學利魚蛋

December 13, 2014, Saturday

昨日頻撲了一天, 諗著今日待家好好休息一吓.   點知一瞓醒型爸話同林老闆約好, 佢煮羊腩煲, 問我地會整咩野....型爸答佢話魚頭湯....呀! 上次提過我要燉魚頭湯.  仲係想燉龍躉頭呀!

為了要買龍躉頭, 我們同Loki出去行完街後便出發, 去大埔墟街市呀!  去到中午十二點幾, 不如去食的野先啦.  今次唔食炸豬扒麵啦, 我想食魚蛋粉.

見到呢間學利魚蛋, 就坐低食啦(最重要係唔使等位)

見到menu, 大部份的粉麵餐都要三十幾四十文.   我同型爸見呢款八寶鍋麵HK$72, 問過侍應係二人份量, 咁就叫一碗,  套餐價HK$79 包飲品, 咁我問侍應係咪包兩杯飲品, 佢話包埋比我啦...咁又幾抵喎.

飲品先上

但張單嚟到, 竟然係HK$88, 咁我問侍應(一位中年女士), 套餐唔係HK$79咩, 點解HK$88.  佢先講套餐只包一杯熱飲, 再加一杯凍飲要加HK$9.   吓, 又唔早的講清楚, 又話包埋比我, 好似估意唔講清楚, 等的野嚟哂先解釋.   型爸話HK$9, 算啦.   咁唔算都算啦.

碗粉嚟啦, 真係幾大碗, 夠兩個人食.  的魚多好食, 魚皮都ok, 但其他嘅丸就非常一般.

型爸後來口痕想食牛腩, 我地加了一碟牛腩, 好似係HK$69.  但呢的五香牛腩非常唔得, 的五香味唔好, 的牛腩炆咗好耐, 但的瘦腩係嚡十十, 一的都唔好味.   我地要記著嚟呢道只食魚蛋粉便可以了.

當我地食嘅時間, 另外一位女士帶同年老的母親來食魚蛋粉(搭檯), 她們說聽別人說呢道的魚蛋好出名, 專誠來試.

她們叫了幾款東西, 侍應(同我先前落單同一位中年女士)落單後便行了去.  我多口話叫佢睇清楚, 有的食物可叫套餐抵食的.  那女士看了單, 那單上寫了幾行, 加起應該超過一百元, 那女士叫那侍應過來, 但那侍應沒有即時過來只叫她等等.  那女士等了一會便走去問另一位男士, 點知那男士叫他等等, 一會經手的侍應會來處理.   到她們叫的東西送來了, 那侍應才過來.   那女士問她叫的東西有那些配搭可變套餐, 那侍應才幫她改了單減了幾元....跟著那女士問, 這餐牌不是說套餐加炸墨丸不是加HK$7, 為什麼變了三十多元, 那侍應說因為叫了飲品, 就不可加其他, 要收原價.   如果落單時侍應解釋清楚, 我想信那兩母女是不會這樣叫的. 食物已送來, 想唔要都唔得.  

我對呢位侍應的態度非常疑惑, 好明顯佢係唔想解釋清楚, 等顧客叫錯咪比多的錢囉. 

我下次仲嚟唔嚟幫襯都要諗清楚.   唔係因為十元八塊, 係原則性問題呢!