薯蓉蔬菜餅

May 10, 2020, Sunday

將香草雞及鹹豬手放咗入焗爐之後, 就輪到整蔬菜餅啦.

薯仔四大個 (屋企只有三大兩小薯仔, 湊拼就夠啦) 之前已經放咗入蒸爐蒸30分鐘.   Cindy問我點解唔加水煲, 會快腍好多.  我話比佢聽因為整蔬菜餅, 唔想薯仔太多水份.   蒸完30分鐘, Cindy話好似未完全腍, 咁咪蒸多5-10分鐘囉.

蔬菜就用咗西蘭花加椰菜花

的梗切咗出嚟, 先切片.

小煲加水, 先將梗放入煮分半鐘, 再加的葉煮3分鐘, 將的菜用過濾水過冷河等佢保持脆綠

隔去水份, 用剪刀剪碎.  (唔用攪拌機因為唔想的菜太碎).

我叫Cindy幫忙切半個洋蔥切碎炒軟.

蒸好的薯仔去皮壓碎 (唔需要好似薯蓉咁碎)

加入牛油及芝士 (我用了四塊片裝芝士撕碎.  趁的薯仔仲熱伴勻, 的薯蓉就會好有黏性.

再加入炒軟了的洋蔥

加調味: 鹽及胡椒粉, 蒜粉, 亦可加入些香草

再加入蔬菜拌勻

取蔬菜薯蓉整成球, 碌一碌粉(麵粉或粘米粉) 減去黏性.  鋼模塗少許油再將薯球壓入定型.

退模時要慢慢, 跟著包保鮮紙入冰格定型.

雪硬後再用保鮮紙獨立包裝再入膠盒, 咁就幾時食都得啦.   嘻嘻, 似唔似宜家賣嗰的呀!

呢個份量做了十一個

今晚只有我, 型爸同Cindy, 整三個就得.

食時可以煎或入焗爐焗熱

哈哈, 唔係讚自己, 味道真係好好呀!