粉嶺新明苑晚飯

April 26, 2018, Thursday

今日又出街食晚飯.

 約咗個朋友, 佢住粉嶺逸峰, 咁就約佢响新明苑食啦.  我地都好耐無嚟呢道飲茶啦.  以前行完山成日都嚟, 但近來好少嚟係因為好難泊位.  今日嚟到一樣要等車位, 原來今日有人擺酒, 可能的人客好早已經泊咗車入嚟.

坐低見到隔離檯兩個人叫咗隻片皮鴨....好想食呀!   咁就叫啦.

我地睇大餐牌, HK$198一隻, 咁平!   點知到我叫時, 那侍應話唔好睇呢個牌.....

睇呢個啦....吓!  唔係阿麻, 申皮鴨HK$118, 兩食加HK$30, 即係HK$148, 唔怪得之隔離檯兩個人都叫一隻啦.

隻鴨好快就嚟到, 應該係燒定, 的侍應片出嚟時, 我感覺的皮唔係好脆, 哈哈, 佢地的手勢都唔係好熟練.   我見到隻鴨頭同頸好想食, 問佢可唔可以切埋出嚟, 佢話如果要咗兩食就得.

哈哈, 咁就切埋鴨頭鴨頸.   隻鴨唔係好大, 的皮亦都真係唔係好脆. 而配菜亦只得京蔥.   算啦, 咁嘅價錢係咁上下啦.

的粉皮都有兩籠大概二十塊.

另外我地再叫咗濃湯娃娃菜浸花膠

至於兩食的涼瓜炆鴨殼都好大碟 (忘記了影), 只係的豉汁略嫌鹹的啦.

我地只係叫咗片皮鴨兩食加一碟菜, 三個人都食唔哂. 埋單HK$288, 每位都唔使一百, 咁又幾抵食.

埋咗單侍應都仲問我地要唔要糖水...梗係要...紫米露好味!