2014年3月22日 星期六

新森林焗之專門店

March 20, 2014, Thursday

呢排出去食午飯都無去咩野新餐廳, 今日經過寶勒巷, 見到有一間新餐廳, 即刻過去睇吓.

見到個餐牌,都可以一試, 咁就試吓呢間. 不過要等位, 兩張檯好快啫.  食晏時間, 通常都要搭檯.

呢間餐廳叫新森林

嘩, 原來有咁多間分店, 未聽過添

呢個餐牌show哂一個月嘅menu

個個星期係呢個餐牌, 同事選了L102, 我選了L103

奉送餐僕, 加HK$4仲可以有餐湯及麵包, 不過今日唔餓, 唔使加湯啦.

 
 等餐時, 對面搭檯的女任叫了吉列豬扒烏冬,  嘩! 好大份喎.  佢話杯即磨咖啡仲幾好添.

同事要的黑椒汁豬仔骨拼鮮茄雞扒, 呢兩樣都麻麻, 最好的竟然是炸薯條, 食落係用新鮮薯仔即炸, 唔係急凍薯條

 我要的豬扒拼魚柳意粉, 味道都ok

今日無要咖啡, 要了好立克

每份午餐都只係HK$40, 想點. 

睇張收條, 見到係焗之專門店, 下次要嚟食焗飯或意粉先得啦.

呢間的餐都算ok, 會再嚟幫襯.   味道嘅野無得假, 呢間餐廳有人排隊等位, 但隔兩間嘅茶餐廳就隨時入去都有位.

2014年3月21日 星期五

杏汁豬肺湯

March 18, 2014, Tuesday

上星期同美國回來的朋友去煌府飲咗個杏汁豬肺湯, 好好味. 今日型爸出嚟同我一齊食晏, 唔使諗, 梗係想佢試吓個豬肺湯.

為免去到無哂豬肺湯, 咁我打電話去訂位啦.   接線應該係一位男經理, 我話要訂位佢好似有的愕然, 唔知係咪平時都唔滿唔需要訂位.  咁我話幫我訂一鍋杏汁豬肺湯, 點知佢話要check吓再覆我.

我等到十二點三再打電話去, 佢竟然話今日無豬肺湯.   唉,要型爸失望添.  訂咗位都唔想去啦, 不過型爸出到嚟, 佢話算啦, 唔飲湯咪食第二樣囉.

咁同埋兩個同事, 一行四人照去啦.   去到真係唔使訂位, 的檯好多, 四個人坐八人權.

哼, 條氣唔順, 再問招呼我地嗰位女經理, 今日有無杏汁豬肺湯, 佢話幫我check吓. check咗返嚟係有嘅.....yeah!  那位接線男經理攪咩呀.... 要讚揚女經理Iris Chan, 招呼好週到添.

杏汁豬肺湯到啦.  好大鍋, 用呢款碗, 每人足有兩碗 ,  好香的生磨杏仁味呀!

 
湯料亦足 , 已經食緊的啦.

HK$1一籠蝦餃,要了兩籠, 每人一粒

今是叫其他點心, 要了經濟客飯, 一個小菜跟一碗白飯

南乳蓮藕炒豬爽肉

涼瓜魚腩煲

京蔥羊肉, 呢碟好鹹呀, 食落的肉無羊味, 分唔出係豬肉定羊肉

食完問吓Iris有無甜品送呀, 佢話一向都無甜品送, 不過今日特別的啦.   結果送咗每人一碗雪梨雪耳無花果糖水...好清潤呀!

哈哈, 加上飲咗杏汁豬肺湯, 今日非常養顏呀!

一客湯, 三個客飯加蝦餃. 埋單HK$340, 每人HK$85.

的湯係好飲呀, 不過唔知點解, 食完晏型爸肚痛.   我返到公司又係肚痛, 好彩痾完無事.   唔係好似上之stuck著喺個胃, 腸胃炎成十天.

連續飲咗兩次豬肺湯, 要過一排先再嚟啦.


2014年3月20日 星期四

美味的幾餸一湯

March 16, 2014, Sunday

上星期去完寧波, 返到嚟喺屋企hea咗兩日, 連按摩都唔想去.  今個星期, 唔要hea啦, 星期日午餐都唔食, 一家人去按摩.  亦難得二公子星期日放假.

去之前已經預備今晚晚飯食咩, 六點幾返到嚟, 即刻整煲仔飯.

 
叫Ruby幫我浸咗的米, 返嚟唔使半個鐘, 拿手嘅黑豚梅頭粒鴛鴦臘腸煲仔飯就攪掂

 
用咗200g雞湯, 一杯半米, 的飯軟硬適中.  兜亂, 臘腸一開三.  落咗雞湯, 煲仔飯豉油都唔使落整呀!

煲落飯就蒸魚, 呢碟蒸椒粉絲蒸黃花, 喺我屋企熱爆, 成日都咁蒸, 型爸very like呢!

 
魚入蒸爐炒埋碟腐乳生菜.   真係半個鐘頭有得食.

咁吒個肉骨茶就梗係半個鐘唔得啦.  Ruby一早煲定啦.   我地好耐無飲過啦.  上次去沙巴買咗兩盒(20包) 返嚟, 全部飲哂.   最近姑奶去星加坡, 買咗兩包比我. 咁又有得飲嘞.

兩餸一湯加一煲仔飯.   真係超正. 

屋企整嘅幾餸一湯, 點都好過出街食呀!

好耐都無寫過屋企的幾餸一湯, 但今餐好好味, 要分享一下.




2014年3月19日 星期三

唔食西餐食泰菜 , 一樣食得開心

March 15, 2014, Saturday

二公子剛啱榮升車主, 佢好開心, 星期六揸佢架車, 一齊出去食晚飯.

二公子提議嚟呢間在粉嶺的新餐廳

由門外影入去, 裝修得好靚呀!

點知型爸二公子入去攞位, 佢竟然話fully booked, 戶外位都無.  當時係六點半左右, 餐廳入面只坐了一檯人.   再問吓, 佢地話最好一星期前預訂.   估唔到, 新餐廳咁受歡迎?

咁我地就去第二間食囉, 無失望嘅, 二公子話下星期再嚟過.

 型爸提議去食泰菜, 行過兩三條街, 呢間叫Pad Thai, 金邊粉泰菜.  同林老闆一家嚟食過幾次啦.

  
不過都係要等位, 等兩張檯, 好快啫.

等位就順便睇吓食咩好, 三個人, 叫套餐都好喎, 二人餐家四人餐好的呢.

我地正考慮叫咩野餐, 侍應話有的兩個人都叫四人餐, 唔會食唔哂...吓, 咁係咪的野好細碟.   平時同林老闆嚟, 佢通常都係散叫, 要一隻海南雞, 串燒, 生菜包, 冬蔭公湯, 咖哩配蒜蓉包, 的野都唔係好細份架.

型爸最後決定, 要N5三人餐, 再加一客大頭蝦冬蔭公湯.

鋪仔細細, 坐到滿哂, 外面仲不斷有人等位.

好快的菜就上啦.

生菜包

馬拉盞炒什菜, 呢碟真係細的喎

炸蝦餅

大頭蝦冬蔭公湯

蝦醬炒飯

咁多野, 好夠食啦...咦, 仲有一樣未嚟喎.

青咖哩牛肉...都幾好味呀!

我地每人要了一個特飲, 都只係每位加HK$8.

埋單HK$410, 無加一, 食到飽飽.   相比起上次去馬會道泰國人餐廳, 呢道抵食好多呀!

食完行番去停車埸攞車, 經過見到Pezzi Bistro, 一樣有好多張吉檯, 外面嘅位亦無人坐.  哈哈哈, 呢間餐廳識唔識做生意架, 我地一早嚟, 食完訂檯嘅客都未到啦.

回程二公子叫我揸佢架車返去, 又好啫!  我地住得遠, 出入有車又係方便的嘅.  不過有車就一闊三大, 遅的佢就領略到架啦.

要快的返屋企啦, 一陣九點, 的鄰居要過嚟開會呀!  

2014年3月18日 星期二

煌府婚宴專門店-尖東幸福中心

March 14, 2014, Friday afternoon

今日有舊朋友從美國回來, 每次回來都好有心搵我同另一位同事一齊食午飯.   平事都會每次都去唔同嘅酒樓,  今次突然想起上次同Akiramay去煌府飲杏汁白肺湯, 今日一於去啦.  哈哈, 美國返嚟, 好少機會飲到豬肺湯架.

呢間煌府婚宴專門店, 好多分店, 尖沙咀店喺幸福中心.

坐落, 第一時間叫杏汁豬肺湯, 千祈佢賣哂呀!  哈哈哈, 經理就有.好彩, 唔使失望.

一鍋大概有六碗, 好濃的杏汁味,  HK$138, 抵飲呀!

 
亦非常足料.  哈哈, 美國返嚟嘅, 一定要飲兩碗.

 
午市仲有大蝦餃皇大特賣, 每籠HK$1, 每兩位限叫一籠(咁梗係要限叫啦, 唔係HK$1籠, 蝕本啦)

其他點心就由同事發辦啦.

煎腸粉, 一般

油菜
蘿蔔絲酥餅

椒監九肚魚...大多炸粉, 我唔like呀!

蝦餃皇每籠兩粒, 我們四個人, 要了兩籠

仲有黑松露燒賣皇, HK$15一籠

要了一個迷你煲仔飯, 呢個煲大約只有六寸, 的飯焗得唔錯呀!   呢個係一人份, 但我地四個人食. 因有其他點心小菜, 夠啦.

最差反而係呢個孜然羊鞍, 真係唔得呀, 的肉醃到好唔新鮮呀! 呢的質素, 唔得呀!

埋單四佰幾, 本來諗著我同同事夾份請朋友食, 但佢爭著埋單, 請埋我...哈哈哈, 多謝哂!

不過呢道的豬肺湯ok, 其他點心就麻麻啦.

咁久唔久要嚟飲個豬肺湯都ok嘅.   啊! 型爸鍾意飲豬肺湯, 下次同佢嚟.