今年媽媽生日, 好想為佢整個蛋糕, 媽媽年已大了, 可以的話, 希望可以多做幾年蛋糕比佢. 之前兩年, 都係整New York Cheese Cake, 今年想改變一吓, 想整個忌廉蛋糕.
對於識整蛋糕嘅blogger, 可能係輕而易舉, 但五號屋都未曾拜過師學過藝, 整蛋糕都係從網上嘅blogger學返嚟, 今次就試吓啦.
本來想整芒果脆脆蛋糕, 但呢排覺得的芒果唔當糙唔甜, 咁就整蜜桃脆脆啦, 媽媽生日, 就當甜蜜的壽桃啦.
先整個脆脆底先
响烘焙店買嘅脆脆片, 一包50g (下次我要買夠兩包)
坐溶50g朱古力, 溶後加35g菜油拌勻
加入脆脆片拌勻, 放入模鋪平, 再放入冰格急凍
跟著就整海綿蛋糕啦... 用咗整班蘭蛋糕嘅分蛋法
5個蛋白加70g糖打起, 而蛋黃就加30g糖加40g溶牛油, 半茶匙雲呢拿香油拌勻
跟著110g低筋粉加半茶匙baking power拌勻過篩.....咦...點解咁"杰"嘅....仲唔識死喎...仲勉強將的蛋白加入
當時個腦已經好混亂, 都無醒起自己漏咗的咩, 拌到一半, 唉吔, 唔記得加鮮奶呀...
嗚嗚嗚, 照焗就照焗啦, 真係焗唔起呀....我一入爐就要即刻再整另一個呀! 不過都post呢個失敗品出嚟! 只有一寸高咋....
唉, 已經無咩時間, 又要從頭嚟過, 無辦法, 好彩雪櫃仲有5隻蛋.
之後.....全部再嚟過....抵死吖, 咁多海綿蛋糕recipe都唔跟, 係要跟自己腍嘅做法, 人地嗰的唔需分蛋, 唔使加鮮奶都一樣整到.....
唔好再講啦...第二個都係照自己方法做
加咗100g鮮奶落蛋黃漿, 之後先加蛋白拌勻....似模似樣啦, 應該無問題
170c 焗15分鐘, 調低到150c焗多35分鐘
今次得啦, 8"模, 有3"幾高
用刀兼用個鋸蛋糕器
將蛋糕切成三片
開咗礶水蜜桃, 有九個半桃
七個用嚟放蛋糕面, 兩個切碎放蛋糕中間
打cream啦, 用whipping cream (大概400ml), 加咗2湯匙糖.
呢個時候, 型爸已經開始催我....要出門口啦....我地要趕著攞野比二公子, 跟著要趕去哥哥屋企...
真係催到我手騰腳震
一片蛋糕, 加的cream
响冰格攞脆脆底出嚟加上去
再放一片蛋糕, 搽cream, 放的蜜桃砰掃平
再加最後一片蛋糕, 開始抆cream 啦....型爸又催, 再唔出門口趕唔切.... 我叫佢開定車出面等
結果就係咁.
加埋個壽星公公仔, 仲有個Happy Birthday牌... 咁就加蓋出門口.
車神喺門口等緊我.....飛車攞野去比二公子, 跟著再去哥哥屋企....足足要兩個鐘...
去到哥哥屋企, 我要即刻入廚房攞巴刀再執執個蛋糕...因為經過飛車, 又整花咗少少...
呢個時候先有機會比個蛋糕入一入雪櫃, 可以雪兩小時, 食完飯先切蛋糕.
跟著食晚飯啦.....
最後就到切蛋糕, 睇吓, 切開都唔差架....的cream都唔係鋪得好厚...
我整嘅蛋糕梗係無街買嗰的咁靚啦, 不過佢地個個都話好味呀! 媽媽都話我整得好食...趕咗一日都係抵嘅.... 真係好大嘅鼓勵, 嗚嗚嗚(好感動呀!)
沒有留言:
張貼留言