華記蠔仔粥

Jun 30, 2018, Saturday

Cindy 返咗緬甸,  星期六日就係我同型爸的勞動日, 洗衫晾衫熨衫吸塵拖地清潔.....一個星期的家居清潔, 就喺呢兩日做....    家有兩隻長毛太....一屋都係狗毛...

型爸下令...唔好煮飯, 我地出去食....咁就可以唔使洗碗同清潔廚房.

其實呢幾日放工晚晚都出去食, 食到開始有的壓....今日型爸話食蠔仔粥....都好喎, 簡單的無咁肥膩

呢間華記蠔仔粥上次食過都唔錯, 今日聽到個侍應講, 呢間蠔仔粥由香港仔搬到嚟上水.

蠔仔粥(其實可以叫泡飯)係咁多款粥之中最貴, 要45元.  其他的大都40元

但一送到嚟, 係就會覺得45元係物有所值....睇吓的蠔仔多到...加埋個湯底, 芫茜芹菜冬菜碎...好香呀!  食落都好正...

我要了豬潤魚腩泡飯蕃茄湯底.  HK$40 味道都好好.  但相比起蠔仔粥, 蠔仔粥更惹味呀!

食一碗都已經好夠...