睇完水舞間, 我地仲有時間, 先去威尼斯人行吓, 再坐的士落官也街, 因為晚飯訂咗20:30.
上次無訂位, 今次我地一星期前叫大公子嘅朋友幫我地預訂, 今次訂咗位, 當然無問題啦.
我地又嚟啦, 不過呢間餐廳真係好細, 入面得幾張檯咋
門口就掛著呢個正宗葡菜嘅牌
仲有recommend by Michelin 2009 & 2010嘅牌
呢張就係Mr. Antonio 嘅咭片.
去到幾張檯已經有人, 我都唔好意思周圍影, 影吓我地自己張檯好啦
檯面嘅setup都係好簡單
而餐碟, 餐巾, 都印有Antonio嘅簽名
我嘗試影的餐牌, 但太暗影得唔係好清楚, 又唔好意思用閃火燈, 都係放棄.
呢道的麵包好好食, 但係我地七個人, 佢比一籃, 實在唔夠, 後尾要加完一籃再一籃
餐前小食black olives, 就係我地平時買嚟送酒嗰的. 不個佢地再加咗的蒜蓉, 鹽, 橄欖油撈過, 梗加惹味.
Starters我地叫咗蒜蓉蝦, 味道唔錯, 但我覺得略淡
仲有白酒煮蜆, 好味
什錦芝士盤, 盤邊有的士多啤梨果醬, 配埋一齊食好好味
白汁焗馬介休... 呢碟好好味呀! 以前都係叫炸馬介休, 今次用白汁焗, 正呀!
姪女叫嘅蕃茄素菜意大利麵
姪女唔多食肉, 我地每人都係食少少, 留番多的比佢.
蒸什菜. 原來有時咁簡單, 都一樣好味.
焗黑毛豬, 呢碟睇落好細份的肉質好似好嚡, 但食落去又ok喎, 另外跟咗一個白飯. 因為太細份, 我地每人分咗一小嚿.
呢個係西冷牛扒, 哈, 上面有隻煎蛋, 呢份牛肉大碟過份黑毛豬, 但價錢黑毛豬仲貴的.
葡國鴨飯, 呢碟飯好好味呀! 有的似炒完嘅飯再焗, 的飯有的硬硬地, 的鴨肉撈埋的飯, 味道好濃.
我地叫咗一榨Sangria, 1 litre分咗7杯都差唔多無哂, 咁我地再叫多一榨啦, 點知佢地個個都唔係好飲酒, 大家飲少少高興吓, 無個想添飲. 後尾嚟嗰榨, 淨係我同型爸飲, 飲到我暈沱沱.
餐廳牆上面掛咗好多唔同人Mr. Antonio 嘅合照, 畫同獎狀, 但係埋唔倒去影close up, 因為的位有人坐.
我只可離遠影, 唔好影響其他人
呢張就知道, 呢道樓底高, 我影牆上面, 下面坐咗其他客人
呢道的食物都真係唔錯, 我地非常欣賞, 大家都覺得好好味, 姪女話下次會帶的朋友嚟一齊食. 今次嚟呢道食飯慶祝我地嘅結婚周年紀念, 我地都好開心.
不過埋單時就攪鬼的啦, 的waitress實在太唔小心啦...
第一次, 攞張單埋嚟, 我地睇吓...咁平, 無可能, 睇真的, miss咗好幾碟主菜. 我地食飯要開心, 唔想呃人, 同個waitress講, missing quite some items, please check the bill.
嗰位waitress多謝我地好多次(咁誠實), 佢第二次再攞張單嚟, 我地又check吓單, 咦! 今次多咗一個item喎, 我地邊有叫葡國腸呀! 又要麻煩嗰位waitress再check 一次.
第三次, 今次啱啦... 對哂所有item, 我地真係叫咗咁多野, 價錢亦都覺得好合理.
食完飯我地行出去官也街, 型爸叫我食榴槤雪糕, 點食得落呀! 去晃記睇吓有無肉切酥, 晃記啱啱關門. 老闆話如果想買, 明天下午兩點幾嚟啦. 吓! 明天睇吓有無時間先啦.
食完飯行一陣, 我已經唔係好頂得著, 酒意甚濃, 都係返酒店休息啦.
本來我地安排去六記食宵夜, 但我真係頂唔著啦.... 今日已經食咗四餐, 再去宵夜就變五餐啦. 飲咗太多sangria, 真係頭暈暈, 需要瞓覺多過食野. 都係返酒店休息啦.
講真, 個個返到酒店, 都想沖涼休息啦, 個肚仲咁飽, 邊想再出嚟宵夜呀!
沒有留言:
張貼留言