即興聚餐

January 17, 2015, Saturday

今個星期六, 卒之唔使返工啦.   但我好忙, 今日Staccato開倉,我要去買靴呀! 晨早出去, 唔想同人迫.  哈哈, 收獲豐富....買咗五對呀.  先前掉咗三對舊靴, 而家買咗五對, 返去仲要掉多幾對先得呀!

食午飯跟著去買餸, 五點前趕返屋企.   因為今日我地屋苑要開業主大會...

一開業主大會, 八號部屋女主人話佢今晚只得一人, 不如嚟個即興potluck 啦.   哈哈, 我地有咩所謂吖, 有人開聲, 一拍即合.   Potluck就最好, 每人只係煮一兩樣, easy啦.

不過Mrs Kua出去義教小朋友, 佢無時間煮, 買咗壽司

林太炆咗芋頭炆臘鴨

仲有沙葛炒蓮藕


我叫Cindy煮咖哩雞


 
 我就負責煎薄餅

再炒碟豆苗


八號部屋煮了雪梨炆豬手, 仲有炒油麥菜

今日陶媽話返媽媽道食晚飯, 無預佢呀!

五號屋今日嘅咖哩雞唔係好大煲, 但都夠食啦

整吓整吓, 又好豐富啦.

嚟八號屋就最多靚酒, 今日又開兩枝呀....女士飲....三位男士, 繼續飲whisky啦.

送酒小食都有好多

八號部屋响日本買返嚟架

初時以為係朱古力橡皮糖, 原來係朱古力橙皮, 又幾好味喎.

仲有日本芝士蛋糕....哈哈, 食落都係五號屋整嘅好味好多!

開開心心又過咗一晚.

有人幫手煮, 食咩無所謂啦

January 16, 2015, Friday

自從星期一同Cindy慶祝完生日, 佢真係好似比以前有心機做野, 雖然有時煮的我地唔係好like嘅餸, 但起碼見到佢有用腦同出個心去煮餸.  但記性差呢樣就幾難改.

呢排工作忙到不可開交, 跟本無時間理佢, 返到屋企有人煮比我食就已經好滿意.  哈哈, 不過唔理咁有的就當然唔會煮得好理想啦.

煎薯餅, 我教過佢可以加的蔥粒洋蔥粒或肉碎...但呢碟只係雞蛋煎薯餅...入面無加芝士

豆卜蒸排骨, 呢碟佢最鍾意整,無難度...不過碟排骨咁少嘅...

 

 炒有機皇帝菜,呢的皇帝菜條莖好粗,但唔會韌呀!

水蛋蒸起個面有的醜, 但食落都係滑嘅

螺頭雪耳瘦肉湯, 我久唔久都會去百佳買, 清清地都幾好架.

三個人, 四餸一湯, 好夠啦.

Istanbul Express Turkish Restaurant - TSTE Mandarine Plaza

Jan 16, 2015, Friday

好耐無去食土耳其午餐, 今日同麻煩鬼同事去幫襯吓.

去到有九成滿客, 我地唔使等位, 即時入坐.

呢份午餐, 係combine version, 我同麻煩鬼一個叫雞捲, 一個叫羊肉薄餅, 每人一半, 就出咗呢個combine version. 

雞捲配幾條薯條(真係得4-5條咋), 薄餅配沙律.


羊肉薄餅都幾好味,  真係夠哂薄

但雞捲就真係麻麻, 的醬汁嘅味道完全唔同哂, 捲得亦好鬆....唔好味呀!

我就好多口,即刻問侍應個chef係咪轉咗, 點解味道唔同哂.  但答案係無轉chef....

吓, 咁下次要考慮仲要唔要叫呢個雞捲.

不過Turkish lunch 都唔會成日食, 只會久唔久嚟吓.

咖哩牛筋腩

January 15, 2015, Thursday

平時炆牛腩, 都會用高速煲炆好清湯筋腩, 分好兩份, 留起的清湯, 食時先用的清湯再嚟炆.

我買咗白蘿蔔, 諗著叫Cindy蘿蔔炆牛腩

不過今日Cindy整咗咖哩牛腩...  佢整嘅咖哩雞幾好味, 炆牛腩都唔應該會差, 但好似差咁的配料... 我的白蘿蔔去咗邊.


哈哈, 原來佢將的蘿蔔煮咗第二樣餸, 用嚟炒蛋...食落真係有的怪.   緬甸某些地區比較貧窮, 見Cindy煮好多餸都唔會放肉, 上次茄子炒蛋, 今次蘿蔔炒蛋, 跟著綠豆蓉粉絲湯, 都以蔬菜為主.  呢款餸真係唔係我地杯茶呀!

清炒白菜, 都係呢的基本餸易接受

節瓜肉片湯

三餸一湯, 都係以蔬菜為主,   不過碟蘿蔔炒蛋, 剩低一大碟...哈哈, 我都唔講佢都應該識意會...除非佢次次都想自己食哂一大碟啦.

手撕鹹酥雞

January 14, 2015, Wednesday

昨天叫Cindy蒸了鹹酥雞, 我食了四入一, 剩低嘅大半隻, 我叫佢用手撕,  變成冷盤

不過佢手撕得唔係咁好呀.   如果斬件, 二公子一家唔食, 手撕之後, 佢先肯幫襯吓.

 
Cindy仲榻咗反炸豆卜

 
炒豆苗

 
皮豆肉鬆蒸豆腐

 
又係煲魚湯

今日得我同二公子食晚飯, Cindy整咗四餸一湯,  都係要佢幫手先食得哂啦.

鹹酥雞

January 13, 2014, Tuesday

嗰日摷吓個廚櫃, 發現有包鹹酥雞椒鹽粉 (應該係响高雄買嘅), 好彩無過期咋.

我都唔知點整好, 叫Cindy用嚟醃隻雞....我有諗過要嚟焗, 炸定蒸好呢.  最終都係叫Cindy蒸就算啦.

我今日响國內做野, 返到屋企都已經九點.  型爸唔响屋企食飯, 二公子叫Cindy整碗粉比佢食.  到我返到屋企, Cindy先煮比我食.

炒咗炒少菜



 
 紅蘿蔔蕃茄煲魚湯

隻鹹酥雞, 我要了雞翼同雞脾....不過太夜食飯, 隨便食少少算啦.

的鹹酥雞無想像中咁惹味, 同鹽焗雞粉差唔多, 雖叫鹹酥雞粉, 但一的都唔鹹呀!

Cindy 的生日

January 12, 2015, Monday

Cindy都真係幾攪笑, 真係驚我地唔記得佢生日,  提咗幾次話今日會煮的緬甸野比我地食.  咁又係嘅, 一個人弧身嚟打工, 都希望有人知道自己生日.  

呢的就係佢上次出去買嘅野

仲有呢包米粉

今日要返工, 放工返到屋企都已經七點幾.    見到包豆豆已經入咗樽...

佢一見到我返嚟, 即刻將呢鍋野上檯

仲有一大碟熱了嘅河粉

仲有呢的配菜

 

原來我地今晚就係食呢的.

 

Cindy給我們每人預備一碗河粉, 只要加的湯, 加的芫茜, 加的蛋, 加的檸檬汁, 辣椒粉隨意.

食落的湯, 好似有的野响入面, 但又食唔到的咩.

我見廚房仲有一大鍋, 我問佢入面有的咩, 佢話有魚, 紅豆綠豆, 雞蛋.  但最終佢都無講哂入面有的咩.   哈哈, 真係食唔出入面有的咩野呀!  亦都唔覺入面有肉類.

碗粉我真係覺得一般, 好好食唔係, 唔好食又唔係.   但難得佢咁有心, 我地梗係話好味啦.  我地每人食一碗就已經好夠.   不過Cindy話, 佢地緬甸人一次會食三四碗.

食完的粉, 佢突然送咗封信比我, 介紹佢自己的家庭背景, 點解嚟打工.  仲話好多謝我, 會以我屋企人為榜樣, 佢在我家做得很開心, 會盡量做到最好.

哈哈.二公子話佢的英文都真係算幾好, 佢都寫唔出呢篇文.

嘩, 好彩我有準備咋, 今日下午買咗個蛋糕, 放工返嚟拎咗上樓(佢見唔到, 當我拎出嚟, 佢真係有的驚喜), 我仲買咗份禮物比佢.   叫佢切蛋糕時, 見佢開心到有的眼泛淚光.

Cindy嚟得我屋企打工, 我會當佢係家中一份子, 同佢慶祝吓生日都好應該.   以前的工人我都會比封利是.  但今年佢第一次嚟, 送個蛋糕, 再送佢一份禮物, 好過比錢佢啦.

當佢拆開份禮物, 佢好開心, 佢話 "this mean so much to me".   我送咗個wallet比佢, 叫佢比心機做野, 搵到錢, 開開心心帶回家.