預備一嚿薑, 切幾片用嚟起鑊

 

將的鴨掌先走油, 盛起備用.  用薑起鑊, 將蘿蔔爆香, 鴨掌回鑊, 加柱侯醬炒勻, 加水加蓋炆煮至腍... 咁就得嘞 

呢碟蘿蔔炆鴨掌超易整, 仲好好味添