澳美日三牛大比拼

November 21, 2014, Friday Night

今日生病, 睇完醫生去咗一田買野先返屋企.  Cindy咁啱又放假, 但我又唔想煮, 但型爸話好想食牛扒. 咁食牛扒都好, 我唔使煮麻, 拎個電煎pan出嚟, 邊食邊煎咪算囉.  喉嚨發炎食牛扒都應該無問題啩.

今日買咗澳洲和牛肩, 上次買咗鹿兒島和牛, 仲有响Cyclon買嘅Black Angus, 不如就嚟個澳美日三牛大比拼都好喎.


啱啱買的澳洲和牛 306g HK$146.90


呢塊係鹿兒島和牛, 222g HK$219

 
呢塊Black Angus, 唔知幾重, 應該都係300g 左右, 上次買咗三塊有大有細共HK$300, 呢塊係暖大, 應該HK$110-120啩.

屋企仲有Cheddar Cheese Leek Pie

仲有蔬菜薯餅

呢的都係唔使煮, 放入焗爐就得.

先食澳洲和牛, 肉眼嘅關係, 肉質好腍, 有的牛肉鮮味

跟著前Black Angus西冷, 呢塊肉質粗的, 也有牛味.

最後係日本和牛, 油脂分佈好, 入口鬆腍, 一樣好味.

三款牛扒都覺得好味喎, 型爸話款款都買得過食得過(即係廢話).....咁係咪第一可以考慮唔使買日本和牛呢?  價錢貴一倍有多....

的牛扒都未食完, 二公子就話想食鵝肝....呢的野, 我梗有存貨啦.   好彩係真空包裝, 只需用水沖沖解凍, 放落煎pan煎嚟食就得.

加埋蔬菜薯餅同Cheddar Cheese Leek Pie, 好滿足

响一田買咗柚子果汁酒, 型爸又要即刻開嚟飲.   呢款柚子果汁酒無上次八號屋請我地飲嗰的咁甜, 酒精度都有8%.  我飲少少咋(病人係唔應該飲酒架), 型爸口渴, 當果汁飲.

今餐全部用煎及焗, 簡單就整到一餐, 型爸同二公子仲食得好開心添. 不過型爸好似唔記得咗我係病人(佢話病人都可以食牛扒補補身)  雖然呢餐唔使點煮啫, 但煎煎焗焗, 都要洗碗架.... 佢話留番Cindy返嚟洗咪得囉.

咪攪, 我又無請佢食牛扒, 唔想剩番的碟比佢洗呀.... 辛苦命, 都係自己洗埋算啦... (我真係病架, 洗完碗早的休息好過啦).