除夕夜六號屋燒烤, 五號屋Karaoki & 倒數

2011年1月4日下午1:11公開累積瀏覽 98 0

December 31, 2010, 除夕夜我地又開party啦

 

今次喺六號部屋outdoor cafe BBQ, 好多人一齊共渡除夕呀!

又係有不同款式嘅燒烤食物

有隻麻辣腸非常好味, 的大蝦都好爽口

今次有樣好特別食物, 不過唔係幾健康, 高膽固醇就唔好食咁多啦.

今次人多, 要開兩個燒烤爐, 的菇類, 魚呀, 可以擺上架燒, mass production, 大家一齊有得食.

另外一個部屋整咗蝦多士, 嘩! 好味呀.

仲有越南春卷

包埋生菜一齊食就仲正啦.

大量飲品供應

仲有鄭小b媽整嘅芒果糯米池

另一個部屋帶來羅浮山山水豆腐花

當然仲有我整嘅Rum Ball 啦.
紅酒汽水都飲咗唔少, 燒烤到十點幾, 個個開始飽, 天氣又越來越冷.  的男士開始轉戰五號屋Karaoki, 我都返去陣守大本營.

攪吓攪吓, 全部人都轉戰五號屋, 真係好熱鬧

八號部屋因為要join另一個除夕party, 唔能夠出席, 不過贊助兩支香檳, 差唔多零晨我地就開定香檳, 預備倒數. 
呢個時候我就打電話比大公子, 祝佢生日快樂. 
跟著全部人一齊倒數, 10, 9 , 8 , 7 , 6, 5, 4, 3, 2, 1,  Happy New Year!  真係好開心...

五號屋當然都預備咗枝香檳啦!
唱到咁上下, 的人都開始陸續走啦, 當然仲有幾個部屋繼續落去

我地的香檳飲哂, Mrs Kua 又攞埋佢屋企枝香檳過嚟....我地又飲埋佢啦.

今次用咗呢隻香檳杯, 雖然唔係貴野嚟嘅, 但係好攪鬼,

的酒一倒入去就好多汽, 一路旋轉, 好正呀!
到最後剩番幾個人, Mrs Kua 意猶未盡, 繼續karaoki, 咁我地繼續飲啦.

飲哂香檳就飲白酒... 漸漸, 好似淨係得我同Mrs Kua 兩個繼續飲...

跟著再開多一枝...

唱K唱通頂, 真的飲得太多, 頂唔著要瞓啦.... 好耐都未試過...真的醉了.

來去匆匆的三日兩夜台灣之旅 - Day 1

2012年1月4日下午10:10公開累積瀏覽 214 3

December 30, 2011, Friday

今天早上仍要上班, 要趕埋份report比老闆, 趕趕趕, 攪掂啦, 十一點半離開公司, 趕得切去機場.....


一點四十分班機, 預先online check in, 一切順利....

我同型爸去台灣呀!   咁突然, 係呀! 型爸應承咗相識多年嘅台灣朋友, 過去食尾牙飯呀!


一坐先知原來呢班係國泰新出嘅經濟客位.  左面安全帶有條厚綿

獨立電視個screen都好似大的.

仲有獨立义電插座, 真係方便呀!

 

一個小時25分飛行時間, serve呢個麵包作為light lunch

到咗之後, 朋友接我們先去他們公司, 咁我地就放低預先準備嘅手信.  

晚上, 朋友帶我們到明水三井食日本料理, 訂咗2館, 朋友話比較清淨, 我第一次嚟, 唔知呀, 覺得裝修非常雅致.

朋友點菜, 點咗好多野食呀! 我地七個人, 全部食品, 都係每人一份

鮑魚刺身

龍蝦刺身

魚生刺身, 隻蝦頭攞咗去炸, 炸完好鬆脆, 好味呀!

紅燒紅喉, 呢款魚香港好似未食過, 的肉好滑, 真好味!

燒蟹腳, (我後來去1館那邊看那些大魚缸, 嗰的長腳蟹全部都好大隻, 隻隻生猛)

巨型扇貝, 真係好大隻

睇吓盛著個扇貝嘅盛器就知嘞,

 

生牛肉

呢個好好味嘅壽司, 放到最後先食, 但係我原全唔記得係咩魚呀!

叫嗰位侍應小姐送咗的炸藕片同牛蒡片, 要嚟送酒.   我地七個人, 飲咗兩支whisky呀!  唔知點解, 我飲咗的whisky個喉嚨好似舒服的, 無咁咳喎. 咁繼續飲多幾啖啦.

呢個係咩...

係湯嚟架, 飲落去有的白色東西, 原先以為係豆腐, 原來係魚"wok", 即係魚公的精子(白色), 母的是魚子(橙色)

台灣蓮霧加巨鋒提子

甜品芝麻雪糕加紅豆湯

嘩嘩嘩! 食到捧著個肚.   跟著走去參觀1館嘅海鮮, 但係唔記得影相呀!

食完飯, 我地就返酒店check in 啦.   本來都唔係諗著住呢間酒店, 但係訂唔到房呀, 訂到呢間都算好好彩呀!  明天係大除夕, 呢道的房全滿仲要加錢添呀!

朋友問我地去唔去飲野, 都好夜, 明天又有飯局, 都係早的瞓啦.  check In 之後就馬上上房

 

睇吓個電梯幾大, 仲有張長椅可以坐

入房之前係停車位, 我地而家先知係汽車酒店, Theme Hotel, 每間房有唔同特色.  我地叫旅行社幫我訂package.  原來呢間酒2至5樓係Theme Hotel 叫台北戀館, 6樓以上係商務酒店, 和璞飯店.   全部房間都滿. 訂到都算好彩, 因為我地指定要住內湖區, 方便朋友接送.

我同型爸都未住過呢類型酒店, 試吓啦!

 

房間都唔算細, 好過以前在台北住嘅橘子飯店, 呢道大好多.  牆身都係鏡, 再加上珠簾

床尾有呢個acrylic 檯同cushion

全個洗手間都鋪滿馬賽石, 真係睇到眼都花, 不過設備齊全, 按摩浴缸, shower

 

全部都係玻璃設計, 真係只適合夫婦或情侶

Toiletry 就好齊全...

梳洗完都差唔多十一點幾, 好彩無應承去飲野, 都係快的瞓.  我同型爸都仲係有的咳呀!

有了Loki的子

2012年1月3日下午10:04公開累積瀏覽 301 3

估唔到, 一個決定令到我和型爸的生活有了很大的改變... 家裡突然間多了一個好需要愛護和照顧嘅小朋友咁.

狗的年齡最多去到十幾歲, 見過好多朋友, 養咗好耐嘅狗狗去世, 傷心到不得了.  還想起三家姐當年養的Jessie (Swiss Mountain Dog), 好乖好懂事, 每次去探姊姊, 都又攬又錫.  的狗真係好有性, 身體有事, 點都等到主人回來先發作.  當年家姊姊夫回香港一個月, 由姨娚同大公子負責照顧佢, 一個月來都無事.   一個月之後, 姊姊先回去, 姊夫遲了一個星期.  等姊夫回家了, Jessie 便開始不吃不喝.  帶她去睇醫生, 初時又話腎有事, 後來發覺生了一個好大的腫瘤.   本來想要同佢做手術, 但醫生話做完手術都未必救得番, 的鬼佬醫生, 可以救的話一定救. 最終比個advice, 叫我姊姊姊夫考慮 put her to sleep.   最終全家好唔願意, 都陪著佢走最後一程. 當時Jessie差唔多九歲.  原來呢類型狗, 年齡到此都差唔多.   當時姊姊傷心到不得了, 情緒低落咗好幾個月, 在電話中, 我陪佢都哭了幾次.

從來都無諗著養狗, 覺得責任好大, 亦都怕傷心. 以前住apartment, 亦都唔可以養狗就更加諗都唔會諗.今次養狗都真係要多得型爸個朋友.  事原幾個月前有一天, 型爸的朋友, 叫我們幫忙收養一隻柴犬, 說女主人不喜歡, 型爸就將他帶回家, 小狗只有七個月大, 好像很驚慌, 個樣好憂鬱, 抱著佢都在震, 等我同型爸的愛心都挑哂出來, 怎知養了一天, 女主人的女兒又要攞番隻狗, 如果唔比番隻狗佢, 佢要離家出走.  咁嘅情況, 一定要比番人啦.  當他們來接隻狗走時, 都唔覺得隻狗好開心咁跟佢地走, 不過我地都無辦法.

隻狗走了, 心裡面有一點輕鬆, 因為正煩惱多了一隻狗, 狗屋放那裡.... 但狗走了,  心裡面又有一點空虛. 

跟著無意中上網見到LAP嘅網頁關於收養被遺棄嘅狗, 見到有一隻柴犬, 同之前嗰隻差唔多.  Send 個email去問吓, 點知己經被人收養了.  只有其他狗如史立沙, 臘腸狗, 北京, 雪山狗及雪橇.  大部份都已經四五歲.  我地比較喜歡雪橇, 去見吓佢, 大約兩歲半,  估唔到就係咁收養咗佢.

Loki來到, 我們一家都要從新學習如何養狗.  再加上Loki大病初愈, 我地去見佢時, 佢都係出院無耐.  收養咗佢, 梗係想佢健健康康, 我地都好想佢可以粗生粗養, 點知雪橇的腸胃好易敏感, 飲食一定要好小心.  佢千祈唔好病呀! 睇一次醫生好貴架.  仲貴過我地睇醫生呀! 今次決定收養時, 咩都無諗, 攞咗返嚟先算啦.   初時仲諗著起間狗屋比佢, 點知佢咁黐, 仲要上埋房望著我地先瞓. 如果而家要佢瞓屋外, 可能晚晚都要悲鳴. 我地點忍心呀!

從網上得知, 雪橇好怕宿寞, 不喜歡獨處, 如果獨留佢在家中, 佢會做出破壞性行為, 淨係呢樣, 都攪到我同型爸頭都痛, 我地要返工, Ruby都要放假麻.

不過自從佢嚟咗之後, 每日回家見到佢都好開心, 我同型爸都多咗時間一齊同佢散步, 聖誕假期呢幾日, 每天都帶佢去草地奔跑.  一放佢, 即刻狂奔幾個圈先至停.  見到都開心.

 
養狗雖然有的麻煩, 責任仲好大添.   但佢帶比我地嘅快樂亦都唔少


睇吓同佢梳毛佢幾冧....的毛真係多到, 係咁意都已經有咁多.....

暫時我都唔可以同佢梳毛, 等我氣管炎好番先啦.
 

為八號部屋女主人慶生

2012年1月2日下午10:05公開累積瀏覽 162 2

December 29, 2011, Thursday Night

吃了藥, 還是咳咳咳, 工作比較忙, 晚上又有聚會, 雖然狀態不好, 但還是要出席聚會, 因為Mrs Kua要幫八號部屋女主人慶祝生日.

八號部屋男主人因工作關係, 需出差離港, 咁我地點可以讓她獨自過生日.   Mrs Kua提議幫她慶祝, 哈哈, 咁我地當然贊成.

我要上班, 今天只提供了西冷牛扒, 再帶了一支意大利紅酒送給八號部屋.

今日Mrs. Kua 的女兒從美國回來一星期過聖誕, 大家又可以一齊慶祝.  今晚只有八個人, 大家可以輕輕鬆鬆

不過Mrs Kua都整咗個迷你assorted cheese做餐前小食


呢隻係organic chicken, 呢隻雞焗得非常之香, 肉質都唔錯.

Quiche, 好白呀, 呢個批用咗芝士雞蛋,洋蔥火腿.  整得好好味呀!

蘑菇意大利海鮮飯, 好香呀! 的飯就比平常嘅risotto腍的, 但都好受歡迎!


我帶來的西冷扒, 由Mrs Kua 煎, 食時加海鹽黑胡椒就可以, 好味喎!


火腿扁豆蓉, 呢碟我都係第一次食.

 

十三號部屋嘅炒什菜

另外仲有海鮮炒翠玉瓜


好豐富呀!


八號堅帶來嘅香檳, 佢話呢支要影呀! 英國往室婚宴都係飲呢支酒呀!


一支法國酒


再開咗兩支意大利酒


最後仲有Mrs Kua 整咗呢個無麵粉嘅朱古力蛋糕.

真係唔該哂Mrs Kua, 八號部屋女主人好開心呀!

不過我狀態唔好, 食得比較少.  要早的走呀!  我要返屋企執行理, 明天早上仲要返工, 要趕的report比老闆.   跟著下午同型爸飛台灣, 仲有得忙呀!

還要乖乖地返去食藥, 咁咳法點攪呀!

2011 回顧

2012年1月1日下午11:23公開累積瀏覽 167 2

2011年轉眼就過去了, 時間就是過得那麼快, 快得我連我在想這一年是怎麼過的...

想呀想! 不開心的事情, 竟然一件都想不起來, 似乎全都忘記了. (似乎全都是大不了)   心裡覺得最難過的事情(當時媽媽入了醫院做大手術, 手術後又病情反覆), 亦都過去了.

記得去年12月上了一個特別課程, 2011年1月份再上了一個高級課程, 當時幫自己訂吓了2012年的目標:

1) 將工作的步伐放慢, 不要迫得得自己太緊張, 有些事情可以放慢點嚟做.  盡量不把工作帶回家. 這點似乎做到了(八成吧, 並不十足), 個人好像輕鬆了一點... 有進步.

2) 回家後, 將那些繁忙事放低, 將我的興趣放在煮食方面, 寫吓blog, 好像寫日記一樣, 又好像做到 .

3) 另一樣就是女人的終生事業....(減磅), 這只做到一半.   比我心目中想要減的體重, 只減了一半. 這個失敗了, 因為這個終生事業同我的煮食興趣, 實在有太大抵觸....哈哈, 希望明年可以將未能減到的體重減下去.  最怕係減都未減到, 過時過節又食回來.

今年還有一樣不好, 就是從來都未試過要睇咁多次醫生, claim medical 都差不多claim爆了, 做瑜珈將膝蓋韌帶撕裂了, 令我做了多年的瑜珈都要停下來.  肩頸舊患, 比以前嚴重了, 令我十分煩惱.   剛啱又氣管炎發作, 現在還在吃藥.

所以我2012年的目標, 就以健康為大前題:

1) 最緊要是身體健康, 病的時候, 什麼也提不起勁, 煮食寫blog都無心機, 遑論工作.   2012, 健康為上, Happy family, 生活要舍意, 工作要愉快.... 繼續輕鬆的腳步.

2) 繼續我的煮食興趣, 寫blog如寫日記, 發掘更多的美食與人共享.  如果可以自創就更加理想啦.

3) 繼續我的終身事業, 從新訂立目標, 希望2012年達到我的型想減磅目標...

夠了夠了, 寫得太多目標, 到時做唔到又變成白寫...
2012 祝願各位Blog友同五號屋都一樣... 新的一年, 健康愉快, 理想達到...