五號屋的部落: 芝麻蜜糖炸麻花

2012年2月11日星期六

芝麻蜜糖炸麻花

2012年2月18日上午11:43公開累積瀏覽 280 0

February 11, 2012, Saturday Night

上次睇報紙, 教用雲吞皮嚟整炸麻花, 想整好耐啦, 今日就試吓...

今次用咗十五塊雲吞皮, 已經可以炸好多塊啦!

首先將雲吞皮分開, 攞起一塊對摺, 中間剪開變成兩塊

再將長形對摺成正方形, 中間剪一吓, 唔好剪斷呀! 呢, 打開就係咁.

將共中一面轉人剪開之位置拉番出嚟, 就係呢個麻花樣啦. 超易.

不過我覺得一塊好單薄, 就將兩塊疊在一起一齊拉, 變咗雙麻花, 好似實淨又大的, 比較好睇.

加埋加埋, 整咗十塊單麻花同十塊雙麻花

落油鑊快火一炸就得. 的吞皮好薄, 好易燶, 加上第一次整, 火侯控制得唔好, 雖然好脆, 但係的顏色就炸得唔係好均勻啦. 配碟蜜糖.

嬸母話好似少咁的野喎... 係喎, 加的芝麻落的蜜糖就得啦.

比個close up睇吓, 真係幾鬆脆架.

幾香口架!

哈哈, 姪女仲要即場示範點樣醮的芝麻蜜糖嚟食.

呢個係懶人炸麻花, 唔使搓粉就有得炸. 不過我就覺得雲吞皮太薄, 唔知用水餃皮厚的會唔會好的呢. 真係要試吓先知.

其實都有心思思想自己搓皮, 加的南乳, 就變成鹹味麻花. 應該都幾好味架....不過諗吓先啦. 肩頸有問題, 有排都唔會搓粉搓包啦.

```````````````````````````````````````````````````````````````````````````````````````````````````````````````````````````````````````````````````````````````````````````````````````````````````````````````````````

後記.....February 16, 2012, Thursday Night

上次炸麻花, 火侯控制得唔好, 今日襯著新年後第一次lady's night, 放工又唔夠時間整的咩, 橫掂仲有的雲吞皮, 一於用最短時間, 再整一次呢個炸麻花.

今次好順利, 大約用咗三十分鐘就攪掂啦!