二釀梅酒

2013年5月11日上午11:52公開累積瀏覽 384 0

May 5, 2013, Sunday

今日去大埔街市, 其中一個目的係去買青梅, 上次買HK$20三磅, 今日去睇, 都係一樣, 不過我今次買夠6磅呀!

跟著買咗一酲2.59L嘅九江三蒸(33度), 一酲2.59L嘅九江雙蒸(29度).  今次要浸度數高的嘅酒, 朋友話高的度數嘅酒, 可以迫出青梅嘅味道.   浸泡一年, 的酒精道數會自己降低.  我唔識呀, 咁咪試吓囉.   嘻嘻, 花費唔多, 但最緊要好玩.

今次的青梅好靚, 無咩花皮喎.

睇吓, 好大陣象呀!  洗淨, 去蒂, 用廚紙先抺乾

為咗可以即日即時浸酒, 我用個抽濕機幫手, 我唔敢用風扇吹呀, 驚吹到的皮變啡色.  (入瓶前先將青梅刺孔)

用一個薑醋5公升大瓶(瓶子洗淨抺乾, 再用酒抺一次消毒),  呢瓶會用九江三蒸嚟浸


今次用了單晶黃冰糖

先放梅, 再放冰糖, 再加上黑糖

最後加入2.59L九江三蒸.

寫上份量日期, 貼上標籤.   屋企只剩吓100g 黑糖, 用埋佢, 將冰糖的份量調高

呢一大瓶攪掂啦.

跟著到九江雙蒸.  用了九江三蒸嘅空瓶, 將九江雙蒸一分為二(哈哈, 兩個瓶都唔使消毒)

再加入青梅, 呢樣就麻煩的, 因為有酒喺入面, 一放的梅落去, 的酒會彈上嚟, 要小心輕放, 仲要搵個蓋頂著...但係都會彈的酒上嚟.

跟著加冰糖 & 紅糖....嘻嘻, 屋企買咗一包, 試吓新口味...紅糖黑糖都係咁上下.


呢兩瓶又攪掂


兩瓶嘅份量有的差別, 用糖量亦都有所不同.

攪掂3大瓶, 仲有200g青梅剩, 但又唔想浸梅汁....無酒了....呀!  仲有一枝.....

廣東米酒, 呢枝都有29度

啱啱仲有100g 單晶白冰糖, 份量啱啱好....  呢款遲的我會加蜜糖呀!


寫好, 貼上label

大功告成....加埋上次用清酒浸嗰3L.....明年會大豐收啦.....

其實當其時唔醒起, 200g青梅, 可以用嚟浸鹹梅汁, 咁上次一瓶用糖浸, 加一瓶用鹽浸, 咪鹹甜都有囉..... 不過我又想試吓一瓶加蜜糖...真係心多多.

浸好之後, 睇吓掛响雙蒸及三蒸酒位瓶上嘅leaflet....入面有教浸梅酒嘅方法,  用九江雙蒸嚟浸, 酒, 梅, 糖嘅比例係1:1:0.7....1-2個月就將瓶搖晃, 等的糖均勻撤佈....浸2-3個月就可以.....嘩! 咁快, 又話要6個月至1年.....

無他嘅, 我諗浸耐的純的啫....唔知可唔可以浸3個月, 跟著邊飲邊繼續浸呢!   好心急試吓的味道呀!


原來九江三蒸係用嚟浸藥材酒架.  三蒸價錢貴過雙蒸, 我諗著貴的即係靚的純度高的麻. 不過度數高的, 的酒咪烈的囉.

我仲係覺得好好玩呀....唔知仲會唔會再買的嚟浸的唔同口味呢!

我呢道的鄰居, 耗酒量頗大, 遲的Mrs Kua返嚟, 佢鐘意飲梅酒, 到時可以攞出嚟宴客啦....開心!