點教!

October 20, 2014, Monday

Cindy大食唔緊食, 但係識食唔願做就真係有的激氣.

今日又嚟翻版, 型爸唔返屋企食飯, 我叫佢煲個湯, 諗著一個人飲湯食蓮藕都飽啦.   二公子呢排放工時間唔定, 好多時都要返十幾個鐘, 我都唔知佢幾時放工.   點知二公子今又又係下午五點幾返嚟, 上次已經同Cindy講過, 二公子返嚟, 要問佢食唔食晚飯, 唔知煮咩就打電話比我.

點知我返到屋企, 見到二公子返咗嚟, 咁我問Cindy有無預備煮咩餸, 佢話No, 除咗我要佢煲嘅湯, 咩都無整.  唉! 真係谷住條氣, 但都無發脾氣, 呢的咁嘅情況鬧都無用, 傷感情.  佢唔煮, 我都要煮架.

打開雪櫃, 見咩煮咩啦, 但都唔可以二公子餐餐返嚟我都蒸水蛋煎午餐肉.

蓮藕湯就無問題啦, 本來呢份係我的晚餐.

好彩chill有魚肉, 又有魚, 對我嚟講無難道.

快手煮咗個蘿蔔炒魚鬆

煎條馬友.

我同二公子加Cindy, 兩餸一湯都夠啦.

諗吓, 咁都唔係辦法, 唯有平日餐餐都要佢煮先至得, 等佢有個概念每日都要諗吓煮咩餸, 到我地真係全部都唔返屋企食, 咁咪留番第二日先煮囉.  真係唔想每日放工返到屋企都要趕頭趕命.

如果Cindy諗著懶唔煮又話者唔想用腦咁就一定失敗, 好似今晚咁, 雖然我煮, 但佢都要幫廚.   夜咗食飯咪夜的洗碗, 咁夜的先可以休息, 佢諗清楚就知無著數.