川貝冰糖燉雪梨

2012年2月1日下午1:29公開累積瀏覽 744 1

January 28, 2012, Saturday Night

其實呢排唔知點解, 成日都咳(以晚上為多), 喉嚨好敏感, 好似由收養咗Loki開始.  有時瞓瞓吓覺都會無端端咳醒, 喉頭很乾, 要飲水.  但一咳就醒瞓唔番, 一係睡不安眠.

嗰日去八號部屋, 見到女主人燉咗個雪梨比男主人食, 話佢夜瞓應酬多, 有的咳, 川貝燉雪梨可以止咳化痰.   見男主人食得好滋味, 我地幾羨慕呀.

今日我出去買咗料, 燉嚟試吓, 睇吓可唔可以止到我的夜咳. 咁型爸梗有份食啦, 我都想睇吓佢食到冧滋滋嗰個樣.

買咗五個雪梨, 一次過燉哂....

雪梨將頂部切開

用起芯器將芯取出.  唔知係咪因為起芯器係不鏽鋼, 整咗兩三吓, 的梨肉氧化變色, 無法啦.

跟著加一茶匙川貝粉落雪梨中心


本來想加呢的由馬來西亞買返嚟嘅石蜂糖, 但係諗吓諗吓, 蜜糖唔可以高溫燉, 都係唔好啦.   用返冰糖好的


將少許冰糖加埋落去, 唔使加水架.


跟著將頂部加牙籤插實


放入燉盅, 點知原來放唔哂架!  唉, 結果要分開燉, 電子燉盅燉三個, 明火燉兩個.

燉咗就出去食飯啦, 約咗幾個部屋去陳漢記開年呀!

點知食完晚飯我地又去食甜品.  好飽都等到好夜先食, 咁晚上林老闆過嚟同型爸飲酒傾謁, 咁就邀請佢食一個啦.

但係燉好時唔記得影, 食時好興奮又唔記得影, 總之用一個字嚟形容正啦!  燉起雪梨中間有的水, 燉盅入面亦都有的雪梨水... 幾濃幾好味架.

不過食時好熱, 要用匙羹仔括的肉出嚟, 有的麻煩, 的梨肉食唔哂喎.

不過食完當晚, 仲係有咳喎!  可能食一日係無效, 要連續食幾日先得....我諗要繼續燉.