五號屋的部落

2011年2月11日星期五

兩款脆皮年糕

2011年2月21日下午2:37公開累積瀏覽 480 1

February 19, 2011, Saturday Afternoon

下午睇完媽媽就返屋企, 有好多野要準備呀! 下午約咗兩個同事嚟屋企台灣牌竹戰, 再加埋小b媽, 咁就啱啱好啦. 我地呢個組合, 自從小b出世以來, 一年多未有一齊打過牌啦.

安排好今晚嘅餸菜, 就開始整脆皮年糕. 上次帶咗半底雞蛋椰汁年糕返公司比同事食, 佢地話好味, 仲話想試吓另一款忌廉牛奶版本. 今次一次過做兩款, 改用兩個圓盤, 每個半底份量.

兩款材料分別是:
忌廉鮮奶脆皮年糕 - 雞蛋1隻, 忌廉1杯, 牛奶半杯, 糖190g, 糯米粉250g
雞蛋椰汁脆皮年糕 - 雞蛋5隻, 椰汁1杯(250 ml), 糖190g, 糯米粉250g

兩個recipe整起嘅份量差唔多. 但左面忌廉加鮮奶的質感"稀"很多, 下次做, 我會試加多50g粉, 即300g糯米粉. 而雞蛋椰汁年糕, 拌勻的粉漿, 感覺上稠很多.

以我咁心急嘅性格, 梗係一次過焗兩個啦. 疊起少少, 啱啱可以放兩個焗盤.

焗咗10分鐘, 入面個忌廉鮮奶已經brown brown 地, 都係將兩個焗盤掉轉放.

雞蛋椰汁放入面, 忌廉鮮奶放出面. 焗咗二十幾分鐘, 嘩! 兩個都升到好高好醜樣呀!

三十分鐘, 我就將兩個都反轉倒入焗架. 入面個椰汁雞蛋年糕, 超醜呀, 皺哂皮咁, 個糕好軟, 仲比我整裂咗少少.
跟著兩個同事到啦, 大家傾咗一陣, 食咗的蜜瓜火腿, 就開檯啦. 咁我無理的年糕啦, set 咗timer, 夠時間就叫Ruby用枝竹籤插入去睇吓熟未. Ruby話不如焗多10分鍾, 咁就比佢焗多10分鐘啦. 焗好就叫佢攞出嚟cool down. 我當其時打緊麻雀, 出爐無影到相.
過咗無幾耐, 陶陶媽走過嚟睇吓我地做咩野(佢見到小b爸/媽架車), 哈! 既然佢嚟到, 我唔得閒切的糕, 就叫佢幫手每款切半底比大家食啦.(真係唔該哂). 佢仲幫我地添茶(真係唔好意思) . 第一個半底係忌廉鮮奶, 好快食哂, 打緊牌無影到相. 而再切第二個半底, 大家都有的飽(食咗好多火腿蜜瓜), 有幾件剩低.

所以先有機會影番張相. 其實兩款年糕食起口感好相似. 我較為喜歡雞蛋椰汁年糕, 好香雞蛋仔味.

呢兩份就係剩番嗰兩個半底. 相比起忌廉鮮奶, 雞蛋椰汁年糕(右)焗起大底的. 我都係鍾意用方型焗盤, 焗起好似靚仔的.
將兩款都切開入盒, 星期一可以帶返公司. 連續整咗咁多次, 雖然唔同parties食, 都真係要停吓啦. 同事千祈唔好再叫encore啦....

2011年2月10日星期四

難忘的年初五

2011年2月10日下午1:53公開累積瀏覽 29 0

February 7, 2011, Monday 年初五

姊姊一早打電話嚟, 佢同姊夫帶媽媽去就近健康拆線, 問我記唔記得媽媽的身份放在那裡, 他們出門太怱忙, 搵唔到媽咪身份証. 我記得在醫院我親手幫媽媽將個身份証放入手袋, 應該唔會唔見, 返去慢慢搵一定搵得到.

姊姊話媽咪傷口有一針爆線, 要小心唔好濕水. 媽媽胃口好差, 呢兩日都無咩食野, 粥都係食得好少, 仲連績兩日都有發冷. 聽到我心都實埋, 即刻起身, 用腐竹煲白粥做粥底, 再落的魚肉免治豬肉落去, 等的粥甜的. 的粥煲好就去睇媽媽...

去到見到媽媽, 佢好似好攰, 叫佢食粥, 佢話好味, 但都係食得半碗, 咁點算, 食咁少, 邊有energy, 見到佢無氣無力. 唯有叫佢休息多的.

跟著幫媽媽執吓屋, 兩個姪女好乖, 嚟探grandma, 仲幫手清潔廚房家居.

過咗差唔多兩個幾鐘, 叫媽媽起身再食少少粥, 佢都係食得好少, 食完坐咗一陣, 仲開始發冷, 口唇發白, 額頭同手腳都冰凍, 全身不斷咁震, 仲要我地幫佢蓋四五張綿被, 都仲响到震, 跟著仲嘔, 真係見到都心痛.

姊姊落去醫務所, 睇吓邊個醫生開門, 但好多個醫生都仲休息未開. 諗諗吓, 咁攪法, 唔掂, 決定打999call白車, 的醫護人員嚟到, 話媽媽發緊燒, 39. 幾度, 但我摸媽媽額頭, 一的都唔熱, 手腳額頭都仲係冰冷. 醫護人員話發冷即係發燒, 我地真係無知, 竟然唔知.

去到醫院, 仲要等分流, 真係好多人, 好多都係年紀大, 見到醫院的姑娘醫生, 個個都咁忙, 佢地真係好辛苦. 我地等咗都唔算耐, 差唔多兩個鐘, 媽媽要留醫, 嗰道真係爆滿. 的姑娘醫生都好好.

見到媽媽吊鹽水, 食咗藥的面容好咗的, 晚餐可以食到半碗粥, 有醫護人員照顧, 個心都安樂的.

我咁大個人, 都係第一次打999, 第一次坐救護車入醫院. 响醫院企足幾個鐘, 條腰痛到不得了.

攪咗一日, 我同姊姊都又攰又餓, 型爸嚟接我地走. 雖然屋企煮好飯, 型爸叫我同姊姊不如即刻出外食少少野先啦, 但真係好攰, 唔想郁, 淨係想快的返屋企.

成個人攰到傻咗, 真係難忘的一天.

2011年2月8日星期二

脆皮雞蛋椰汁年糕

2011年2月8日下午12:50公開累積瀏覽 999 0

February 5, 2011, Saturday, 年初三

今年整咗蘿蔔糕, 芋頭糕, 但就無整傳統年糕. 因為我要整呢個脆皮年糕. 呢個recipe係參考自基絲汀嘅recipe

預熱焗爐180c

將焗盤用油掃勻

材料好簡單: 雞蛋10隻, 椰汁1礶(400ml), 糯米粉(500g), 糖(400g). 我再加了半杯忌廉(可加可不加)

做法: 將糖與雞蛋打勻, 加椰汁&忌廉, 最後將糯米粉篩入蛋漿拌勻至沒有粉粒. 最後將粉糊過篩落焗盤(的粉漿更幼滑, 一定無粉粒). 入焗爐焗1小時. 這個recipe份量頗大, 可以用大的焗盤, 如果焗盤細, 粉糊太厚好難焗得熟熟.

焗嘅時候, 通常都會四面升起, 中間部份唔會升得太高.

焗咗40分鐘後, 我會將個糕從焗盤倒出翻轉放落焗架, 再焗20分鐘. 等個糕底面都可以焗脆. (的粉漿一定要焗至凝固才可翻轉焗個底.

焗好啦, 個樣唔係好靚係咪? 個樣醜, 但係好美味, 個個食親都起碼兩個讚.

呢個脆皮年糕要熱食先至好味, 所以通常都會食之前切好放入焗爐焗5-10分鐘. 如果入多士焗爐, 焗5分鐘就夠嘞.

焗脆的仲好味..

銷情理想, 初七要再整. 初十星期六奶奶佢地嚟又要整, 佢地話等著食呢個年糕.

2011年2月7日星期一

Amrut Fusion Single Malt Whisky- Third Finest Whisky in the World

2011年2月7日下午2:23公開累積瀏覽 63 0

February 4, 2011, Friday 年初二

我地訂咗隻火腿要嚟做小食送酒, 林老闆就帶咗支 2010 Jim Murray's Whisky Bible, 排名第三嘅Amrut Fusion Single Malt Whisky 過嚟飲.
我平時好少飲Whisky, 但呢支真係要試吓. 嘩! 飲完個陣香味, 真係可以留响口裡面好耐, 真係好正. 呢隻酒真係唔需要加冰, 就係咁飲, 好香好正.