心中有氣

October 15, 2014, Wednesday

的工人姐姐真係唔贊得, 唔知個腦唔識轉定係想偷懶唔做, 我真係唔知.   昨晚煮咗一餐, 但今日又傻吓傻吓.   之前同佢講過, 如果只有我一個人食晚餐, 可以唔使煮幾餸一湯, 食麵得啦. 但如果型爸或二公子在家, 晚餐就一定要煮.

今日型爸有客唔食飯,  我諗著今晚只得我一個, 就叫佢整青瓜涼拌手撕雞,  晚餐就用嚟配蕎麥麵.   到我開車返到屋企, 見到二公子架車, 咦, 即係放咗工.  入到屋見到Cindy, 見佢無野响道發呆, 我問二公子幾點返到嚟, 佢話五點幾, 咁我問有無預備晚飯, 佢話無....我問點解呀...佢又唔出聲發呆... 咁有無問二公子食唔食飯....又唔出聲....如果你唔知道, 可以打電話比我麻....又唔出聲, 望著我發呆.

唉, 上次都已經試過, 我同佢講, 二公子上班要輪更, 呢排差唔多日日都要返十幾個鐘, 有時我返工都見佢唔到, 如果佢返到嚟, 一定要問佢食唔食飯.    二公子五點幾返到嚟, 仲有兩個鐘先晚飯, 如果要預備晚餐, 大把時間, 而呢個時候Cindy係最得閒, 但佢選擇唔問, 唔知係咪諗著唔使煮, 一齊食麵呢?

但我作為阿媽, 見個仔呢排咁辛苦, 返到屋企都希望佢有餐住家飯食啦.   心中有氣, 但忍著唔發作, 鬧都無用, 即刻睇吓雪櫃有咩, 七點幾先開始煮晚飯(其實我攰到死), 我要等佢知道, 如果唔問, 都係要煮, 仲要晚的食飯, 晚的洗碗, 晚的先有得休息. (平時佢九點幾就瞓)

 
呢碟青瓜手撕雞佢已經預備好

 
好彩我chill櫃預備咗免治豬肉, 又有魚肉


mix 咗用嚟釀反炸豆卜


我無偷懶, 半煎炸一樣炸兩次, 十分鬆脆.   見到二公子食得好開心, 辛苦的都抵嘅.


雞湯蒸水蛋, 好滑好好味.

煲咗個瑤柱碎鹹蛋節瓜肉片湯.


快快手都可以有三餸一湯, 呢餐煮咗一個鐘呀!

可以同二公子撐檯腳, 趁食飯時間傾吓謁啦, 辛苦的都值嘅.   二公子呢排工作時間咁長, 要支持佢, 加油呀!