自家製柚子蜜

April 26, 2018, Thursday

哈哈, 今日繼續都係玩柚子呀! 

整咗兩酲柚子酒, 剩低大半個柚子, 其實可以試吓整柚子沙律, 但連續幾日都唔响屋企食晚飯, 咁不如整柚子蜜啦, 起碼可以放幾個月.

將的柚子拆哂肉, 最緊要係拆得乾淨, 唔好連著的白色嘅"衣", 如果唔係會好重苦澀味.

浸完酒, 剛巧剩低100g 冰糖, 就用冰糖啦.

將的冰糖拌勻的柚子肉, 跟著放入雪櫃一晚  (我嘅想法係好似整果醬咁,  落咗糖醃一晚等的果汁出嚟.

跟著就整的柚子皮

我都係用自己的方法, 用個檸檬皮刮, 刮的柚子皮出嚟, 咁樣快的又唔使刮到白色的部份.  跟著用的溫鹽水浸15分鐘 (網上話咁樣去咗的苦澀味, 咁我咪跟囉).   的水變濁, 跟著我換了兩三次.

的水變得好清, 我索性由得佢浸著, 放埋入雪櫃, 明天再處理.

----------------------------------------------------------------------------------------------------------------------
第二天.... April 27, 2018

從雪櫃 拎的柚子肉...吓, 點解無咩汁出嚟嘅, 唔通一定要用白沙糖先得?

 睇吓個低, 只係得好少量汁

 再睇吓的柚子皮....哼哼, 真係好頑固, 一的軟都無, 亦都無發大 (本來諗著浸腍咗, 煮的時間可以短的)

 咁唯有換咗的水直接落煲煮啦, 先煮10分鐘

 再加埋的柚子肉連冰糖加少少水一齊煮.... 呢的柚子都真係好頑強, 煮咗成30-40分鐘, 先至覺得腍.

 我試吓味, 覺得唔係好甜的顏色又淺, 加咗一大湯匙麥芽糖落去 (其實真係傻豬, 唔記得一陣要加蜜糖, 點會唔夠甜吖...仲肯定會深色)

 煮到無哂水變得稠就熄火 (越煮越少)

 我同呢款蜂蜜  (顏色咁深, 剛先應該無需放麥芽糖)

 將柚子醬放入已消毒的瓶, 等的柚子醬降少少溫

 再加蜂蜜, 睇吓改變到幾深色

再拌勻, 跟著放入雪櫃等兩三天.

哈哈, 我諗著整起都會有大半瓶, 所以咪預備咗我1000g 嘅瓶, 點知整起得少過半瓶.

我有330g 柚子肉, 30g 柚子皮, 100 g 冰糖, 大約15 g 麥芽糖, 150 g 蜜糖, 加起來都有六百幾....煮起揮發咗好多水份, 睇嚟呢道都只係有400 g 左右.

----------------------------------------------------------------------------------------------------------------

三天以後... May 1, 2018,  五月一日假期

沖番杯柚子蜜飲飲先.

 用匙取兩大湯匙, 感覺上很稠, 同超市買嘅柚子蜜差不多.

用嚟配今日煎餃子午餐.     飲落去有的失望, 蜜糖味大過柚子味.    平時超市買的柚子蜜, 咬落去柚子皮多的, 柚子肉不多, 但我呢杯啱啱相反.    勁多柚子肉, 少少柚子皮, 仲係好薄的柚子皮.  又唔可以講無柚子味, 總之同我平時飲開的柚子蜜有落差啦!    咁一的都唔難飲, 絕對係柚子加蜜糖, 只係唔係我飲開的柚子蜜.

等下次去開超市買一瓶返嚟, 再比對吓的味道先.