魔鬼的化身

January 24, 2015, Saturday

好耐無整蛋糕啦, 型爸生日, 本來諗著懶的去酒店訂個蛋糕, 但去到Royal Garden, 見到New York Cheese Cake 要成六佰文一個(使唔使咁貴呀), 哈哈, 都係買料自己整啦.

一整就要整兩個, 因為會請的鄰居一齊食, 一個係唔夠架.

Cindy嚟咗幾個月, 完全唔迫幫手, 咩都要自己一手一腳, 溶牛油, 整餅底(每個餅底需要八塊消化餅壓碎加50g溶牛油), 放入雪櫃雪凍

真係魔鬼的化身嚟架, 每個要500g cream cheese, 140g 糖, 先打勻.

Cindy幫唔到手仲幫倒忙, 好彩比我救番.

仲要117g sour cream, 一茶匙雲呢拿香油.  仲要一隻雞蛋加一個蛋皇, 全部打型幼滑

將餅底從雪櫃攞出, 倒入芝士糊, 櫈平

170度焗50-60分鐘

50分鍾, 先拎一個出嚟, 個面焗得幾靚, 脫模

跟著整埋個面(117g sour cream + 28g 糖, 拌勻至無糖粒)

年幾無整, 估唔到的手藝都仲可以

在放入焗爐焗多10分鐘

呢個時候拎另一個出爐, 因為焗多10分鐘.  顏色深的.  先脫模.

焗耐的, 好似仲靚的添.

批埋個面先.

哈哈, 兩個都整得唔錯呀!

自已整係要花的功夫, 但係好味又慳好多呀.

等個蛋糕凍咗, 先可以放入雪櫃呀!   不過一陣出去食晚飯前要放入雪櫃, 唔係今晚食唔夠凍呀!

預祝型爸生日

January 23, 2015, Friday

人長大了, 對於生日好似無咁緊張, 但對於另一半生日又要緊張的喎, 我想佢知我緊張佢麻.

型爸下星一生日, 我今日就開始同佢慶祝.

Cindy今日放假, 我放工返屋企, 整個西式快餐佢食呀!

型爸好鍾意飲龍蝦湯, 上次買咗呢款龍蝦湯幾好飲, 只需加的cream, 加的brandy就已經好味.  正呀!

呢款黑松露pizza, 焗20分鐘又食得, 又係快靚正, 我都未影到相已經無咗一塊啦.

龍蝦湯加pizza, 最佳配搭

主菜係型爸同二公子都鍾意食的牛扒

今次唔用鑄鐵pan煎, 改用電煎pan

咁想食生的熟的就可以容易控制啦.

型爸喜歡飲龍蝦湯同食牛扒....哈哈, 完全滿足到佢吖...簡簡單單在家食一餐, 都真係唔錯架!

青衣城稻香漁港

January 21, 2015, Wednesday

昨晚先出去同舊同事聚會, 今日又係出去食.  因為今天係媽媽生日呀!

我地在青衣城稻香漁港食晚飯.   放工後由我開車去接媽媽, 跟著再送佢去酒樓.

呢餐又係十分扺食, HK$1,488 全包, 我地有十四位, 不過都唔使加餸, 只需要加壽包.

燒鵝一隻

上湯波士頓龍蝦伊麵

蜜豆花枝貢片

清蒸大海斑

鮮淮山浸時菜

芝香海鮮卷

紅燒海皇燴燕窩

蠔皇鮑菇浸時菜

仲有馬拉糕

我地加咗十八個壽包.

 

但食唔哂, 呢的大部份都要拎走

 
因為姪女訂咗個大蛋糕.

大哥大嫂從加拿大返嚟過年, 又可同媽媽慶祝生日, 一年無見, 大家都好開心呀!

對媽媽嚟講有咩野開心得過的仔仔女女返哂嚟, 但我仲有一位家姊一位哥哥要新年及新年後先可以返嚟呀.

又一村鄉村俱樂部

January 20, 2015, Tuesday

今日一早上咗國內工作, 晚上急急趕回來, 因為約咗舊同事聚會.   七點半要到呀!

同事住在又一村, 佢响又一村鄉村俱樂部訂咗一個房間

我地有二十幾人, 房間放了三張長檯.

同事安排了自助餐, 而食物係放响戶外


頭盤有薯仔沙律, 煙三文魚(啱啱攞哂), 火雞胸沙律

 
 麵包

 
三文魚海鮮湯

熱薰

炒飯炒麵, 薯蓉炒菜

仲有燒牛肉同羊架

甜品有芝士蛋糕, 啫哩, 生果

我要了的甜品....芝士蛋糕...唔夠芝士味, 都係我自己整嘅好味的.

仲有雪糕

我揀了芝麻雪糕

今日好開心, 好多舊同事好耐都未見過...今日要影番張大合照呀!

最開心係走嘅時候, 型爸已經開了車外面等我, 唔使我要轉車又轉車返屋企呀!

香辣焗雞翼

January 19, 2015, Monday

Cindy嚟咗幾個月, 普普通通煮幾味ok, 但稍為煮得好味的嘅就只有兩樣, 一樣係咖哩雞, 另一樣就係香辣焗雞翼.

呢, 就係呢碟啦.  其實我只係教佢同普通的豉油豆粉糖胡椒粉, 最後加的辣椒粉一齊醃.  跟著放入焗爐, 200度每邊焗15分鐘.  醃得入味, 食起來有少少辣十分惹味. 

所以我已經無再教佢整孜然雞翼.   以前Rudy成日整孜然雞翼, 味道太濃, 食到我怕哂呀!

今日有炒蓎萵

土魷蒸肉餅, 的肉餅比較實咗的

蕃茄豆腐三文魚骨腩湯

三餸一湯, 都算係咁啦.

日式溏心蛋

January 18, 2015, Sunday

晚上食完甜品返上房...突然鄰居打電話比我, 叫我落去樓下攞野

估吓呢袋係咩?

拆開第一層保鮮袋就睇得清楚的, 係雞蛋嚟架.

整咗四隻比我.

事源今早一齊行山, 到我地差唔多行完, 好兒子的女朋友打電話問佢家裡有無紹興酒...仲話有無雞蛋...哈哈, 我一聽就知佢想整糖沁蛋.   咁我話如果整溏心蛋, 橫掂整醬汁, 不如一次過整多幾隻啦.

做法我好清楚, 因為呢排網上教整溏心蛋...

做法: 先將蛋從雪櫃先放室溫, 先將欲蛋兩端刺孔, 煲滾水將蛋放入煮6分鐘(加點醋), 取起放入冰水浸5-10分鐘.  跟著整個醬汁: 50cc醬油, 一湯匙紹油, 一湯匙蠔油, 一湯匙蜜糖, 加薑片, 蒜片, 200cc水煮滾, 跟著用保鮮袋將醬汁袋好, 加入已剝殼雞蛋, 最少浸三小時.

 當晚太夜我無食, 第二晚响雪櫃攞出嚟, 一切開, 入面真係溏心呀!

哈哈, 唔使做就已經有得食, 係咪好開心呢!  快的去讚吓佢先.

攰中有樂

January 18, 2015,  Sunday

早上行完山, 今次比預計中行多咗個幾鐘(共行了三個多鐘), 下午返到屋企真係好攰, 要馬上瞓上張床平躺, 等條腰可以休息吓....

瞓吓瞓吓, 真係瞓著咗...哈哈, 平時下午真係唔會瞓覺, 除非病啦, 可想言之, 真係攰得好緊要.

不過攰還攰, 都仲係覺得好開心, 攰中有樂.  下個星期日一定會再去行山.

 咁攰都唔想出街食, 叫Cindy隨便煮幾樣餸啦.

紫泣蔥西芹雞髀菇炒牛肉

 

 炒絲蒜椒蒸黃花

 
 炒西生菜

南北杏雪耳蘋果瘦肉湯

簡簡單單的三餸一湯.

食完又要我出馬, 昨晚响八號部屋即興聚餐, 太夠了無整甜品, 應承了今天整甜品.

哈哈, 都係快速版杏仁奶露加湯丸.  不過的鄰居一嚟, 我就好忙啦, 煮甜品, 沖茶, 全部都要我自己嚟.   Cindy暫時都係無咩反應, 有客人嚟唔識沖茶, 遲的新年, 要快的教好佢先得啦.