黃金海鮮扒冬瓜

2011年6月8日下午3:08公開累積瀏覽 561 2                    

June 4, 2011, Saturday night

今日又攪到自己好忙, 大公子返到嚟, 第一晚喺屋企食飯, 我想整的同平時唔一樣嘅餸. 隻鹽水鴨已經煮好, 待涼待斬.  咁我就整另一樣餸....
呢味餸好耐無整過啦, 今日再攪攪新意思, 連冬瓜皮都玩埋.....

材料: 冬瓜, 海鮮(自己鍾意用咩海鮮都得), 鹹蛋3-4隻
調味: 鹽, 胡椒粉, 蒜蓉適量(起鑊用)
茨汁: 生粉水, 糖, 鹽, 胡椒粉, 半杯清雞湯. (我今次用鮑汁)

冬瓜兩斤, 要扁身夠闊嘅.  我今次連皮都用埋, 所以要扁的闊的, 如果唔想煮咁多, 亦都可以買少的.

鹹蛋3-4隻(將蛋黃蛋白分開), 海鮮今次用咗蝦仁, 帶子, 墨魚, 螺肉.   亦都可以隨意用喜歡嘅海鮮

將中間嘅冬瓜囊唔要, 將冬瓜肉沿皮邊切出嚟

而冬瓜皮就cut咗佢好似個皇冠咁

將的冬瓜肉切粒, 放回冬瓜皮環入面, 用大火蒸8分鐘.  蒸完出嚟嘅冬瓜水, 可倒出備用.
將鹹蛋黃蒸熟壓成蓉(慳時間, 可將蛋黃分開放入碟, 與冬瓜同時蒸).  鹹蛋白可以留起下次滾湯用, 亦可以下少落去同的汁一齊煮...不過小心會過鹹.

用蒜蓉起鑊, 將海鮮炒熟, 盛起待用

將熟鹹蛋黃壓碎, 加冬瓜水用鑊鏟壓煮至起泡.   (Ruby幫我將鹹蛋黃蛋白分開時, 並中一隻分得唔好, 蒸熟時黏著仲有蛋白, 煮起的蛋黃無咁靚....不過都無所謂啦.)

加鮑汁(雞湯)煮滾, 加入海鮮, 調味, 埋茨.  因為我今次用鮑汁(早上食鮑魚撈鮑魚麵剩低的鮑汁), 本身己經有茨汁, 所以我今次無埋茨.

將煮好嘅海鮮淋上蒸熟嘅冬瓜粒...咁就攪掂啦.

嘩! 我自己都覺得好靚呀!型爸一食即讚, 大公子二公子無出聲, 但係呢碟全部清哂呀!  開心.
以前煮呢味餸, 無利用個冬瓜皮, 都係一樣煮法.  今次連冬瓜皮都用埋(雖然只係用嚟裝飾), 但花小小心思, 有呢個效果, 特別覺得好味.

哈哈...使唔使幫呢個餸起個靚的嘅名呢?