2019 Canada Trip - Day 4

July 19, 2019, Friday

行程第四天, 我地今日出發去加東五天遊.   上次去加東已經係三年前嘅事, 當時同家姊姊夫四哥五哥開兩架車九個人一齊去.   今次我地一家四口, 加埋未來心袍仔就係五口, 仲有姑奶及外甥, 總共七個人, 所以租咗一架七人車.

今次行程由心袍仔負責,  而開車就大公子負責, 咁長途,  真係辛苦哂!

行程第一站: Lavender Farm, Address: 732  Closson Road, Hillier, ON K0K 2J0.  由多倫多出發, 行車大約兩小時.

到啦到啦, 門口一間小店, 入兩賣薰衣草餐品, 有護膚品, 香水, 精油及薰衣草味酒.   哈哈, 我聞咗的酒, 唔係太喜歡呀.

個薰衣草園都好靚, 我地坐咗响樹蔭下, 望著個園, 清風吹過, 好舒服呀!

入面係薰衣草製造場, 要多好薰衣草先可製一小瓶油, 所以價錢唔會平.

行程第一站, 無買野.

跟著下一站, 大約十多二十分鐘車程: Terra Cello Winery

我地入去打咗個round睇吓, 無試酒.   索性响呢道食lunch, 開枝飲算啦.

不過呢道食野, 第一件事係要慢, 仲要唔好催, 因為十檯都好, 只得一個Waiter.

要了兩份沙律

我地要嘅酒嚟啦.

無咩野落肚, 都飲杯先啦.

我地唔知份量大細, 要了一客意大利雲吞及兩個大pizza.  我諗等咗超過三十分鐘, 所以夠唔夠都唔叫啦.   唔想嘥時間在等待中. 加上坐在戶口, 有蚊咬呀!

跟著我地開車去Montreal, 大約要三小時, 唔可以食得太飽, 我地可以在車上小睡, 但公子要開車唔可以瞌眼瞓呀!

到啦到啦, 坐到腳都軟呀!  心袍仔經 Air B&B book 咗間民宿,   呢道係我地租間屋嘅後門, 白色嗰架車就係我地租的特大七人車.   間屋睇落有的舊喎, 好似拍片的屋.

經由前門入就好的, 紅色樓梯就係啦 (我諗屋主專誠將樓梯油紅色, 方便租客辨認.   呢間屋兩層分了兩戶, 我地上到樓梯仲要行一條長樓梯上二樓.   而紅色樓梯底下面有入口, 就係另一戶.

入到去有四個房間, 夠哂我地住.   本來諗著影相, 放低行李執吓又唔記得, 跟著又出去, 咁就返嚟先再影啦.

大家有的餓, 早的出去食晚飯.

我地去咗呢間Schwartz's 食煙燻肉三文治.   呢道要排隊, 我地排咗10張檯先入到去.   入面好迫, 真係唔好意思影相.    

咁出名真係要試吓

佢地試飲呢款車厘子味汽水....唔, 我好怕似藥水, 都係飲水算啦.

嗱...咁出名, 基本上人人都係叫呢一兩款...  咁係咪好好食呢.....一般啦, 都係Smoke Ham, 唔會好食到你一定要返嚟食.  又唔會好難食囉.

Montreal 食野, 比多倫多仲要加多三個稅, 再要比多15% Service charge,  食物唔貴, 但tax 加 service charge 後就覺得好貴.

嚟咗加拿大四天, 每天都仲係Jet Lag, 下午坐車可以小睡, 食完晚飯真係攰到不得了.   所以食完晚飯行咗一陣就返民宿.   四個房間, 但只有一個洗手間, 我地要輪著沖涼.

大公子同心袍仔無Jet Lag, 佢地話出去行吓, 一陣買好出名的 Les 3 Brasseurs Poutine 返嚟悿我地食.  我同型爸頂唔順, 要覺覺豬.  (結果都係唔記得影間民宿)

佢地買咗返嚟, 真係無叫醒我地食.  哈哈, 三年前嚟我都食過, 我唔覺好好食, 的Gravy實在太鹹.但大公子就crazy for it.

咩野係Poutine? 即係薯條上要加的醬汁及芝士

類似咁啦... 不過就令我想起三年的快樂時光, 當時Les 3 Brasseurs 實在太多人排隊, 結果外賣咗兩份Poutine,  放在拉喼上, 九個人圍著嚟食.....諗番起都開.