大蕃薯

May 1, 2015, Friday night, 勞動節假期

勞動節假期, 本來晚上諗著繼續勞動, 整煙肉三文魚意粉, 但型爸話唔想我咁勞動, 晚上不如出去食.

二公子想食西餐, 咁開車去粉嶺Pezzi Bistro, 哈哈, 假期walk in都唔使諗有位, 要等到八點半...唔等啦.

再轉去Phad Thai, 又要等幾張檯....行過的有間餐廳喎.


叫大蕃薯

咦, 食西餐喎, 問吓有無位, 佢地話只要得一張, 下一個就到, 咁就呢間啦.  雖然呢間睇落似茶餐廳多的, 但唔使等, 試吓啦.

型爸二公子諗都唔使諗, 每人叫咗呢6兩+6兩 (即8oz+8oz啦)

我就叫了一份燒海鮮拼盤

見佢出面咁多cake, 出去睇吓

有麵包布甸,薑汁甘薯批, 南瓜批, 合桃批, 合桃甘薯芝士芝餅

坐番埋位, 見到東方日本2009年介紹過...六年前, 哈哈, 做咗六年,咁即係掂啦.

講到個甘薯批咁正, 一陣試吓先.

餐湯嚟啦, 栗米忌廉&什菜湯

洋蔥香檳汁青口

呢份係青檸味

西冷牛扒, 配蘑菇菜飯, 估唔到個飯又幾好味喎

呢嚿肉眼擺到明切咗一半, 肯定無六兩

什錦海鮮都係配飯

呢道嘅套餐, 餐飲同甜品, 只可以二選一

咁我試吓個蕃薯奶茶, 叫咗先知要加HK$13, 味道....真係把鬼, 怪怪地,下次一定唔會叫.

甜品要咗麵包布甸, 食落...下次又係唔使叫

 
另外叫一客甘薯批試吓....哈哈, 係咪我地奄尖呢, 食嚿蕃薯好味過佢啦.

埋喃HK$805.   西餐廳價錢, 茶餐廳服務.....

食咗咁多樣, 淨係覺得個蘑菇飯幾好食.   咁我又唔會話下次唔嚟嘅, 有機會先啦.  專誠嚟就唔會啦.