五號屋的部落

2014年9月7日星期日

伯樂軒餐廳

September 1, 2014, Monday

今日晨早起身, 煮好早餐, 淋花先出門口. 今日新工人姐姐到港, agent會train幾日, 星期四五先去接佢返嚟, 我仲有幾日要忙呀!

呢排唔單止私忙, 公亦很忙, 仲要頻頻上大陸呀!

今日慢麼麼同麻煩鬼同事都唔得閒, 但有豆豆媽咪陪我食晏.

豆豆媽咪有咗BB, 唔想佢行咁遠, 行去半島中心, 睇吓I-Cafe有無位...

未到I-Cafe己經見到好多人等位, 但隔離嗰間伯樂軒有位喎.

呢間伯樂軒, 响尖東做野咁多年都未幫襯過, 今日有位就幫襯吓啦.

哈哈哈哈, 坐低就知點解今日有位, 原來係廚房嘅抽氣扇壞咗, 一開爐炒的熱氣就谷番入嚟, 今日只買兩款飯, 1)豬扒腸仔飯，ｏｒ　２）香茅雞, 豬, 豬頸肉.

我同豆豆媽咪都無所謂, 坐低就食啦.

豆豆媽媽要了茄汁豬扒腸仔飯, 凍華田. HK$39. 我好怕呢的咁樣嘅咖汁, 但豆豆媽咪話味道都ok.

我要了香茅雞扒拼豬頸肉, 配熱好立克. 平時雙拼要HK$41, 但今日HK$39. 碟飯好大碟, 的汁都幾好味. 但我食了一半就食唔落, 自備了膠盒, 食唔哂, 自己pack好, 一陣晏的先食.

呢排個胃都仲係唔舒服, 食野好快頂著, 都係少食多餐好的.

一路食都有的熱同焗,下次嚟希望唔好仲係咁啦.

呢間的食物係普通茶餐廳質素, 但亦唔太差, 久唔久食一次無問題.

2014年9月6日星期六

煎羊架 + 黑松露白汁意粉

August 31, 2014, Sunday Night

昨天頻撲了一天, 又要做家務, 唔習慣, 腰骨好痛呀! 今日都係無得停, 繼續執屋, 清理後園, 淋花, 真係做到無停手.

跟著仲要出去買野, 超市補貨....忙呀忙呀忙呀!

出門前先醃好羊架, 一陣返嚟煎就得啦.

買完野返嚟就煮意粉

今次係Fettuccine, 煮8分鐘就得啦.

呢的意粉一卷卷, 要用一大鑊水煮呀!

鬆開煮好加蓋多爐7-8分鐘

跟著就無停手, 煮個黑松露醬白汁

煮好嘅意粉用橄欖油撈吓, 醬汁另上.

今日偷懶, 只係用易潔鑊煎羊架, 之前整好個牛肝菌汁...跟著好快就食得.

三個人, 咁又攪掂一餐.

平時有工人姐姐幫手洗碗碟, 而家一個人做哂, 好攰呀!

瞓落床腰骨超痛呀!

2014年9月5日星期五

外賣七餸一湯

August 30, 2014, Saturday

個廚房比我執野攪到七國咁亂, 二公子的朋友嚟咗, 好彩得幾個人, 佢地嚟都係捉棋玩遊戲.樓下比我整到七國咁亂, 佢地幾個人响二樓個廳玩都夠地方.

佢地玩咗幾個鐘, 我問二公子佢地晚飯一唔一齊食.....佢地話食呀.....但今日自己煮攪唔掂, 無預餸. 下午佢地已經叫咗pizza, 唔通晚餐又食pizza咩...

個腦突然彈出...知味小廚...外賣小菜咪得囉. 快的執好的廚櫃, 即刻出去買.

哈哈, 買完返嚟, 好想將的餸由外賣盒轉落碟, 食落會開心的. 但諗吓都係唔好, 的發泡膠已經唔環保, 但已經用咗, 如果轉碟, 一陣仲有排洗呀!

拎咗兩個康寧煲出去, 一個要嚟裝重慶麻辣雞煲. 佢的朋友仔以為係我煮添.

一個要嚟裝例湯, 青紅蘿蔔豬骨湯.

其他就要用外賣盒啦.

紅燒什菌豆腐

風沙椒鹽排骨

西芹鮑菇辣炒蝦球

飛天通菜

茄子魚腩煲

薯仔牛柳粒

六個人, 七餸一湯, 個雞煲都食唔哂. 不過唔緊要呀, 個雞煲可以留起, 我地用嚟做麻辣鍋湯底呀! 去店食, 都係食完雞煲用嚟做鍋底打邊爐.

雖然今日唔係自己煮, 但二公子的朋友仔食好開心, 因為的餸碟碟都好惹味呀!

今晚外賣都唔使五百文, 平過叫pizza. 但要出動我同型爸去攞外賣...kakakaka...人工又貴咗的啦.

2014年9月4日星期四

Loki 覆診

August 30, 2014, Saturday afternoon

今早好忙呀, 沒有工人姐姐, 晨早食完早餐, 跟著就要開工做家務.

本來agent話新工人要兩個月先到, 仲諗著有大把時間整理好的廚櫃雜物櫃, 之前Ruby將的野左放右放, 我都要自己清楚知道的野放邊道. 突然間又話新工人下星期到, 攪到我要馬上開工, 將櫃內的野從身編排, 新工人跟著就得.

當我摷開哂的野, 執到一半, 唉吔, 差的唔記得, 今日要帶Loki覆診呀. 馬上要停低, 即刻帶Loki出去.

Loki上次食咗的藥, 過幾日就好番哂啦, 轉眼就活潑崩崩跳. 今次本來淨係覆診加打預防針, 點知醫生話Loki要減肥, 跟著又話遲的要食的健筋骨的糧. 姑娘又提議比的健齒水佢飲. 結果又要千幾文.

呢樽250ml嘅健齒水 , HK$500

醫生話我地無日日幫Loki擦牙, 而家有牙石. 要我地最好日日幫佢擦牙, 姑娘話再飲的健齒水...我隻狗真係矜貴呀!

同Loki睇完醫生已經兩點, 由上環返新界北, 要個幾鐘... 好肚餓. 突然好想食嘉龍豬扒包 .

型爸話想食就去食啦.

兩點幾, 每人一份下午茶餐

好耐之前食過一次, 覺得好好味, 但今次的飽同上次唔同嘅. 個包唔都同咗.

咬落去塊豬扒好似用鬆肉粉醃到怪怪地....失望!

型爸要了雪菜肉鬆炆米, 佢見我唔鐘意食, 幫我食了半個包, 再分的炆米比我食. 食少少啦, 已經無咩食慾啦.

每人一杯飲品, 咁又攪掂一餐.

無咗半日時間, 快的返屋企執埋的野呀! 呀! 醒起二公子好似話叫的朋友嚟玩... 唉吔, open kitchen.. 張餐檯大混亂呀!

2014年9月3日星期三

家中早茶點心

August 30, 2014, Saturday morning

星期六早上, 晨早起身整早餐, 今日唔要食多士麥皮, 同型爸在家吃點心.

咁勁? 自己整點心? kakakaka, 梗係唔係....

超市有咁多急凍點心, 一蒸就得啦.

再沖杯茶

蒸好放落碟, 排到靚靚

家中點心早茶, 都唔錯架! 唔使等位呀!

2014年9月2日星期二

蒸飯+ 碗仔翅

August 29, 2014, Friday Night

呢幾日工作真係好忙, 國內想租的地方結果租唔到, 唉, 有時唔係想點就可以, 真係睇吓好唔好彩, 只差一天, 結果比人租了半層.

但好與唔好無人知嘅, 結果最後要了另一座低層, 租金貴的, 地方又大的嘅地方...今次真係同老闆下了一個很大的決定, 跟著幾個月就有排忙啦.

型爸出去同朋友食飯, 二公子返夜班, 咁我放工打比二公子, 買蒸飯返去食好唔好. 佢話好呀, 好耐無食過.

我好老定咁揸車去上水東記, 去到呆咗, 好耐無幫襯,原來已經執咗... 變咗零售店. 吓, 咁點呢, 經過7 11, 真係有諗過求其買盒龍鳳酒家嘅急凍蒸飯就算, 但又覺得好對唔著二公子, 結果行咗幾條街, 見到馬仔記客家菜有蒸飯賣....個心都舒服的....話哂都係新鮮蒸.

二公子要了新皮牛肉餅飯, 佢話幾好味喎.

我要了鳳瓜排骨飯, 兩款飯都係HK$22.

返到屋企, 仲有每人一碗碗仔翅

哈哈, 蒸飯+碗仔翅, 都係一個幾好嘅配搭呀! 二公子話好好味, 咁我個心都舒服的.

呢排我好忙, 星期六日先自己煮啦.

2014年9月1日星期一

板長壽司 - 祥華店

August 28, 2014, Thursday night

Ruby今天離開我屋企啦, 貶眼又四年, 期間有做得好時亦有做得唔好, 雖然懶咗的, 但Ruby都係一個信得過的人, 我同型爸常常出門, 我地都好放心.

新工人本來都未知幾時到, agent本來話要十月中先到, 我同型爸麵諗著呢段時間, 屋企就由我同型爸每人負責一的啦.

但有時的野就咁, 當我由大陸差唔多返到香港, 型爸whatsapp我, agent通知, 新工人下星期一到,agent會train佢幾日, 攞埋身份證先去接佢返嚟. 哈哈, 我同型爸嘅part time job又唔使做好耐.

晚上問二公子想食的咩, 哈哈, 佢話要食板長壽司, 佢要儲分呀! 其實我已經儲夠分有折, 但佢拍拖成日都會出去食, 咁想自己儲分都啱嘅.

貪方便唔使等位, 去咗祥華店. 泊入停車場, 見到收費頭一小時HK$15, 第二小時要HK$30....嘩, 要食快的先得啦.