January 28, 2012, Saturday Night, 年初六
我今日好忙出咗去睇媽媽, 本來三號同六號部屋話potluck, 但如果喺我屋企, 我無時間做host呀! 後來林老闆話出去食啦, 咁相約咗幾個部屋一齊去陳漢記.
去到, 又係叫阿漢哥發辨...又係好多野食呀!
呢碟唔知係咪豬什呢, 入面咩都有, 豬脷豬腸豬潤, 炆得都幾好味.
滷水鵝肝兩份
鹹菜煮花尾躉
米通鯪魚球
酥炸生蠔, 呢道的整得好食過全記
上湯手打墨丸西洋菜, 的墨丸好彈牙呀!
杏汁豬肺湯
薑蔥墨魚仔
香煎鹹馬友
食到呢道我地已經好夠呀! 但係原來仲有兩味勁野呀...
客家走地雞
勁大隻嘅元蹄....嘩, 的男士食得好開心呀! 但係我見到的肥皮都怕, 但係佢地話好滑唔膩架, 但係我唔食呀!
我地連埋林小b都只不過係12人, 大人只特11個, 但係嚟咗11樣餸, 好彩的粉麵飯尾全部cut哂, 真係頂唔著啦.
埋單都唔平呀, hk$3,900... 平均每人hk$350
食完仲未完, 六號部屋話去就近滿記食糖水....吓, 都幾飽喎, 屋企又燉咗雪梨... 不過大家咁高興, 去就去啦...飯有飯肚, 甜品有甜品肚.
我地八個人, 叫咗好幾款, 有紅豆沙湯丸, 芝麻糊湯丸, 芝麻糊, 椰果涼粉, 芒果西米撈, 豆腐花. 呢間滿記嘅甜品都算平, 十幾蚊碗, 最抵食係豆腐花, hk$9一碗.
食完返到屋企都九點幾, 林老闆過嚟同型爸飲兩part傾吓謁. 咁又幾好嘅, 出去食飯唔飲得酒, 咁返嚟屋企飲就最安全啦.
橫掂我地都無咁早瞓, 仲要食燉雪梨呀!
沒有留言:
張貼留言