板長壽司 - 粉嶺祥華

March 27, 2014, Thursday Night

又係星期四呀!   上星期去咗大埔超級城, 食餐飯唔覺意使咗幾萬文, 好彩使咗都覺得好值. 

呢個星期我同型爸都不斷有同天王溝通呀!  的力道度真係唔錯, 從來都未咁落力用張按摩椅, 真係要用呀, 因為唔知"新屎坑"會香幾耐加麻!!

今晚本來想响屋企煎牛扒焗薯菜就算啦.  但型爸又話放工返嚟咁辛苦唔好煮啦, 出去食啦.   哈哈, 其實都好想聽呢句, 呢排五號屋都真係有的懶, 有時星期六日都出去食.   不過有人咁體諒, 嘻嘻, 咁我就唔攞苦嚟辛啦.   其實又誘張咗的, 煮餐飯都唔係好辛苦啫.

咦! 板長消費多一次就過一千, 變咗會員就有10% discount, 咁即係無加一都抵吖.  呢排天氣開始轉熱, 唔想食中式炒小菜.  食日本野都係一個幾好選擇.  二公子就最開心啦.

雖然板長, 但要試吓第二間.   去了粉嶺祥華那間分店.  

不過去到就知有分別, 店子細好多, 完全唔使等位, 入去任坐.  再用手掌看菜單, 好多野都無,原條池魚沽清(都無客, 邊有可能), 無鹿兒島和牛(雖然無諗著叫), 無辣肥牛烏冬(湯麵類都只有三個選擇), 無伊佐木刺身...好多都無無無, 見到咁, 唯有盡量叫的特價野啦, 反面呢的就有呀. 

一客三文魚腩刺身

黑松露油甘魚腩壽司, 鯖魚壽司, 八爪魚壽司.  三個人, 每人一件

沙律吞拿魚及飛魚子軍腩

炙燒赤鮭壽司, 一口帆立貝壽司

仲有每人一件鵝肝壽司.

食到呢道, 我真係要投降, 已經八款, 即係八嚿壽司八嚿飯, 唔覺唔覺, 都可能多過一碗飯.  仲有芒果蟹子沙律同油甘魚餃未嚟, 我頂唔著啦.

 

但二公子同型爸仲未夠, 佢地仲要加單

 
芒果蟹子沙律嚟到, 但唔係咁好味, 的醬汁唔夠呀!  御八築地的好味好多.

型爸同二公再添食的都嚟啦, 二公子仲多叫了一客芥末鮑魚軍艦, 比佢一嚿就掉咗入口.

食多呢幾件, 佢地卒之話夠啦 (係啱啱好, 唔係太飽嗰種, 但我飲了點茶, 個胃重到不得了)

燒油甘魚腩最後先嚟, 型爸話ok, 但我食落就覺得無咩味啦.

今次除了鵝肝壽司, 全部都係魚魚魚.   今日叫的壽司, 單價都係平的, 但唔覺唔覺, 都食咗三百幾.   因為無叫貴價野, 上次同型爸兩人食了四佰幾, 今次三人食了唔使四百文.

哈哈, 呢道附近無野啱買, 唔會亂使錢呀!

不過下次再幫襯, 應該都唔會專誠嚟呢間分店啦.