五號屋的部落

2011年1月18日星期二

香蕉紅莓蛋糕 + 椰汁香蕉蛋糕

2011年1月18日下午1:22公開累積瀏覽 203 1

January 16, 2011, Sunday Night

好耐無整蛋糕麵包, 今日見到超級市場有的包著特價香蕉, 睇落去仲係好靚喎, 忍唔住買咗一pack6隻, 諗著整香蕉蛋糕.

本來食完晚飯開始整蛋糕, 但林老闆佢地一家嚟咗食飯, 我地飯後傾吓謁食吓生果. 十點幾佢地走咗次後我先開始整.

睇吓, 的蕉真係仲係好好樣, 但平一半.

打開隻隻都好靚, 其實的蕉都仲未夠熟, 但都唔理Lu, 都係mash咗佢, 照整.

將的料Mix好啦

加的cranberry, 將的粉漿放落grease咗嘅焗盤

預熱焗爐170c, 焗1小時

跟著開始整埋另一個, 今次落椰汁&椰絲

再放埋入焗爐一齊焗,

因為兩個蛋糕入爐時間相差18分鐘, 所以焗起嚟兩個唔同顏色.

第一個焗好先出爐, 第二個繼續焗.

第一個香蕉紅莓蛋糕.

side view 都好靚.

的蛋糕實在太香, 焗起就比二公子同型爸試食, 我都食咗少少, 好味.

椰汁椰蓉香蕉蛋糕都攪掂啦.

最開心嗰個係Ruby, 佢等食的蛋糕好耐啦.

2011年1月9日星期日

2011年1月9日下午2:09公開累積瀏覽 63 0

唉, 呢幾日淨係得閒先左執右執, 個大project有排都未攪掂, 的野都仲係未能執到啱心水.

係咪大部份女性都喜歡購物和儲物?

我究竟係咪一個購物狂?

以前shopping, 無咩節制, 喜歡買就買, 一次過可以買好多.... 亦都可以一次過掉好多...
呢幾年常常remind自已要控制一下, 唔好買咁多野, 每次買野時都要停一停, 諗一諗, 係咪真係好鍾意, 好需要... 唔買係咪損失, 買咗又係咪好得....

搬咗嚟"山卡罅"之後, 少咗好多shopping, 亦唔好比自己有太多時間去shopping, 唔去shop就唔會買咁多啦...將的時間放落cooking, 仲更加開心化算. 正常情況底下, 會將的購物情緒, 轉移去supermarket買的必需品, 每個星期去買餸, 都可以滿足一下的購物慾. 但又開始轉買好多cooking 材料&用品....

雖然話唔買, 但久唔久都會買一件, 跟著又一件, 再下次又買一件, 唔覺唔覺積埋越來越多.... 有入究竟有無出? 一個人買野多定掉野多? 捨得買, 又捨唔捨得掉....

我究竟係咪一個儲物狂?

聖誕假期處理過的衣物, 點算吓, 真係好驚...2010年買過嘅衣服鞋物, 都應該有百幾二佰件.... 以前一年可以唔要幾箱衫, 呢兩年掉嘅衣物少咗好多呀! 的衫真係多到著唔哂, 有的著咗一兩次就唔記得, 新買返嚟未著過都有好多件....

好驚呀! 做完購物狂仲做埋儲物狂...... 要戒, 要戒...

2011 年開始.....

真係要全面檢討....新的一年, 要同自己講, 唔好再買咁多野, 衫, 褲, 鞋, 襪, 手袋, 廚房用品, 家庭用品, 食品... 全部要三思而後買... 我話嘅... 切記切記...

p.s. 需然啱啱又去咗美亞買咗個超大嘅煲, 不過呢個係物有所需, 型爸都大力支持, 仲幫我揀到一個平靚正大, 無破戒...

2011年1月8日星期六

大中華飯店 - 長沙灣

2011年1月8日下午2:23公開累積瀏覽 422 0

January 6, 2011, Thrusday, 上午&下午天氣頗佳有15c, 但晚上寒冷氣溫跌至只有10c左右

型爸話好耐都未兩個人出去食飯, 不如今晚出去撐檯腳. 咁當然好啦.

其實都無咩特別野想食, 型爸提議去食牛扒或鐵板燒, 但我又唔係好想. 呢排BBQ呀, 都食好多肉. 我提議天氣咁凍, 不如去食煲仔飯啦. 型爸諗起上次同朋友去長沙灣一間飯店叫大中華食飯, 的小菜同煲仔飯, 佢話嗰度好多人幫襯. 型爸就帶我去試吓.

型爸比大中華張咭片我睇, 全黑色好型喎, 大排檔張咭片都咁型.

我地差唔多七點去到福榮街正鋪, 當時唔係好多人, 但佢地話book滿無位, 睇吓後街有無啦. 正鋪入面得幾張檯.

由正鋪出到後巷佢地都話無位, 佢話响士多門口加張檯, 張檯放正兩條路交界, 其實都幾大風, 但嚟到就隨遇而安, 照坐. 其實如果我地唔要, 張檯好快就有人要, 後來仲响我地張檯後面再加幾張檯, 真犀利.

坐落就睇吓餐牌有咩食

見到都係普通中菜, 但價錢一的都唔平, 最平嗰碟小菜都要hk$50, 大部份都係hk$70-80. 魚頭呀魚呀, 全部都要hk$80一斤.

呢度最出名係鐵板黑椒豬手, 仲有燒乳豬, 但一隻hk$300我地兩個點食得哂. 咁就叫咗個鐵板黑椒豬手hk$80. 果然好味, 黑椒又香, 唔覺好肥膩.

本來想叫個魚頭, 但佢地話的魚頭最細每個最少兩斤, 我地兩個人又係食唔哂, 咁叫咗個例牌南乳脆鱔hk$80. 其實佢整得唔錯, 都算皮脆肉軟, 但我唔鍾意嗰的包住嚟炸嘅脆漿, 都係自己整嘅椒鹽脆鱔好味的.

嚟到呢道梗係叫煲仔飯啦, 睇吓, 真係即叫即煲, 個煲仲好大個添.

本來我地叫咗臘味煲仔飯, 但型爸見到佢地有黃鱔, 同埋我地啱啱食咗黑椒豬手, 太多肉兼臘味比較肥膩, 不如改黃鱔煲仔飯. 型爸同嗰位小姐講, 嗰位小姐又比我地改喎. (當其時又唔記得叫咗南乳脆鱔, 又係鱔...)

煲仔飯嚟咗啦, 真係"熱氣迫人". 個飯煲好, 佢撈好(加豉油蔥)先送過嚟. 個煲就大嘞, 但係飯好少. 大約4-5小碗. 黃鱔就好多, 落咗好多蔥. 唔食蔥又唔記得叫佢走蔥就"大鑊"嘞. 因為的蔥多到走都走唔倒. 好彩我地鍾意食蔥.

就係呢的小碗, 個飯都煲得幾好, 飯少餸多, 的米好有"咬口", 要慢慢食. 型爸話上次佢地叫臘味煲仔飯, 連埋的臘味, "趙"到牙都軟.

我地兩個人, 邊食到幾多, 叫咗三樣野都食唔哂. 嚟呢道食, 兩個人就唔係咁好嘞, 多幾個人可以叫多的餸, 但如果多兩個人, 個煲仔飯又唔夠食.

我地一路食, 一路都仲有好多人嚟搵位(係不停有人嚟搵位).

呢邊昌榮街開咗5, 6, 7 檯.

嗰邊後巷仲開咗十幾檯, 好多仲係大檯嚟添.

臨走時見到福榮街嗰邊仲有大把人响到等位. 使唔使咁誇呀!

的野係幾好鑊氣, 但又唔係好食得咁誇張啫. 坐又坐得唔舒服, 著住件太褸攬著個手袋, 仲鬼死咁大風(的人個個都著住羽絨縮吓縮吓), 真係有的辛苦, 不過街邊風味係咁架啦.

我地叫咗三樣野每樣都係hk$80, 加埋hk$240. 阿姐埋單收hk$240, 後尾見到型爸檯面礶可樂, 唉吔, 唔記得收礶可樂添, 算數, 請你飲啦....真係豪...

2011年1月4日星期二

新年快樂! 一月一日同媽咪慶祝生日

2011年1月4日下午2:35公開累積瀏覽 19 0

January 1, 2011, 新一年的第一天....又攰又眼瞓, 整天都係懶洋洋

再見啦2010.... 歡迎你呀2011...

通頂嚟同2010講再見, 飲醉酒來迎按2011....哈哈! 真係咁多年都未試過....

通宵達旦, 攪到第二朝十一點都唔願起身, 好耐都無試過可以瞓到咁晏.

呢兩日都安排哂, 耍即刻起身去接媽媽, 然後去哥哥家同媽媽慶祝生日. 好彩之前一日已經整好咗個蛋糕, 只要裝飾埋個面就得啦. 要就姪女的時間, 我地食午飯來慶祝. 十幾人, 又要麻煩哥哥嫂嫂攪一餐啦.

嫂嫂都整咗好多靚餸好湯, 但係我攰到唔記得個相機, 直至切生日蛋糕先記得攞個相機出嚟.
昨天整蛋糕唔記得响焗盤邊搽油, 脫模時攪到個餅邊唔係好靚, 唯有當缺憾美啦...鬼叫自己大頭蝦吖.

出門時, 時間緊迫, 用咗夏威夷果人朱古力嚟做裝飾, 加個壽星公仔& Happy Birthday 朱古力牌就攪掂. 其實的現成朱古力牌都幾方便, 一pack有兩個, 一個用落大公子個蛋糕, 另一個用落媽媽個蛋糕, 啱啱好. 本來想寫幾個字都無寫, 驚急得制寫錯咗唔知點算. 都係簡單的好. 媽媽當然收貨啦! 我第一次整比佢, 佢又係第一次收, 粗粗地, 無街買嗰的裝飾得咁靚, 但有我份心意麻.

食完飯傾吓講吓, 三點幾就走, 要返去瞓多陣添, 實在需要再charge charge 電, 今晚仲要為明天嘅party預備食物.

晚上再切埋整比大公子個生日蛋糕, 同的隔離鄰舍分亨. 昨晚的鄰居响我地屋企倒數時, 我打電話比大公子, 大家都一齊祝佢生日快樂. 但昨晚太多唔同品種嘅食物, 個個都好飽. 蛋糕咁細, 點夠咁多人食. 今日比心機寫埋個面, 影番張靚相先至切蛋糕.

放假仲忙過返工, 真係周身唔得閒...但唔得閒得嚟又好開心喎...咁樣, 生活先無咁平淡麻.