香草手撕雞

May 10, 2020, Sunday

同二公子佢地食完飯,  我就回家開工.   雖然話係母親節, 我都係要搵的野嚟做, 母親節晚餐自己煮.

今日要焗雞呀!

切碎的蒜蓉加牛油, 用嚟放入雞皮底.  即係由雞肚下面撕開, 慢慢推上去, 放的牛油, 好似推甩層皮咁.

檸檬放入微波爐叮一分鐘, 放入雞腔內

雜香草加紅椒粉加辣椒粉

搽勻在雞皮上, 放文焗盤

先預熱焗爐至250C

放入去焗30分鐘


同場加影, 焗鹹豬手.   隻豬手昨天已用來煲雜菜湯.  放咗入雪櫃一晚, 入爐前用豬插刺孔, 再搽白醋.

一次過焗兩樣, 慳電慳時間

焗好啦, 隻燒雞好靚

切開大腿位已經熟了

我跟手就做埋手撕呢部份.   手撕後唔係好大碟.   試一啖先....唔, 的雞肉好滑, 味道又好...正呀!

至於鹹豬手, 焗起都好靚, 但唔係成隻脆皮, 只有部份脆.  又順手起埋骨.

雞殼同豬手骨, 又可以留番嚟煲湯呀!   食得唔好嘥麻.