蛇王兄

2011年2月20日下午3:08公開累積瀏覽 32 1

February 18, 2011, Friday night

 

今日放工之後又要趕去買餸, 明晚又會煮一餐.  但明天早上約了哥哥姊姊飲茶傾媽媽的情況, 無時間去買餸.

放工之後去街市, 好多都開始收檔, 所以又要快快快... 哈! 不過一個鐘就攪掂, 皆因一早寫定要買咩.

今日一早決定唔返屋企食晚飯, 因為二公子約了朋友仔回家打邊爐, 咁我同型爸咪出去撐檯腳囉.  突然醒起, 今年好似仲未幫襯蛇王兄喎, 今日又濕又凍, 食蛇羹好暖呀! 

買完野就開車過去....嘩! 又係滿哂座要等位, 擺响門口張檯都坐埋.  好彩等咗唔係好耐都有位, 架車仲可以泊响門口(如果有警察抄牌, 都可以立即駛走架車).

呢度响太子道與基隆街中間嗰段砵蘭街, 以前隔離附近無咁多食肆, 而家多咗好多.
之前去過蛇王兄上水另一間店, 但唔知點解, 覺得嗰道的蛇羹無呢道的咁好味.  我地寧願遠的都嚟呢道幫襯.

未有位就睇定食咩野, 今年加咗價lu.

最後我地決定每人一個餐, 我要A餐, 型爸要B餐.

呢度的service都幾好, 每樣分開上.  蛇羹先上.

每張檯都放咗薄脆, 可以加落的蛇羹一齊食.

仲可以加的檸檬草. 

加咗薄脆, 檸檬草同的蛇羹一齊食, 好香.  的蛇羹好香, 好多蛇肉.

型爸嗰碗係大蛇羹, 真係好大碗.  我食完碗細蛇羹都飽咗一半.

我地差唔多食完碗蛇羹, 佢地上埋兩碗細糯米飯, 我同型爸都要潤腸.  好夠, 比咗少少型爸幫幫手.

最後上埋兩碗龜苓湯(我地兩個餐都由蛇湯轉龜苓湯, 每個餐加hk$6).  我地見的龜苓湯好濃, 仲寫著清熱解毒, 呢兩日天氣咁濕, 啱哂.

臨走, 我地仲買咗半斤鵝肝腸返屋企試吓.  兩個餐加埋hk$160, 再加hk$12轉龜苓湯. 另外再買咗半斤鵝肝腸hk$55返屋企試吓(明日會整一個叫鳳眼卷嘅餸, 可以即刻試吓.

食完成身暖哂, 好味.. 呢餐花費唔多, 但我地覺得好味好滿足.