杏仁蛋奶露 - 懶人叮叮版

March 30, 2018, Friday

四天嘅復活假期開始, 今日要帶狗狗去沖涼, 因為每次都係沖完一隻到另一隻, 我地都係因著時間, 車兩隻寶貝出出入入.

下午三點幾, 突然好想食甜品, 但又唔係好想點郁....有啦...整個叮叮甜品啦.

一小盒裝奶, 兩隻雞蛋

預備一隻大湯碗, 加6湯匙杏仁粉, 用大概一杯水熱水開溶.   跟著將盒裝鮮奶加埋落去拌勻.   輕力將生雞蛋打落去, 然後放入微波爐叮三分鐘,

 

拎出嚟睇吓, 覺得隻蛋生咗的, 跟著再叮多分半鐘

睇吓熟哂啦...下次四分鐘得啦....

突然醒起, 二公子今日放假响房喎, 無預佢添.   唯有將我嗰碗比咗佢.

我同型爸每人都有一碗, 不過雞蛋就每人半隻.   雞蛋剛熟, 好柔軟, 型爸話呢碗奶露味呀!

二公子突然在樓上叫落嚟, 媽咪呢個甜品好好味呀!...

嘻嘻,  一個叮叮甜品, 都唔使10分鐘就呃咗佢兩父子個心啦.