2011年6月23日下午2:27公開累積瀏覽 448
今晚有gathering, 除咗整珊瑚草涼拌拍黃瓜之外, 我另外仲整鹽焗烏頭呀! 今晚人多, 要整兩條先至夠...
材料: 大條(肥美)烏頭兩條, 香茅一枝, 青檸1-2個, 蒜頭四粒, 辣椒兩隻
調味: 魚露2湯匙, 糖1匙, 粗鹽1包
行勻成個街市, 先至搵到一檔有大烏頭賣. 叫魚檔劏肚但唔打鱗! 洗淨瀝乾水份.
睇吓! 條魚幾肥美, 個腩有兩條肥膏.
另一條無咁肥, 但係都ok嘅.
最好就係個魚佬, 劏嗰時留番個魚扣.
將個青檸切開
搾的汁出嚟, 需要成個青檸嘅汁. 影出嚟呢的只不過係搾咗四份一個青檸, 用嚟影相先. 如果個青檸唔係好多汁, 可能要兩個青檸, 因為有兩條魚. 呢的青檸汁係用嚟調個汁
搾完汁剩下嘅青檸皮, 切細, 用嚟放入魚肚內
一枝香茅切成兩段. 其實切小段都得嘅, 我覺得成枝放入去, 好似好玩的.
兩條魚都一樣做法.
錫紙度好尺寸, 要足夠包全條魚, 倒下鹽
將鹽掃平, 要足夠cover整條魚身
將魚放下, 再加一層鹽在上面. 魚肚位要小心, 不要將鹽倒入, 如果唔係會好鹹架.
然後將錫紙拉緊包實魚身....包好一條啦.
如是者, 第二條都係咁包. 兩條魚, 一條肥的, 一條瘦少少. 包好放入雪櫃. 焗時再攞出嚟
跟著整埋個汁
魚露&糖
1個青檸嘅汁, 2湯匙魚露, 1茶匙糖, 要試味, 睇吓啱唔啱自己口味
將4粒蒜頭切碎, 2隻辣椒切碎
全部撈勻, 就成為呢碗美味嘅汁.
我以前亦試過另一做法, 將調好嘅青檸蒜蓉辣椒汁放1-2茶匙入魚肚內, 再包好放入雪櫃醃, 都幾好味架.
焗嘅時候, 將魚從雪櫃取出. 先預熱焗爐250c 10 分鐘, 再將魚放入焗20-25分鐘(視乎魚的大細). 將魚攞出嚟, 拆開, 將鹽掃走.
上碟後將魚腹切開, 睇吓的魚熟未, 或者的肉夠唔夠乾身. 如果唔夠, 原碟放入焗爐再多焗10分鐘. 咁就攪掂啦.
我呢兩條魚, 結果分開兩次焗. 開始焗時大家都話好飽, 唔好焗咁多條. 點知食完一條, 又話好好味, 又要再焗第二條. 攪到同身唔得閒.
因為分開兩次焗, 我又要將的汁分開兩小碗. 佢地讚的汁超好味呀! 問我點解整咁少, 嘻嘻, 梗係, 第二條焗好, 先攞埋另一碗汁出嚟啦. 如果唔係一陣間嗰條就要醮普通嘅豆醬啦.
有人欣賞自已整嘅食物, 又真係幾開心嘅.
沒有留言:
張貼留言